Rampi thimnak a naih tuk cang ko, mah le party cio cu atu lio campaign an tuah cuahmah lio a si. Nihin i thawng kan theih mi thanwg cu a nuam lo ngaingai. Hi bantuk ram le miphun caah a nunnak tiang bak a pek hmuh a si tikah uar a um hringhran. Vanchiatnak timi hi zei bantuk thil zongah tong khawh a si ko nain rampi thimnak he pehtlai in aungnaingzi tuahnak ah a nunnak a liam mi hi cu philh an fawu ti lai lo. Mah hi nihin 16.10.2020, suimilam 10:20 hrawngah Okdwin myone party aungnaingzi i a vak mi nu pakhat cu Okdwin khuachungah an i citmi mawtaw cung in a tla sual i a nunnak a liam beh tiah thawng theih a si. R.I.P Credit – ကိုၾကည္ အုတ္တြင္

NLD Maw Kaa Thim Lai CNLD Dah?: Ka tlaangtar hna pahnih ah hin zeidah kaa thim lai tiah caan sau ngai ka rak ruat ve zeicatiah an biapi veve. 2015 ah khan cun NLD kha aho paoh ruahchanmi a rak si. Cheukhat nih cun Chin Party thawnter kha fak piin an rak chim ve. A caan a vun phak ahcun NLD nih landslide in teinak an hmuh. 2008 phunghram remhnak caah Suu Kyi kha kan rak i bochan tuk. Aa fawih lai lo ti zong kan rak theih ko nain zeimaw tiin remhnak lam a on khawh men ko ti kha kan rak ruah.

Atu i CNLD hmuitinh vialte hna zong khi 2008 phunghram remhnak cungah aa hngatmi lawngte an si. Ralkap nih ramkhel rian an kal tak zong hi a biapi tuk hringhran. Asinain kum 5 chungah ram an hruainak ah an remh kho hlei lo. Mi tampi an lungdong. Suu Kyi lehlam tu soisel le thangchiat a tong. Ralkap leiah a tang cang; Tlang Cung miphun a kan leirawi ti tiang in atu cun a thang kan chiat cang. Cucaah miphun party thawnter a hau cang tiah hnulei aa mermi an tam ngaingai cang.

A ruang hna cu: ralkap nih Suu Kyi le mipi sinah nawlngeihnak (power) pek taktak an duh rih lo ti a fiang. Ralkap nih a pelpawite democracy a kan pekmi hmanh hi ramdang pressure a fak tuk cang; sifah nih a kan reh tuk cang; chan pi chan khat deng Inn Hrenh ah Suu Kyi a hren cang. Pressure celh lo le sifah celh lo ah bite in democray a onpiak i, Suu Kyi an thlah.

Hi pinah Suu Kyi ca a siah mipi ca a siah lam dang on chap an timhmi a um ti lo. Zeitluk in dah ralkap nih Suu Kyi cungah pressure an pek lai kan thei lo. Suu Kyi nih ralkap he an i pehtlaihnak a langhter khawh lomi le a langhter duh lomi tampi a um lai. Langhter awk a tha lomi a um fawn rih lai. Ralkap nih zeitluk fak in dah Suu Kyi kaa an phih i, a chim duh lomi an chimter; a tuah duh lomi an tuahter lai ti zong kan thei lo.

Suu Kyi nih duh loin zei maw zei maw tiin ralkap duh lomi a pah chih ahcun nawlngeihnak maw an lak than lai a si loah zeidak pakhat khat cu an tuah than lai. Suu Kyi nih lesson tam tuk a ton cangmi a um. Kawlram nucan pakhat dirhmun in a fale thisen luan than lai a duh hrimhrim ti lai lo. Hnulei ah kir pi than a kan duh hrimhrim ti lai lo. Cucaah zeitluk dirhmun harsa ah dah Suu Kyi a um ti kan thei lo.

1988 ah khan a mit le a hmaika ah minung tam tuk kah le thah an rak tong cang; Inn Hrenh ah kum 15 leng a um; 2007 ah fak tuk in ralkap nih sandahpiahtu tukvelhnak an tuah rihi an thah rih hna; aa bochan taktakmi sihni Ko Ni zong an thahpiak. State Counsellor a chuah pitu kha Ko Ni a si; 2008 phunghram remh khawhnak lam a sialtu zong Ko Ni a si. 2008 in rampi kan hren cang an ti lioah Ko Ni nih an cungah Suu Kyi a thutter than lawng si loin phunghram remhnak tiang lam a sial caah a rannak in an thah.

