T’hal khua pau zong ai liim ruangmang ve cang. Thli le ruah nih kanmah khuacaan a si ve cang tiah zoh ah a sang Vancung in khin lunghno ngai in a t’ap ciahmahmi Nau-hniangte mitthli bang a thlet in an hung i thle t’han hoi hna mu. Sihmanhsehlaw, hnah-no hna cu an corh i zimno hna cu an hun i khawt t’han ai hna. Nain tuzan thengte cu van ruah a sur lo. Tuzan cu a kingdai tuk, Furpi zan sihmanhselaw van a thiang i, arfi rual hna khi rel khawh zat in an lang. Tuzan cu thilzil zong a hrang lo mi ko ka lawhter. Tuzan bantuk zandai hi a um ti hnga maw!! “Thil tlau bang ka thluak nih a rak philh cang, nain ka thinlung nih ka hun hlam t’han dukmi Minu pakhat nih umsiarem lo le chungsivaang in ka thinlun a hun hninhsaih t’han”. A cu tluk ka rak palh cu!!! “Suisui, rak ka ngaithiam ko mu”. Suisui nih ka cung i a ngeihmi duhdawtnak hi ka thinlung ah ziamh ni a ngei bal lo. Ka thluak nih philh thai rak tim cang hmanhsehlaw ka thinlung chung ah hmape a um cang tik ah ka thinlung nihcun ruah lopi khin a hlam tuk tawn.

“Suisui he hin zalam tlang ah Sia nuva bang zat’ial kut tlai in kan rak lenng t’i. Ka baan nenno dawh cu thlah siang loin a rak i tlaih tawn. Dawtnak meithang nih a zelhmi khuadizam tang ah zanlei Ninem varal a kai tliahmah khi kan rak cuan t’i. Thlizil hrang nih kik siarmar tein ka dawt Nunu Suisui samfarual cu a hun thui hna. A lenpi hawi nih an iang lai lo ka dawt Suisui cu aa dawh a zual khun tuk. Thingtianpar hna le ramkung hring hluaimimborh hna nih Suisui a iang dawhnak ra lawm hna sehlaw, cubang, ka mit ka t’hial siang lo. Suisui hmur ah ka mit aa fu. Thlikik nih a caarter mi Suisui hmursen dawh cu cilsa in hun culh piak khi ka lung hung chuak. A calsam ka hei piak i, ka pheicung ah lumsa tein a hun zau;

“U Cung, na ka daw maw? Zungzal ca in na ka thim taktak ko lo ma? tiah ka pheicung cun a hun ka zoh i a ka hal.

“Mah bia ka theih cun ka hrom a ka hruk, ka hnarno a t’am. Kan dawt tuk Suisui tiah ka chim lai ka ti ah ka aw a chuak kho hrimhrim lo. Zei ka can! chim ka duh nain ka dang a khar e Nunu aw, bia ka chim kho hrimhrim lo.

“A Mit pumfang t’ial dawh pahnih in t’hep loin a hun ka zoh, mitmu kuang ah aa dil t’hupmi mitthli hna he “U Cung ka chim ta muh” a ka ti t’han.

Bia chim tim in ka zoh ko nain ka aw chuak kho hrimhrim lo. “Ka lu ka sukpiak hnu ah” ka t’aang ah aa beek chih i, ik thluahmah Suisui a t’ap ai e. “U Cung kan ngai tuk lai e, ka philh hlah mu” tiah hacangrial le kamseh in aanbia thlum a pau.

Zanlei Ninu nihcun kan liam taak hna lai e tiin a hun kan zoh ta. Suisui biangno cung mitthli hna cu furpi tilian bang dong hngal lo in an luang, ka kut hnih in a biangno nemte ah ka culh i ka hnawhpiak pah in “Suisui, ton t’hannak ni le caan cu a um te ko lai, kan ngai tuk ve lai e” tiah ka chim pah in “t’in usih mu” tiah ka hun nawl.

