ZualKo: Zumnak Ih Nu Ropi Sayama Za Vel Thluai Sayama Za Vel Thluai @Nu Thluai in tuihzing nazi 2am kiangkap ah Pathian hnenah in colhsan. Amah hi Falam milesa Zurisabah pawl ruundamnak an co ding seherh zettu, Zion Camp ih hotubik a si.

Zion Camp ihsin an khua Khuang Li ah Camo Center a tuah ih, cuni hman a ong man lo, a seherh zetmi Campers pawl taan in in fehsan. Falam ihsin Kuang Li an khua ah sohpi in tuini, tlailam nazi 2pm ah vui ding a si. “ZUMNAK IH NU ROPI” a si. Credit: TCM

Bawipa Bia Relchap Ding: Biakhiahnak: 30 Siangpahrang David nih hin hla a rak phuahmi Salm 23 nak hi kanmah zumtu hna tluk in a rel tthan lengmang lai tiah ka zum tuk lem lo. Kannih cu kan i lawmh bik caan zong ah kan rel i kan ngaihchiat bik lio caan, kan lung re a theih i kan hnabei a dongh lio caan ko ahhin a hlei khun in kan rel ngaimi hla/biazai a si. Zei bantuk caan i kan rel zong ah sullam a thar in a ngei kho tthan lengmang mi salm a si. Kan Bawipa Jesuh Khrih zong nih a ngakchiat lio te in a rak rel ve i thazaang a rak i laknak salm a si ttheu ko lai. Zeicahtiah tukhal ttha kong a chimmi nih Salm 23 sining kha a muisam a fianter khun, Johan dal 10 nih Salm 23 hi a hrilhfiah rua ti awk tein lung pem khawh a si. Salm rel duhnak lungthin kan ngeih i, kan rel lengmang lai timi biakhiah khawhnak ngeih khawh zong hi nunnak caah lam hruaitu ttha a si. A hmaanmi lam chung i kan kalnak caah bawmtu ttha taktak a si.

A bik in Salm 1nak hi kan biakhiahnak ah kan i hman khawh ahcun khuaawng kan pemh zungzal ko lai. “Mitthalo hna khuakhannak ah aa tel lo i,” tiah a hun chimmi hi a biapi tuk. Hi mitthalo hna khuakhannak ahhin lemsoinak tampi nan ton cio ko lai. A hlawk, amiak maw ti ahcun amiak tukmi zong a si ko lai, asinain a hrampi kha dinnak le Pathian lam hruaimi a si lo caah aphi chuak cu ttih a nungmi a si. Mah pumpak caah chikkhat cu a tthathnem men ko lai. Bawi Jesuh bia cun, vawlei pumpi hei co, hei ngeih kan ttung i nunnak sungh ttung phun kha a si. “Misual hna lam zong a zul lo i,” timi zong hi a biapi tuk, Job nih khan Satan lemsoinak le lam kha a rak zul lo.

Kannih kan ram cu kum 70 tluk misual mi nih an rak phahmi lam (eihmuarnak le ziknawhnak lam) kha duh zong duh lo zong ah a zulmi kan si i aa hlitphuak khomi kan um lo ti awk a si; asinain dinnak cu nihin ah vawlei in a au cang, rawl a ul, rian a ul kho cang, teinak kan hmuh dengmang cang, Deirel arfi a lang cang. “Pathian a nihsawhmi hna sinah a tthu lomi,” timi zong hi a biapi tuk. Meithal par he tthihphaihnak nganpi in lihchim fial kan si, hramhram in tthutter le ttuanter kan si, a nak kha a rang a si tiah zumhter kan si lio ah Dingthlulairel kha zeirel lo in an um lio ah, kannih cu Thiang Thlarau nih himnak kan pe ko seh! Pathian kan ttihzah peng ko lai. Pamh bia le chiatserhnak bia zong kan chim hrimhrim lai lo.