Hi vialte hna hi ralkap lungput a si i, zeitluk in dah ram pi tlaihhip an timh peng timi theih khawh a si. Suu Kyi nih ralkap lonh a ngamh hrimhrim ti lo. Mipi an tuar; a dawtmi an tuar; a dang zong an tuar than khomi a si ti a fiang tuk zeicatiah ralkap nih zeitluk sau dah ram tlaihhip an duh ti a theih. Cucaah bobo calcal in Suu Kyi nih ralkap lonh le chawhkenh a tim ti hna lai lo; an taw tu zat lengmang hna i thluk dih tu aa zuam cang ti hi catialtu hmuhning a si.

Inn Hrenh in a chuah kaa ah khan cun a khupthal leh dih ding in a rak tim men ko lai. Asinain a si kho lo ti a fiang tuk cang le maw a si lai, naite ah khan cun Tlang Cung upa pawl Peace Making Process Award a pek cang hna. A sullam cu nan thachia rih lo hlah u; kan i zuam rih hna lai ti khi a sawh duhmi si. Suu Kyi naak in ram a daw deuhmi an um lo. A nunnak pek sian tiang in ram a dawt; 1999 ah ralkap nih a thi deng cangmi a pasal zoh ding in UK ah kalnak nawl an rak pek, asinain ka kal ahcun kirnak nawl an pe ti lai lo a ti i, a ram ca tu ah harsatnak a rak i thim. Ramkhel riantuannak ah a mah naak in a tuar deuhmi an um ti lai lo.

Asinah ralkap kut in a lak khawhmi a um rih lo. Suu Kyi hmanh nih a tei hna lo ahcun ahoo nih khin dah an va tei hna hnga. Cucaah Suu Kyi zuamnak cungah kan i hngatchan peng rih a hau ko. Lung a hring pahmi cu ralkap he hin ‘ka pe law kan pek ve lai’ timi cu an ngei hrimhrim lai. Zei can dah a rauh lai ti cu kan thei lo. A sau cang, Suu Kyi cawlcangh zoh le ralkap cawlcangh zoh hna tikah Tlang Cung miphun chunmang le saduh thah cu a hla tuk rih. Cu lio i CNLD chunmang chinchin cu a hla tuk. Miphun party cu kan dawt ding a si; kan tanh ding a si, asinain CNLD hi miphun party ah a chia kho lomi an tam pi fawn.

An min in chim cu a rem lo caah, atu lio CNLD ah hin Chin upa bochanmi tampi lungthin a um lo. Chin Party ti zong hi an fawi lo. A hlei in an aupi lenmi hmuitinh pawl khi a hmun le a caan lo pi ah a si rua tiah ka ruah. Ram sersiamnak le thanchonak tu hna kha zeitluk in dah; zeitin dah kan chuah pi lai ti hna seh law, lung a tho deuh hnga. Asinain an aupi lenmi pawl hi a si kho lo ding lawng te an si fawn i cheukhat caah cun ngaih an har ngai. By Luther Tin Hre

Note: Mipi sinah lunglawmhnak le zaangfah  nawlnak: Thawngpang {News}kan tialmi a kan relpiak tu ka Miphun Chin/Laimi nan dihlak cungah lunglawmhnak tampi chim cawklo kan ngei. Thawngpang kan tialmi nan kan relpiaknak thawngin a dikmi le a hmaanmi thawngpang {News} kan thlah{Post}khawh hi mipi nan thawngin asi.

Thawngpang  kan tialmi hi careltu mipi caah thathnemnak si hram seh tihi kan itinhmi asi. Chirhchanh {Source} kan lak hnu ah a dik mi asi lai tiah kan ruah mi kha kan Miphun Laimi {Chinmi} nih fawizang tein kan theih khawh cio nakhnga theihter khawh kan i zuam. Asinain vawleicung cu tlamtlinlonak a si caah chirhchanh {Source} kan lakmi tete hi a dik lomi a um khawh caah a dik lomi thawngpang a si tiah nan ruahmi kha zeitik caan paoh ah theihter khawh kan si i, kanmah lei zong in a dikmi thawngpang tial khawh le kan palhmi remh khawh kan i zuam lai.

Mipi nih theih ve hna seh ti na duhmi, thawngpang {News} siseh, Pathian bia siseh, siaherhnak bia in siseh, capar biazai le theihtlai pawl tialpiak ding a um ahcun zeitik caan poah ah tialpiak le thlahpiak khawh zong a si. Nan dihlak cungah lunglawmhnak le zaangfah nawlnak he- Lungleng Tlang Editor.

By Chuncha