A hnar a vun hrawp chih pah, mitthli hai bu he cun; U Cung, “Mah ti si cun, mah hi zungbunh (Ring) te hi ka cohlanpiak mu”. Thantlang khuapi Sianginn taangkua ka kai lio ah na ca ah tiin kan cawkpiakmi a si” tiah a kutzung dawhte le nemte in cun ka kut cu a hun banh i, a hun ka hrolh dih hnu ah “mirh zimziam te khin na rem tuk U Cung philhlonak hmelchunh si hi mu” tiah a hun ka lawmh.

“Suisui, kaa lawm tuk mu. Mah hi zungbunh na ka pekmi nihhin ka nunnak lamthluan ah sullam thukpi a pawi lai i, hmailei ka phaknak ding hmun le ram kipah zumhtlak nun ka ngeihnak a nuntertu tehte sisehlaw, kan ngaih tuk caan ah a ka hnemtu hmelchunh si ko seh” tiah ka hun ti pah khin A cal ah ka hun hnamh i, “U Cung kaa lawm tuk mu” ti buin kan i kup, fak pi in kan i reek chih. Cuticun duhza kan cuai t’i hnu ah zalam tlang ah kutzat’ial tlai buin le lungduh biazaphai pah buin kan Inn zalam lei fuh thlaimai bu cun Sia nuva bang leng le val pahnih kan rak i zul.

Kum le caan zeimawzat a liam cang hnuu…..

Hello,,,,,…!! U Cung, na dam maw? a hmasa bik ah UCung bia chalh kan duh colh ko e. UCung, na kal lai ni cu ka chim ta te mu, kan thlah lai kan ti cu! zeiruang ah dah chim ta loin a thli tein na ka kaal taak, ziah na ka hlen UCung?? Maw….?? Ka nunnak siangpahrang na si kan ti kha. Ka nunnak hi na khuhchilh dih kan timi hi na ka zum kho lo ma? U Cung, ka let ta mu kaakhat te in ka kal taak thai hram hlah mu. Nang lo in cun ti nih a kang taakmi nga te bang khin chikhat lo ah a thi dingmi ka si.

UCung, nangmah hlawtmi Minu pakhat si lai ka t’ih bik. UCung, na pumsa cun a lang lo mual le tlang ahkhin na ka liam taak cang. Sihmanhsehlaw keicu na thinlung in t’henmi si lai khi ka t’ih bikmi a si. UCung na tlamtling ko lo ma? Lampi hna ah zeidah na lawh? na har tuk maw? Kan ruat, kan hlam, kan ngai tuk, ka nolh ko rih lai mu kan ngai tuk hringhran. Kan tiamkammi vialte hna kha naa cinken peng rih ko hna ti ka dawt ka T’a. Keicu mu UCung, ka philh kho lo nang he ka voikhatnak bik caant’ha kan hman t’inak zalamphei Lungte thlang kha. A ni 02/3/2015 zanlei kha cu ka thinlung ah a fiangmi zalam mei na vaan ni a rak si. Ka lungthin dihlak pek in kan duhdawtnak ka phuan ngam ni sunglawi a rak si. Mah lio caan na ka pekmi last kiss siseh, ka par tizu dawp in caan na hman lio siseh, na ka kamhmi “Suisui, zeitik caan hmanh ah nangmah lawng umter kan siang lo, na lilen tuk ding kan siang lo, a zungzal na sin ah ka umpi lai mu” tiah na rak ka timi aanthlum bia hna kha, ka ca ahcun robia bang ka thinlung ah hnangamnak bik dornak thladem a ka petu thazaang an si. Sihmanhsehlaw, a chan nih lai a rel bangin pumsa cun tluangchin dan ram ah na ka liam taak cang. Nihin cu na kal ni thawk khan ani 4nk a si cang. Na thawngpang ka theihlonak kumkhat tluk khin ka tuar, tluangchin mi hna le khualtlawng lamli hna sin ah na thawngpang thil tlau bang ka kawl i, aho hmanh na kong a ka chim khotu an um lo. UCung, khoi ah dah na um?