Hri an hrual tik ah thumkomh in an hrualmi cu a fek khun; kan kutdong pathum kan thlirmi te zong hi thumkomh hri hrualmi bantuk a si. Kan biak Pathian zong a sining kha thumkomh Pathian (Trinity) in kan sin ah aa phuang. Salm fungkhatnak zong hi thumkomh hri hrual bang in ralrinnak a kan petu, kan dirhmun a langhtertu a si: “Mittha lo hna khuakhannak ah aa tel lo i; misual hna lam zong a zul lo i, Pathian a nihsawhmi hna sinah a tthu lomi cu” a ti. Thluachuakmi an si a ti. Thluachuahnak lam a zulmi kan si khawh naklai Salm 1te hi kutdong pathum thir buin chim peng ve hna usih, kan thinlung catlap ah ttial hna usih.

Biakhiahnak: 29 Minung nih hin a kotho sining ah harnak ton cu a duh lo. A pumsa, thisa nih nuamhnak le zaang damnak hi a duh. Tluan peng lawng kha a duhmi a si ko. Cu hmanh ahcun thinlung lei zong in luatnak, hnangamnak, teinak kha a duh ngaingai mi a si i a lamkip in a kawl zungzal. Ttihnak, zawtnak, fahnak, lunglennak, le ningzah mualphonak, tbt, pawl kha minung thinlung nih a duh mi an si lo. Asinain nunnak lamthluan ah kan duh lomi kha kan hrial kho hlei hna lo. Nuamhnak a um bantukin ttahnak le ningttihnak zong a um ko. Damnak a um bantukin thihnak zong kan ton tthiamtthiam ko.

Ruahchannak kan ngei i pumsa in kan nunnak a dih hnu ah khin a tlingmi lawmhnak, fahnak a um ti lomi in kan i nuam te lai ti kha kan i cawn piak i khrihfami nih cu lam cu Bawi Jesuh Khrih zumhnak thawngin hmuh khawh a si tiah a cawnpiak. Minung kan hnabei a dongh i kan ruah khawh ti lomi pin lei ah kan Pathian kha kan i bochan; mit in hmuh khawh le kut in tongh khawh lomi, nunnak thar ahcun ttihnak a um ti lo, hnangamnak tling a um tiah kan i ruahchan.

Ttihnak a tthat lo khunnak cu ttihnak dang kha a hrin khawh caah a si. Ttihnak dang a hrin lawng si lo in, cu a hrin chapmi ttihnak kha a tthan a cawm i ttih chinchinnak nih minung nunnak cu a khuh i a zelh dih. Hling lak i a kheumi thlai kung bang i, cawl kho lo in a kan tuah. Bia siphainak asiloah zubui thingpar kaiternak nih a chuahtermi ttihnak, a um zong a um rih lomi, titsa zong in a lang rih lo mi kha, heh tiah kan i tthihphai i kan i tlerhkhawnh hna.

Mah le mah kan i tthihphaih pin ah midang zong kha, kha ttihnak hrik, rungrul kha an nunnak ah kan hei rawn piak ve i ttihnak cu virus rungrul bang in a karh duh ngaingai. Abianabia ah, “cu ti na tuah caah cozah nih an in tlaih lai, an in tlaih khawh, biathli an i ceihmi a um dah kaw,” timi thawngpang kha mi pakhat nih ttihnak virus rungrul cu a zamh; kan thin a phang i kan zaam, kan le. A ngaingai ti ahcun cozah nih tlaih duhmi na si ah cun thawng an thanh naisai lai lo, naa relh hlan ah an i thur diam cang lai;

tlaih ding in a min a chuakmi hna khi an tlaih khawh colh hna lo caah an min a chuak i pei a si cu! Cucaah ttihnak kha ttihnak dang kan hrin ter lonak ding caah lung fim tein bia a khiak kho mi kan si a herh. Hrin chinmi ttihnak kha a um bal lomi a si ti zong kha kan lung a pem a herhmi a si; thli lak ah ttihnak innpi kan sak piak lengmang mi hi a dik lo. Thli lak ah ttihnak innpi sak aa tim lengmang mi zong hi kan i ralrin a herh tuk. Na ttih tuk hraat a si ahcun nangmah vial nih va ttih ko, midang kha cu na ttih-zawtnak hrik kha va chawnh hna hlah. Thiang Thlarau nih kan veng cio ko sehlaw hrinchin mi ttihnak nih kan tei sawh hlah seh. by Lal Pek Lian

By Chuncha

Leave a Reply

Your email address will not be published.