US president Donald Trunp nih G7 i tel dingin sawm chap ding ah a chim mi ram lak ah Russia a telve cu UK PM le Canada PM hna nih an duh lo tiah an chim.

Theih cang bantuk in june thla ah G7 ram hna meeting neih dingin timhtuah nak cu Trump nih September thla lei ah siseh tiah a ti than i, mah ahcun Russia, Australia, South Korea le India hna cu sawm chap dingin a duh nak kong a chim i, Russia tel ve ding hi ram pahnih PM hna nih an duh loh.

Russia nih hin Crimea ram a tuk hnu 2014 khan G7 ah hin telh a rak si ti lo i, ai tel lio ah khan G8 ti an rak si. Canada Prime Minister Justin Trudeau nihcun mah kong hi chim in international rules and norms’ tihzah lo tuk in a cawlcang i, G7 in chuah mi asi i, hlawt mi dirhmun ah hin a um peng ding asi ko tiah a ti.

UK Prime Minister Boris Johnson biaphuang tu nih cun Russia a rak i tel ve nak dingah ruahnak chuah mi cu veto asi lai, Russia nih hin mi doh le kah hi a donghter lo asi ahcun hi bu chungah ai tel ve ding hi cu zeitik hmanh ah rem ka ti kho lai lo a ti ve fawn.

UK le Russia hi 2018 ah Salisbury, England i Russian spy thih nak kongah khan an rak i hmuthiam ti lo i, Russia nih hin UK hi nerve agent hmang in an spy thah ah hin a rak puh mi asi.

Pathian ni ahkhan Trump nih Russian President Vladimir Putin cu phone in G7 ah tel dingin sawm a duhnak kong a rak chimh cang i, White House lei nihcun Russia tel in G7 summit tlamtling tein neih ding ah timhtuahnak neih asi nak kong an rak chim cang i, a tu bantuk in UK le Canada nih Russia telve an duh lo asi ahcun zeitin dah an kal te lai timi theih khawh asi rih loh.

G7 summit hi kum chiar tein neih asi i, global governance kong, climat change, security le economy kong hna cu an ceih tti tawn hna.

 

By Chuncha