Doh ti mi biafang chung ah soisel hi aa tel bak. Asinain soisel poh ah doh a um lo. Soisel kan ti mi cu tlamtlin lonak kha langhter, thangchiat le soisel deuh khi a si. cucu tuanvo ngeitu hna nih tan bia tak deuh in an lak khawh nakding ah a biapi ngai mi a si ve.


Doh ti mi sullam chung ahcun mi dang ca that lonak thil tuah, mi dang tei duhnak le ruahnak tha lo, tuah sernak tha lo aa tel. Doh cu kan ral hna caah hman deuh mi a si. Cubantuk in Myanmar ram chung ramkheel hi a hliah le caang hmanh hngalh khawh a har lio caan ah Democracy zauk phung he aa naih deuh mi Party nih teinak an hmuh tik ah a doh in doh hlah usih, soisel le thangchiat cu a phung zong a si i a herh zong a herh ve tak ko. zeicatiah tuanvo ngeitu hna nih zuamnak ngan an ngeih chin khawh nakding lam pakhat a si ve.
Nihin Kan ram chung Party hna pakhat le pakaht cung pehtlaihnak zoh tik ah lung a tha lo ngai. Party cu i zuam cawh phung a si. Mipi ca kan hngalh mi le thil ti khawh mi aa khah lo caah party poh cu i zuam cawh phung a si. Kan i zuam cawh tik ah ral doh in i doh awk a si lo. Zei he dah kan i lawh awk a si ti ahcun bawlung chuih zuam bantuk in i zuam awk a si. Bawilung chuih zuamnak cu teinak hmuh duh a si ko nain team khat le team khat i doh a si lo. i zuam a si. cu bantuk i zuamnak nih i dawtnak le i hawi kawmh khawhnak le khua le ram min a that ter.
Nihin kan ram ramkheel theu ah van kir ko rih usih. NLD hi a zuamcawh tu si loina dohtu Party le minung kan tam deuh.
NLD hi a doh in an doh ko ti mi a langhnak cu, Miphun Party nih NLD cung ah kan hman mi biafang, ICJ biacaih zung a kal lio ah lawmhnak in a khat mi, Upatnak roca a hmuh mi an chuh lio ah aa lawm mi, NLD cozah nih nawlngaihnak a ngeih mi a tlawm tuk ti hngal ko buin hramhram lo in sual phawt le kan ram mi chung in vawlei pi theih in kan ngeih chun mi soisel a ton caan hmanh ah dirpi nak thin lung ngeih lo in ramdang le miphun dang hna soiselnak cung ah kan lung aa lawmh mi hna hi dohkalh tu taktak cu kan si.
kan ram chung ah i dohnak nih zei a chuah pi lai lo, i zuan cawhnak nih teinak ngan pi a chuah pi deuh lai i mipi caah hlawknak zong a um deuh lai. (By: Rolian)

Note, Hi ca hi The Voice of Democracy hngalh pinak in kan post mi asi,,, midang nih copy than ngah lai lo.

By Chuncha