Billionaire Elon Musk ngeihmi SpaceX company nih minung citmi, Falcon 9 Rocket cu Florida state, NASA’s Kennedy Space Center in thaizing zanlei sumilam 4:33pm ah an thlah cang lai. Florida hi thlichia le tilet nih a den khawh men ti a si i, aden sual ahcun May 30 ah an thlah than te lai. Vawlei in khan 60000 renglo a sannak vanrang tang tiang a phan kho lai ti a si. Mah rocket thlahnak dingah US$ 62 million a dih lai tiah an tuak. Mah rocket cu NASA astronauts hna nih an mongh piak hna lai ti a si. Vanrang cungah minung citmi rocket an thlah hmasa bik a si lai. Mah rocket thlahnak puai ah President Donald Trump nih a telpi hna lai.

Mirum Elon Musk nih 2023 ah thlapa cungah khuatlawnnak tuah a timh i phaisa US$ 5billion cu a dih te lai an ti. Minung pakhat ticket caah US$ 20 million a si lai an ti. Elan Musk cu Telsa le Space X company ngeitu a si. Vawleicung mirum bik 23nak a si.

Credit: Salai Lairamthang

Thawngpang dangdang relchap <<<<<
President Donald Trump nih sianginn onnak caah aherhmi information le iralrin ding guideline vialte tlamtling tein kan tuah dih cang caah sianginn hi nan on ding a si ko” tiah a chim. Hlan ah Virus sining kan hngal lo, atu cu tampi kan cawn i kan hngalh cang. Ralrinak kan tuahmi tha tein zulh ahcun tihphan ding a um lo” tiah nizan ah Fox news he interview ah a chim. US cu federal ramkomh a si bantuk Sianginn onnak nawl taktak cu State cozah nih nawl a ngeihmi a si. State tangah ummi county zong nih nawl an ngeih rih fawn.

A ra laimi August thla chungah hin Noth Carolina state, Charlotte khua ah Republican National Convention tuah ding in timhlamh ciami a si. Asinain North Carolina state, ramukbawi Roy Cooper cu Democrats a si caah convention tuahnak nawl pek le pek lo atu tiang fiang in a chim duh lo. President Trump nih tuahnak nawl pek dingah nawl a hal nain biafiang lehmi a um rih lo. Tuahnak nawl an kan pek lo ahcun hmundang ah kan thial lai tiah Trump nih a ti. Mah Republican Convention puaipi ah hin President Trump cu Republican Party aiawh in President cuh dingah official tein an cohlannak an tuah lai.

Brazil ram cu Coroanavirus zawtnak nih fak ngai in a den hna caah minung 363,221 an zaw i, minung 22,666 an thi cang. Cucaah President Trump nih Brazil ram in US citizen lawng lutnak nawl a pek cang hna. Brazil in ramdang mi paohpaoh US ah luh khawh a si ti lo.

US le Tuluk cu Coronavirus ruangah pakhat le pakhat an i mawhchiat, sual an phawt caah faak ngai in an i rengh lio a si. Tuluk cozah cu US cozah nih Coronavirus a semnak kong aho lei kap hmanh a tang lomi phu zalong tein hlat hlainak na pek hna a hau tiah a fial nain Tuluk cozah nih anmah i tel loin zei bantuk investigation hmanh tuah a duh lo.

US cozah nih Tuluk company 33 cu US ah sipuazi tuahnak nawl an phih cang hna. Mah ruangah Tuluk cozah nih vanlawng a phur khomi sangphawlawng pahnih , Liaoning le Shandon cu Taiwan ram thlanglei Yellow rili lei ah a kalter hna i raltuk an cawng. Taiwan cu Tuluk nih ka ram a ti nain Taiwan nih cun Tuluk kan si lo” aa timi ram an si i, US nih Tuluk ral in a venmi ram hmete a si. US cozah nih hriannam thatha a zorh hna i, a runvenmi ram a si. Tuluk cozah nih Taiwan cu ralkap thazang hmang in a laak sual ahcun US he iphomh dawh an si.

New York khua cu thla 2 renglo lock down an tuah caah tlanglawng lam le vawlei tang in zu [cannibal” rats ] tam taktak rawl kawl ah an chuak i tih a nun tuk caah Centers for Disease Control and Prevention (CDC) nih ralrinnak cathanh an chuah. Rawldawr vialte le eidin dawr vialte thla hnih renglo an khar caah zu pawl an rawl ram caah atu bantuk in tihnung in a chuah hi a si lai tiah an zumh.

By Chuncha