UCung, “ka dawt UCung aankaa ka ton lo cun ka ei chung pil kho hrimhrim lo e” tiah a ka daw biktu Sunghno ka Nu sin ah ka vuivai tawn. Ka Nu nih a ka timi cu “Suisui, na lilennak le lungretheihnak vialte Bawipa sin ah chia law, thla kan campiak lai mu” tiah a ka hnemh tawn. UCung, nitin zantin in nang zunngaih ah ka lungthin a me kho hrimhrim lo ti hi atu ka kut t’ial na hmuh in hin rak ka theihpiak te mu. Mising le zasing hna sin ah na konglam an t’ialnak cafang mukhat tal ka hmu kho hnga maw tiah kaa tengpang len zongah san a tlai rua lo. Nangmah kong an theitu ka hmuh khawh tawk leicung minung ah an har tuk e.

UCung, a hnu bik ah kei nihcun zumhtlak nun he na cakuat leh lai cuanh peng buin kan hngah ko lai mu. Kan dawt tuk, ka duh bikmi ka T’a na si. Ka zeizongte pek ngam in kan dawt cang bangin, ka nunnak vialte hrawmh ngam in na ca ah Nusalt’ha si kaa tim zungal ko lai e tiah bia kan kamh mu. Na ka dawt tuk ca ah kaa lawm tuk timi kan theihter t’han mu. Kei nih cun dawt lawng si loin na sining dirhmun khan kan cohlan i kan theithiam dih ko timi hi a si. Vawlei nih a chuahpi mi t’hennak cu tonnak Ni chuak ceu thar nih dong ve te hram sehlaw, nang le kei zong mah ni le caan ahcun kan i tong ve te lai mu tiah ruahchannak ngan bika ngeitu Leengnu mitthli za he ka ngol rih lai mu.

Zumhtlak in an hngaktu

Sui Chin Iang

12/7/2015.

Mah cakuat ka rel dih cu! Ka mitthli donh cawk loin ka biangnem cung ah an hung tolh thluahmah hna. Aluancia kumthum thil cangmi kha a rak si mu timi Nithla ka zoh ah ka hun hngalh khawh. Ka tha a zoi ka um sia a rem kho lo, ka thaw fakpi in ka hun chuah, mah hnu zong ah zei aa hlei lo, tikhalkuang ah tikik thawlkhat ka laak i, dih hirhiar in ka hun coh dih, ka thin linh nih daih tim zai aa rel lo, meikangh hma bang khin ka chung an lin. Ka mit a mui dih i, kaa hnuai t’han hnu ah fiang deuh in cakuat cu ka hun zoh t’han. “Suisui timi lawngte khi mit raa nawn cun ka hmuh khawh hna. Zeiruang ti ahcun Ramleng ka chuahnak ri khan atu tiang ah, tuchun lawng bak hi mah Cakuat ka hmuh ca ah a si. Ka thin a hung tuk! ka ngaih zong a chia zeiruang ah dah nihin lawng ah mah cakuat hi ka sin a phanh khawh timi hngalh ka duhnak ka thinlung cu meisa bang a hlio khin aa hlio, Ka innkhan chung ah cun ka lut i, Suitcase chung ah phaisa Rm 500 cu ka chuah zau i, ka hnu lei bawngbi zal ah kaa sanh. Tiger Beer dawr lei panh in ka lee colh. Hrai khat ka tlak…ummm…. “ka din ti lonak kumpi kum 4 a si cang hnu ah, zuu von din t’han cu a t’ha lai lo e” timi khuaruahnak zong nih a ka tei kho ti lo. Suisui,,, tiah a min hlam pah in zuu hrai 8 ka t’huat manh cang.

“Mitthlam ah a hung cuang ka dawt Suisui muihmel iang dawh kha. Aho phunsangfa hna lak zongah kei sifak fapa zak lo tein ka baan thlah siang loin aa tlaih i, panh chialmal tein a ka daw pengtu Suisui kha a dam hnga maw? Suisui ka ngai thiam mu. Na cakuat ka hmuh tlai tuk e. Suisui mah tluk hin maw na ka duhdawt ko nain kei nih zei hngal loin kan ruah palh ruang ah kan karlak pehtlaihnak kha ka rak chah tuan. Mah lai hi rak hngal ninglaw mu tluangchin an ser Thihri tal hi ka tuk hnga i, a lang loin ngaihnak bia zaza he duh bia kan phai t’i ko hnga mu. Suisui, ka ngaithiam tuk mu, ka thiam lo a si. Kan lunghrinh sual ee ka ngaithiam mu. Nihin cu ka hmu law mu Suisui, “T’a Cung mahticun na um ding ka duh lo dahkaw, zuu cu ding hlah mu, kan pahnih hmailei lamtluan ca ah lam hrawktu a si hlei ah na taksa ca ah a t’ha lo e. Cucaah maanzuu cu ding hraam hlah mu” tiah hmurka nem tein khin na ka nawl hnga i, ka cung i vawleicung Nu t’ha bik na sinak kha na hun ka hngalhter t’han hnga mu. Ka rii cang ee Suisui. Cuticun inn lei panh in ka ke nih hmun rem a laam kho na lo cun sawn pah buin ka kal ciahmah. Ka rii ko nain Suisui cakuat a ka petu Thliate sin ah thawngfiang hngalh duh ah ka va pial pah colh.

