Pu Van Cung thawngthanh mi chungin: Tutan cu US coronavirus kong update kan van tuah. Tuchun tiangah US ram ah coronavirus cases an hmuh mi cu 233 a si. Cu chungah 14 an thi cang. A thimmi lakah 13 cu Washington state ah a si i a dang pakhat cu California ah a si. Zawtnak hrik cu states 19 ah hmuh a si cang. Cu pinah, ramleeng rili in a hung tlungmi Grand Princess tinbaw cungah hmuh a si fawn. Tinbaw pi cu San Francisco khua pawng rili ah khuahkhirhnak an tuah lio a si. Minung aho hmanh an chuahter duh hna lo. CDC lei ţuanvo ngeitu nih an tawlrel cuahmah lio hna a si.

 

Montgomery county, Maryland ah zawtnak ngeimi minung pathum an um tiah Gov Halry Hogan nih nizan ah a thanh. Zawtnak ngeimi hna cu kum 70 cunglei a si mi nupa hna le kum 50 hrawng a si mi pa an si. An tuanbia an zoh tikah ramdang khualtlawnnak in a hung tlung tharmi an si. Anmah tein sizung ah an vai i piah hnu ah zawtnak an ngeih cu an theih hna. Ahopoh ramdang in a tlungmi kan um ahcun kan doctor sinah maw, sizung ah maw check up i tuah hmasa hi kanmah pumpak himnak le community himnak a si.

A tu tiangah state pathum – Washington, California le Maryland nih ‘State of Emergency’ an phuan cang. Ralring deuh tein um kan herh cio. Leeng chuah lo deuh, mibu sin umkal hrial deuh kan hau. Eidin le chungkhar thil herh tete zong a tawkfang cu i cawk ong deuh cio a ţha. Zei dirhmun dah kan phanh te lai ti hngalh khawh a si lo.

Cun, Federal cozah nih coronavirus dohnak caah tiin nizan ah $8.3 billion an pass. A tam taktak. Kan cozah cungah lunglawmh awk a si. Cozah kip nih coronavirus an hnasiaknak a ruangbik cu mortality rate a santuk caah a si. Mortality rate timi cu zawtnak a ngahmi le a thimi zatuak kha a si. Kum fatin flu in a thimmi an tam ngai tawn nain mortality rate cu a niam te; 0.05% hrawng a si. Tuchun ni coronavirus i mortality rate hi worldwide in 3.4% hrawng a si. China khi 3.7% hrawng an si. Tuchun ni US mortality rate tuak tikah 6% a phaan. Zeibantuk zawtnak tlangrai a chuah tik hmanh ah mortality rate 1% chung lei a si ahcun cozah nih biapituk ah a chiah cang.

Thiangi pa

Ref: Cianusa

By Chuncha