REV. DAVID LAH KONG AH HMUH NING APHUNPHUN

Kawlram evangelist minthang Rev. David Lah tlaihkhih asinak kong cu a linsa ngaimi ah ai cang i hi kong ahhin atlangpi in hmun ning phun thum in a um.

1. RAMDANG KHRIHFA HNA HMUH NING

UK ka hawile nihhin a konglam hi an ka hal tawn. “Jesuh a zummi cu Coronavirus an ngei kho lai lo” tiah a timi cu tlau pei a si cu tiah an ka ti tawn. US lei news le online i a ummi news tampi zong nih hi a chimmi te hi a langh ter duh ngai. “Christians are immune to Coronavirus,” siad Rev. David Lah, tiah ca an ttialmi tampi kan hmuh. Cucaah ram dang miphun pawl nihcun David Lah hi kalsual, cawnpiaknak hman lo ah an chiah.

2. ZUMLOTU HMUH NING

Kawl miphun nihcun Rev. David Lah cawnpiaknak ah ai telmi Jesuh a zummi cu Coronavirus an ngei kho lai lo a ti i amah nih a ngeih ve ti an theih tikah Khrihfa zumhnak hi phun dang ngai in a ruatmi an um. Khrihfa zumhnak hi adik lomi cawnpiaknak ah a ruatmi kha an karh chinchin. Cun, David Lah nih a tuahmi pumhnak in zawtnak a ngeimi hi 100 renglo an karh ti asi tikah a cungah an huatnak hi a karh chinchin. Kawlram i zawtnak a ngeimi ah 55% hrawng hi amah ruangah a karh ti asi caah an lung a faak tuk. Cun a cawnpiaknak thawngin zumlotu tamnawn Khrihfa i a rak luh bal ca zongah a cungah an ngaihchiat hi asi fawn ttheu lai. Cucaah hi hna nihcun David Lah cu ram hrawktu, virus karhtertu ah an ruah.

3. DAVID LAH A RAK UAR MI HNA NIH AN HMUH NING

David Lah a rak uar ciami Khrihfa hna nihcun David Lah tlaih a ton hi a palh ruangah asi tihi an chim duh lo. Kawl cozah nih Khrihfa an kan rem lo caah asi titehna, the mipority, mitlawm kan si caah an kan nehsawhnak asi titehna, Pathian sunparnak caah asi titehna, Pathian nih thong chungah a sunparnak ai langh duh caah Pathian nih a hruai titehna in an chim ve. Acheu nihcun Jesuh an tlaih lio he khan an tahchunh. Palhnak a ngei lo a timi zong an um. Thawngtthabia a dirpi ruangah tlaih a ton hi asi ko an ti.

Keimah pumpaak nihcun ka zaangfaak, ka dawt, thla ka cam piak. Pathian nih hmang tthan ko seh ti ka duh.

Credit: Aung Myint Thang

By Chuncha