Thliate “Cungpi, ziah mah tluk cun na rit! Zeidah na cang??

Ka lehmi cu “Zei dang ka herhmi si lo, zeiruang ah dah nihin lawngah Suisui cakuat kha na ka pek? Mah kong lawng hi theih ka duhmi a si” tiah ka aw ceet nawn in zuu haw he ka ti colh.

“Thliate, Nan it cang maw?…ummmm..immmm..??

“Aw, Cungpi, it rih lo kan leng hih…Umm vei,,……muuuuu…….. Cungpi…….” a van ti vial ahkhin>>>>>

“Aaaaaa,,…. Thliate, mah lai ka hngalh lo ca ah Suisui he i pehtlai ti lo dingin bia ka khiah colhmi kha, ka palh bik ko rua, amah Suisui hmurka zong ka chawn thai ti lo. Zeiti si hmanh ah Suisui nih ka ngaithiam ko seh. I t’hit-umh t’han ding kha ka chim duhmi a si ti lo. Caan cu a luan i, an liam cang bang kaa ruahpalh ve cang cu ta. Nain mah tluk cakuat ka hmuh tlaimi le biasilo ka theihmi hi cu aruang ka chim taaaa kooo” ti bak in ka au hnawh cang. Pasal ka mitthli an hai dih manh. Thil dang kong ah cun ka t’ah beek lo, duhdawtnak nih ka thinlung hi a khuai hmal dih cikcek cangmi ka si ca ah a si. A faak…a faak tuk tiah ka taksa tuar celh lo tiangin ka phusa an ther dih.

Thliate nih “T’ha tein ngai mu Cungpi” a ti hnu ah mahtihin a bia cu a peh>>>

“Cungpi, a hmasa bik ah na sin Malaysia ah ka phanh hi a tlai deuh caah, ka theithiam law tiah zaangfah kan nawl. Na kal ni thaizing ri khan cun, Suisui hi mitthli he aa ciah colh cang. Na zuun tuar hi har a tii tuk hringhran i, zaang uai chialmal le t’ah pah bu hin chunzan a hmang tawn. Mithi zunngaih bang khin UCung hi khoika dah a phanh hnga? Ka ngai tuk, ka hlam tuk. Phone tal in a hun ka chawn te hnga maw aw tiah mit thlirh in Ni chuah lei tlang khi chunchun zanzan in a cuan tawn”.

“Na kal hmaizarh ahkhan kan khuami Zung Lian@Pa Lian cu na umnak ram lei ah rak rat ve aa tim ti a theih i, atu cakuat na relmi hi zuunngaihnak mitthli he a hun in kuatmi cu a si”. Cungpi aw, “nihin tiang zong hi Suisui nihcun an philh kho bal lai lo e” a ti pah in Thliate mitmu chungin aa dil t’hupmi mitthil hna cu tisor bang leng ah an hung luang thliahmah hna. “Cungpi mah kong ka ruah ahcun nan pahnih kong ah keimah hrim ka celh lo ka theithiam mu a ti pah in a mitthli cu a vun hnawt ta hna”.

