Zumtu u le nau hna Pathian duhning thlacam nun timi Devotional Article in thazaang lak than hna usih. Thlacam cu rawl-ulhnak in siseh cun ulhlo zong in siseh cam a si tawn. Thlacam hi kan mah duhnak halnak ca lawngah siloin Pathian he pehtlaihnak tuah in biaruahnak le biaknak le kan nunnak ah a mah Pathian duhpiakmi hngalnak a si ti kha kan hmuh fian ding a si.

Bible chungah thla a cammi nun kan hmuhmi cu anmah duhmi an halmi zong Pathian nih a leh hna i cun Pathian nih a tinhpiakmi ningin a lehmi hna zong kan hmuh. Cu chungah Pathian nih a tinhpiakmi ningin a lehmi hna kong he pehtlai in thazaang lak tti dingin vun langhter ka duh. Mathai 26:39 chungah Jesuh nih Gethsemane Dum ah thla a cam mi cu, “Ka Pa, a si khawh ahcun hi hrai hi ka thialpiak ko. Sihmanhsehlaw keimah duhmi cu si hlah seh, nangmah duhmi tu si ko seh” tiah thla a cam. Jesuh nih a Pa duhnak ai thim i vailam cungah thihnak tiang a innak thawngin mi vialte zungzal nunnak a kan hmuh ter.

Cu ve bantukin nang le kei zong kanmah duhnak nakin Pathian duhpiak mi ningin thlacam zia kan thiam a herh timi kha hi ca thiang nih a kan cawn piak. 2 Korin 12:7-10 chungah, Paul nih “Pawrhlawt ruamkai in ka um sualnak hngalo Pathian nih ka pum ah hling pakhat a chiah. Cucu ka lak piak ko tiah voithum tiang Bawipa sinah thla ka cam. A ka lehnak cu “Ka vel hi na caah a za ko. Zecatiah ka thawnnak cu derthawmnak ah a lang” a ti. Cu ve bantukin nang le kei zong na cungah siseh, fanu fapa kongah siseh, zeibantuk thil na cung i a hartuk mi hling na intuar hmanhah vuivai loin, Bawipa a thawnnak muihmuhnak le a sunparnak caah ti lungput ngeih in thla a cam tu si ve ko hna usih.

Daniel 6:1-28 chungah, “Daniel nih nikhat ah voithum lengmang thla a cam i Pathian a thangthat ruangah a tonmi thil cu chiandeih thongah cun an thlak. Sihmanhsehlaw Pathian nih chiandeih hna cu an kaa phih awkah a vancungmi kha a run thlah hna i cucaah a cungah zeihmanh thatlonak an tuah lo.” Daniel nih thla a cam i a tonmi harnak ruangah kan Pathian cu a nung mi Pathian a sinak le a thawngmi Pathian a sinak kha mi vialte nih an hngalhnak le an tihzahnak caah a rak si. Cu ve bantuk in nangmah lei in sunghnak le harnak lawng ka tong tiin na ruahlio caan ah hin Bawipa nih a lianngannak na cungah langhter a duh caah a si ti kha theih in Pathian sinah thla a cam tu si ko hna usih. Amen

1 Thessalonians 5:16-17 chung zong ah, “A zungzal in i lawm u, a zungzal in thlacam u. Zeibantuk thil nan ton hmanh ah lunglawm in um u. Khrih Jesuh chung i nan nunning ahhin hiti hin nung hna seh, tiah Pathian nih an duh hna.” A zungzal in thlacam nun ngeih ding hi Pathian nih a kan duhpiak mi a si.

Nihin zumtu nang le kei zong thla kan cam tikah kan mah duhmi kan kan hmuh lo, kan colo zongah zeizong vialte hi a tha leiin a kan serpiaktu Pathian a sinak kha zum hna usih. Cun harnak lungretheihnak kan cung a tlun tikah mi vanchia kan silo. Hla phuah tunih “Zeikip sihnaseh ka cung a tlungmi kha ka thlarau caah an tha dih ko.”

Cu caah Pathian sin thla kan cam tikah, kan mah duhnak lei lawng siloin kan biakmi kan Pathian nih a kan duhpiak ning in thlacam nun a ngeitu siko hna usih. Kan dihlak caah bawipa nih thluachuah kan pe ko hna seh. Amen. Ref: Prayer Ministry Group

By Chuncha