(US cu Russia sinah a mualpho cikcek. Hngakchia deh in a deh ko cang hi teh)

USA i coronavirus nih a tlunhmi hna mizaw pawl an thawdawp bawmtu seh pawl cu Russia nih a hei kuat hna. Cu seh pawl cu, US nih a phihkharmi Russia company i an sermi a rak.

US President Trump le Russia President Putin phone in an i chonh hnu in, thawdawpnak seh le a dang siai lei thlopnak thilri a phurtu Russia ralkap vanlawng pi cu Wednesday ah khan New York a vung phan. Cu thawdawpnak seh pawl cu Ural Instrument Engineering Plant nih an chuahmi a si, tiah Russia state TV nih a chim.

UPZ hi Concern Radio-Electronic Technologies (KRET) nih a tlaihchihmi company pakhat a si i, Russia state Rostec riantuannak phu ah ai telmi a si. KRET hi 2014 July tein khan US nih a phihkharmi company a si i, hi company he business a tuahtu pumpak minung tiang zongin a phihkhar chih hna.

Tutan i thawdawpnak seh an kuatmi a sernak man hi Russia nih maw a liam, asiloah US nih dah, ti hi theih a si rih lo. Sanction kan tuahmi nih hin siai kong a huapchih lo, tiin US administration official pakhat nih Friday ah khan a chim.
US nih hin ramdang sinin a herhmi siai le thilri kan cawk ko. Russian Direct Investment Fund hi cu an leiba le an business phihkhar a tongmi hei ai pehtlai. Cucaah, siai lei an kan bomhchanhnak hi zeihmanh an sengmi a si lo, tiin a chim.

Crimea cu Ukraine kut in a chuh hna caah le, eastern Ukraine lei ah Russia leitang ralhrang pawl a dirkamh hna caah, 2014 ah khan US nih a cungah phihkharnak a tuah hi a si. 2016 US president thimnak hnahnawh na pek, cun 2018 ah Britain ah sungthoh Sergei Skripal zong thihsi in na thah caah, tiin a cungah phihkharnak an tuah chap.

Russia sinin siai a cawknak kong cu Wednesday ah khan US State Department nih a chim ko nain, company le sanction kong a chimchih lo. Cu bak lo cu chimchapnak nawl ka ngei ti lo, tiin Russia i US embassy lei nih an chim.

A Man Kong An Buai
Russia sinin kan cawkmi siai le thilri pawl hi a tha bakmi an si i, caantha a um chung paoh cu nifatin an sinin cawk ka duh ko, tiin Trump nih a chim. Siai man hi Russia nih a zatceu, US nih a zatceu, tiin an liam rua. Asinain, nehhnu ah cun Trump cozah lei nih an chim ningah, US lei pek viar in an chim than.

RDIF lei nih an hun chim than ve mi cu, si man a zatceu cu kanmah Russia lei nih kan liam, ti a si. Cu kongah Washington lei nih cipkhap an ti rih lo. Trump cozah belte nih cun a kuatman vialte cu US nih kan liammi a si, hnarcheu cu kan thawh ve ko, tiah Russia nih an chimmi hi a hman lo, tiin an chim.

Puichimhnak an ton lio ah US hi zeiti tal in bawm ve hna u sih law a tha lai, tiin an zawnruat bu tein a tubantuk cawlcanghnak kan tuahmi cungah biahalnak a phunphun an chuahtermi hi cu lungrawk bak a si, tiin Russian Foreign Ministry spokesowman Maria Zakharova nih a chim.

US ah thawdawpnak seh an herh a si lo mai? Nan duh lo thiam ah cun kan i kirpi than ko lai ta, tiin a phomh ve hna.

Rostec nih hin tutan thawdawpnak seh hi a chuah i, kanmah ram Russia zongah coronavirus do dingin heh tiah cu thilri cu a chuah. Russia nih kan chuahmi thawdawpnak seh pawl a herhmi ram dang kan hawi le hna sin kuat khawh cu kan President Putin le a cozah nih vanthat le caantha ah dawkaw an chiah cu, tiin a chim.

#Reuters

By Chuncha