“Cungpi, Suisui kumhnih chung na pehtlaih ti lo hnu ahkhan thil a sining fiang ngai in ka hun theih khawh vemi cu mah hi a si. “Pa Lian chungkhat sahlawh a simi Australia ram ah a ummi tlangval Za Hre nih Suisui cu Parcel in a hun cah lai tiah thawngpang hi a leng colh. Cutik ah nangmah hmurka le kan thei kho fawn lo. Zeitindah khua kan tuaktaan lai an ti hnu ah Za Hre Nu le Pa nih Suisui Nu le Pa cu an len colh hna. Sihmanhsehlaw Suisui nih nangmah “Cung Hnin lawng ka vaat lai” an ti peng ca ah, bia an khiak kho lo. Cuticun kumcheu a liam hnu ah Pa Lian sin in bia pakhat kan theihmi cu, Cung Hnin he kan i tong i, a ka timi cu “Sui Chin Iang tham cu Nupi dingah ka ti t’ung lo, khua um ve t’ung i DL ngeih lo cu tiah ka komh sawhmi men a si. Amah bantuk tham cu ka kutdong khiah zat in an chuak lai” tiah a ka ti>>> tiah thawngpang a vun thanh hna i, an lau cio hna.. Suisui Nu le Pa cu an thin a hung ngaingai. Sihmanhsehlaw, Suisui nihcun na hmurka theih taktak lo cun aa lungsi kho lo, a zum kho lo. UCung kan dawt peng, kan duh peng a ti i, mah zan cu a t’ap tuk. Ka siarem lo i an inn ah Suisui cu ka va riak. A ka ti mi cu ”T’a Cung hi nihin tiang a ka chawnh hnga lo ti ka ruah ah ka molh deng cang. Amah hmurka ka theih ta lo cun ka thih siarem bal lai lo” tiah a rak ka chimh. Cun, avoihnihnak Za Hre chungkhat Zung Lian, na umnak ram i a um vemi Pa Lian sin in phone a ra t’han i, “Cung Hnin nih Suisui cu ka ruahchan ti hlah seh, a chawnh hrim ka huam lo, ka umnak ram ah DL ka ngei cang, ka philh cang ko seh” tiah chimh a ka fial tiah a chungle cu a hun chawnh t’han hna. Cutik ah Suisui te chungkhar nih an theih hoi tikah cubantuk mi tuahtao cu dah ngai an ti i an lung a fak tuk. “Sui Chin Iang ka DL pa na timi nih zeihmanh ah an kan rel lo, mah bantuk bia a chim lengmangmi hi kan Markpa si dingah a si kho lo. Kan nun lio ah tulefa hmuh zong kann duh ve. Cucaah Za Hre hi na ca ah a t’ha lai, ram nuam ah an chiah khawh fawn lai” tiah an ti i a duh lo buin na kal hnu kumkhat le thlakuanak ah Za Hre cu a hung tlung ta duak i. t’hit-umh puai cu an tuahter hna”.

“Cungpi, Za Hre le Suisui puai lio Suisui mithmai kha cu ka philh kho lo. A mithmai hi a panh lo tuk i, a der zong a der tuk. Holh duh lo hin sau tuk a um i, a thinlung a rawk thai lai ti hi ka rak phang tuk i, hehchet tiah ka thiam tawk in ka rak hnemh tawn. Atu mah Ram ka hung phak ceo in hin Suisui Cakuat zong Pa Lian nih a rak in peklonak le a lih in Za Hre a t’anpi tuk ruangah a chung le phone a chawnh hna timi kha ka hun i fiang ve. Mah thil ka theih bak cun Pa Lian cung ah ka thinhung tuk i, Suisui Cakuat cu ka pe tuah ka ti i ka chuh. Cu hnu ah Suisui he nan i co kho ti lai lo ti ka theih ko bu ah an philh khawh lonak le a tuar-innak hi na hngalhpiak ve cu ka duh i, atu hnu pi ah Cakuat kha kan peknak a si ee” tiah Thliate nih a bia tlang cu a kawm.

Ummm…huuuu…..tiah ka thaw faakpi in ka chuah.

