Australia Cozah Bawmhnak: Covid-19 ruangah Australia ram cu zawtfah puicimh kan ton long siloin, riantuannak company tampi zong sunghzatlaknak ton a si caah, Australia cozah nih phaisa bawmhnak cu pek cio a si. Company ah kumkhat rian a tuan rih lomi paoh kha cozah nih March 2020 in Jobseeker phaisa bawmhnak caah tiah zarhhnih ah $550 cu 6 October 2020 tiang pek a si lai i, 7 October 2020 in cun an thumh ve cang lai. Cun Kum khat in a cung lei rian a tuan cangmi paoh kha March 2020 tawk in Jobkeeper caah tiah zarhhnih ah $1500 phaisa bawmhnak cu nihin tiang pek a si ve.

Asinain, 28 September 2020 thawkin 31 December 2020 tiang cu Jobkeeper phaisa bawmhnak hmuhding mi cu phun 2 ah an tthen cang. Jobkeeper phunkhat cu zarhkhat ah suimilam 20 tang rian a rak tuan balmi paoh kha zarhhnih ah $750 long pek a si cang lai i, cun Jobkeeper phunkhat cu zarhhnih ah suimilam 20 cung rian a rak tuan balmi paoh kha zarhhnih ah $1200 long pek a si ve cang lai.

Asinain, zarhhnih ah $750 a hmumi pawl caah ( coronavirus supplement) Centrelink ah sawk chihkhawh a si lai i, zarhhnih ah hmuhchap ding cu $545, a si lai. Azapi hmuhding mi, $1295 a si lai. Cun zarhhnih ah $1200 a hmuding pawl kha ( coronavirus supplement) Centrelink ah sawkchih khawh a si ve lai i zarhhnih ah $276 hmuhchap khawh a si lai. A zapi hmuhding mi $1476 a si lai.

Culong cu si loin, single a simi nih cun inn hlan man cozah Centrelink nih (rent assistance) bawmhmi zong zarhhnih ah $139 hmuhchap khawh a si lai i chungkhar fa le he a ummi pawl cu automatic in, Family Tax Benefit Centrelink bawmhnak zong hmuhchap a si lai. Jobkeeper phaisa bawmhnak cu cozah nih March 2021 tiang pekding in timhtuahnak a ngei. Hi vial in zarih sehlaw nanzate mangtha, Catialtu: Pa Hen Thang

Note: Mipi sinah lunglawmhnak le zaangfah  nawlnak: Thawngpang {News}kan tialmi a kan relpiak tu ka Miphun Chin/Laimi nan dihlak cungah lunglawmhnak tampi chim cawklo kan ngei. Thawngpang kan tialmi nan kan relpiaknak thawngin a dikmi le a hmaanmi thawngpang {News} kan thlah{Post}khawh hi mipi nan thawngin asi.

Thawngpang  kan tialmi hi careltu mipi caah thathnemnak si hram seh tihi kan itinhmi asi. Chirhchanh {Source} kan lak hnu ah a dik mi asi lai tiah kan ruah mi kha kan Miphun Laimi {Chinmi} nih fawizang tein kan theih khawh cio nakhnga theihter khawh kan i zuam. Asinain vawleicung cu tlamtlinlonak a si caah chirhchanh {Source} kan lakmi tete hi a dik lomi a um khawh caah a dik lomi thawngpang a si tiah nan ruahmi kha zeitik caan paoh ah theihter khawh kan si i, kanmah lei zong in a dikmi thawngpang tial khawh le kan palhmi remh khawh kan i zuam lai.

Mipi nih theih ve hna seh ti na duhmi, thawngpang {News} siseh, Pathian bia siseh, siaherhnak bia in siseh, capar biazai le theihtlai pawl tialpiak ding a um ahcun zeitik caan poah ah tialpiak le thlahpiak khawh zong a si. Nan dihlak cungah lunglawmhnak le zaangfah nawlnak he- Lungleng Tlang Editor.

By Chuncha