Vawlei cung vialte a kan buai dihtu atu lio Coronavirus hi a tha deuh cang ko ruah tiah ruah lio pi ah ram cheukhat ahcun a zualhma saling ah a cang hawi. Hi zawtnak a chuah hi cu zei zong vialte in a buai ter dih i sunghnak longte a chuah ter ko. Minung nunnak tamtuk a liam cang pinah minung tam tuk nih dam lo in vansang auin siizung le innah a thlop cuahmah mi tampi um a si tikah thinlung a ba i khin a rit hringhran ko.

Cheukhat cu a thawngpang theihmi nih a zawtter mi an tlom ti lo, atu lio thla labang cu kum dang rai bantuk a chuak tawnmi khuasik le khuh, tangfah, taksa fah ti bantuk a kai lio he a tong fawn tikah Covid-19 hna ka si ko lai tiah lungre theih le sivang in a ummi tampi an um, a zei zawt paoh ahhin seikhan i piak le siizung kal tik zawngah Covid-19 test i tuah ta law ti a si peng fawn, test i tuah ta lo cun admit le i piak khawh a si hawi lo tikah zarang cu lungfim a har chin ko.

Kawlram lei hi a hung karh tuk manh ko, thong 6 leng kan phan manh ko, a thimi zong ruah lo pi in kan thahnem ngai rih. Bawipa thawngin Laitlang lei tu hi cu atu tiangah cun an him rih bantuk thawng kan theih tikah kan in lawm ngai cio, Bawipa umpinak thawng a si ti zong hi kan theih tikah lawmhnak a sang ko. India ram cu Vawlei cungah a phnihnak a si ko cang i thinphan dailo a si chin ko. Mizoram kan unau hna hi a dai bik ah kan rak ruah ve mi hna a si nain ruah lo pi in a karh ngai ve lio caan a si ve i vansang au in an um cuahmah lio a si ve, Bawipa tu nih um pi hram ko hna seh.

Atu USA, Indiana Chin mi sinah Covid-19 a karh ngai tiah thawng kan theih than i, kan lung a nuam cio hrim lo, Cu caah Chin Community Indiana riantuantu upa nih hi ti hin mipi sinah ralrin kan hauhnak kong an tial. Indy Chin mi sinah atu Covid-19 zawtnak a karh ngaingai, tiah theih a si. Cu caah pakhat le pakhat ilenkai, iton le rawleiti ti bantuk kha a si khawh chungin thlakhat chung tal hi cu van i sum hram ko usih. Bawipa nih a kan zangfah la ii kan isuum khawh ahcun kan tha than zau ko lai tiah fakpi in ralrin a herhnak thawng an thanh hi a si. Kanmah Chinmi chungin atu Covid-19 chungin himnak siseh, damnak siseh, thih lonak zong kan tong hraw nak hnga lo thlacam in kan umnak cio in in bawm cio hna uhsih. CCI

Note: Mipi sinah lunglawmhnak le zaangfah nawlnak: Thawngpang {News}kan tialmi a kan relpiak tu kan Miphun Chin/Laimi nan dihlak cungah lunglawmhnak tampi chim cawklo kan ngei. Thawngpang kan tialmi nan kan relpiaknak thawngin a dikmi le a hmaanmi thawngpang {News} kan thlah{Post}khawh hi mipi nan thawngin asi.

Thawngpang kan tialmi hi careltu mipi caah thathnemnak si hram seh tihi kan itinhmi asi. Chirhchanh {Source} kan lak hnu ah a dik mi asi lai tiah kan ruah mi kha kan Miphun Laimi {Chinmi} nih fawizang tein kan theih khawh cio nakhnga theihter khawh kan i zuam. Asinain vawleicung cu tlamtlinlonak a si caah chirhchanh {Source} kan lakmi tete hi a dik lomi a um khawh caah a dik lomi thawngpang a si tiah nan ruahmi kha zeitik caan paoh ah theihter khawh kan si i, kanmah lei zong in a dikmi thawngpang tial khawh le kan palhmi remh khawh kan i zuam lai.

Mipi nih theih le hngalh ve hna seh ti na duhmi, thawngpang {News} siseh, Pathian bia siseh, siaherhnak bia in siseh, capar biazai le theihtlai pawl tialpiak ding a um ahcun zeitik caan poah ah tialpiak le thlahpiak khawh zong a si. Nan dihlak cungah lunglawmhnak le zaangfah nawlnak he- Lungleng Tlang Editor

By Chuncha