Thliate biachimmi nih ka zuu riit zong a fimter deuhdeuh. “Thliate kaa lawm ka ti i, ka t’ah chuak. Holh kho lo le mangt’ha zong tuah ta loin Thliate cu ka chuah taak colh. Mah ruangah a si mu “A zang he, bator pa….Zung Lian nih a phanh kaa bak ah “Suisui nih na kal hnu na ke pheh bak ah, Cung Hnin hi ka duh taktakmi a si lo. Chikhat a rak ka helh tuk i caan tawite kan i komhmi a si ko lo maw, Cung Hnin te hna cu an rak fim taktak lo tiah an thangchiat”. Cu lawng si loin US ummi Za Hre he i t’hit-umh an i tim. Suisui ka lehmi cu “Suisui kan chimh kan chungkhat a simi ka hngalhmi Za Hre cu vaai i tim duh hlah, zuu a ding ngai dahkaw ka ti i, zuu ding cu ka remh khawh lai, mah cu ahcun ka buai lo ramt’ha i ka um khawh ve ding hi a biapi bik ko tiah a ka leh”. Cu tik ah ka lungchung in Suisui hi Pa Cung ke pheh bak in mah bantuk lungput ngeih hi ka ti, ka khuaruah zong har tuk” tiah thawngpang a ka chimh lio kha ka rak i zumh sual cikcek mu. A ka hlen khawh dimdiam mu.. tiah lungfah lungin Uico Pa tiah thangpi in ka au…..

Suisui phone chawnh ka rak timhmi vialte zong Zung Lian bia ruang ah ka rak i leet phah kha. Azei ti si poh ah Suisui hmurka theih hmasa loin bia ka khiah colhmi kha cu ka palh tuk hringhran ko. Suisui rak ka ngaithiam mu. Atu ah cun Suisui zong fapa te a ngei cang i, James Cung tiah min an sak timi bia hna ka hun theih cang hna. James Cung tiah a fa min a sak i, ka min “Cung” hna hi keimah philhlonak ah a sak hnawhchan hna si hnga maw tiah ruah lo le ruah lo khi ka ruat. Suisui, na ka duhdawt tluk in kan daw kho lo! Na cakuat ka hmuh a tlai tuk cang e. Zeiti awk a t’ha hrim lo mu. Cucaah kei ca zongah na ka dawtnak hi ka thinlung ah ziamh ni ngei loin a par peng cang lai. Nain kan i co khawh lo cu lungsak lo bu zongah cohlan thiam kaa zuam ko lai. Midang bia zumh colh ka hmanmi kha nihin thawk cun hlen t’han khawhmi ka si ti lai lo. Keimah bia zumh fawi ruang le biachah fawi ruang ah, aankaa biak khawh lo ruang ah maw nunchung kan t’ian lan thai ko lai hi. Suisui ngaithiam kan hal. Rak ka ngaithiam. An dawtu na Vapa le na thisen in sermi na fapa te zong daw hna law, keimah philh khawh lo ding cun khua rak ruat hrimhrim ti hlah mu” tiah a donghnak bik na UCung nih bia kan cah. Tuzan a kingdai tukmi furpi zan thiang sin ah le linlennak in a khatmi ka vawlei ral lei arfirual hna rel pah in Chinchin zuntuar cu a fawi hrimhrim lo e. Duhtlinlonak vawlei ahhin a tling lo chinmi tuanbia thar a sertu keimah Cung Hnin nih mitthli he duhdawtnak ah a vanchiami hna, aa co kho lomi Leng le val vialte hna zuunngaihpar kan pek cio hna.

Furpi zan

A kik lo, a lum fawn lo
hi zan ka thinlung
a uai cang Ainawnpar
par ti hlah seh.

Ka cal kaa domh tuzan
a kingmi nun vawlei ah
a rak hninghno bal ko
zan dang ka thinlung cu.

Bia chah lo awk t’ha lo
ka duh bang si lo
dih ko seh, za ko seh
ka rei na um fawn lo, zei santlai.

An hram fiakfaiva tuzan
a hno tuk ka thinlung
kaa cumh ka t’aangnem
bia chat tu ka si, ka kam kaa seh.

Phuanlo ngah lo
thinlung in an chuak cu ta
theithiam ko mu Ainawnpar
za cang ko seh.

Bia tal cah ta ning
Thlavang ceu nem tang ahkhin
mah hi rak philh hlah mu
Tuzan in “dih cang seh”

Catialtu Salai Thomas Lian Thihlum.
Lenhloi Tuanbia a si.

By Chuncha