1. President Donald Trump nih sianginn onnak caah aherhmi information le iralrin ding guideline vialte tlamtling tein kan tuah dih cang caah sianginn hi nan on ding a si ko” tiah a chim. Hlan ah Virus sining kan hngal lo, atu cu tampi kan cawn i kan hngalh cang. Ralrinak kan tuahmi tha tein zulh ahcun tihphan ding a um lo” tiah nizan ah Fox news he interview ah a chim. US cu federal ramkomh a si bantuk Sianginn onnak nawl taktak cu State cozah nih nawl a ngeihmi a si. State tangah ummi county zong nih nawl an ngeih rih fawn.

2. A ra laimi August thla chungah hin Noth Carolina state, Charlotte khua ah Republican National Convention tuah ding in timhlamh ciami a si. Asinain North Carolina state, ramukbawi Roy Cooper cu Democrats a si caah convention tuahnak nawl pek le pek lo atu tiang fiang rih lo. President Trump nih tuahnak nawl pek dingah nawl a hal nain biafiang lehmi a um rih lo. Mah Republican Convention puaipi ah hin President Trump cu Republican Parety aiawhtu in President cuh dingah official tein an cohlannak an tuah lai.

3. Brazil ram cu Coroanavirus zawtnak nih fak ngai in a den hna caah minung 363,221 an zaw i, minung 22666 an thi cang. Cucaah President Trump nih Brazil ram in US citizen lawng US ah lutnak nawl a pek cang hna. Brazil in ramdang mi paohpaoh US ah luh khawh a si ti lo.

4. US le Tuluk cu Coronavirus ruangah pakhat le pakhat an i mawhchiat, sual an phawt caah faak ngai in an i rengh. US cozah nih Tuluk company 33 US ah sipuazi tuahnak nawl an phih hna. Tuluk cozah nih vanlawng a phur khomi sangphawlawng pahnih , Liaoning le Shandon cu Taiwan ram thlanglei Yewloow rili lei ah a kalter hna. Taiwan cu Tuluk nih ka ram a ti nain Taiwan cozah nih cun Tuluk ram kan si lo” a timi ram an si i, US nih Tuluk ral in a venmi ram a si. Tuluk nih Taiwan nih a laak sual ahcun US he iphomh dawh an si. Credit: Salai Lairamthang

By Chuncha