Atu lio kan farnu USA ah ti in a kan pam takmi thawng nih a ho poah kan lung a kan lak cio, hi thawng a theih mi nihcun ngaihchiat tuar lo kan um hna lo, duh a nung saling i hi bantuk thawng kan theih cu ngaih a chia hringhran. Kan farnu USA ram Kansas City tiva ah a pam mi Rebecca Van Sui Par (Kum 11) cu nihin ah khan an hmuh cang tiah thawng theih asi. Anih hi Zarhte Ni ah khan tiva ah a pam hi a si.


Chungkhar he tiva an kalnak ah Bawlung tiva chung char dingin a kal ah tihrah nih a dawp i an chanh khawh ti lo hi asi tiah Kansas city lei thawng zamh Fox4KC nih a tial. Van Sui Par hi Kansas city um Lutuv Khrihfabu chungkhar asi. Anih hi hlasak a thiam mi minote asi. Khrihfabu le chungkhar sahlawh nih an tlaihchanmi nute asi. Mah tihin ruah lo tuk in a kan kaltak caah hin USA um mi Lautu mi hna dihlak kan ngaih a chia hringhran ko. Tan taakmi chungkhar hna Bawipa Pathian nih rak hnem hram ko hna seh. Credit: Salai Biak

Relchap Than< Chungkhar he zaangdam tein i dinhnak caan nuam tein an hman ṭi lio hna caan ah ruah lo tuk in a tu bantuk thil hi an ton mi asi. Kansas City Emergency hlawmtu ṭuanvo ngeitu pawl, Fire Department lei nih August 23 zaan tiang ah a ruak cu kawl len asi nain an hmuh kho rih lo.

Chungkhar cu ngeihchia lung sivang in an tuar lio asi bantuk in a rau hlan ah Rebecca Van Sui Par cu hmuh kho siseh law tiah ruahchan asi. Nute i a Pate asi mi Pastor Dawt Uk nih cun ngeihchia lung kuai in cu a far nute ti ah a tlaknak hmuh cu a va veh peng ko. “Kan ngei zungzal lai, a rau hlan ah hmuh than kan duh ko ee” tiah a Ta nih cun a chim.

Assistant Fire Chief, Scott Hawley nih chimnak ah cun “Nute le a chungkhar cu tiva kam ah caan an va hman khi asi. Cu lio ahcun lentecelhnak an pumpaluk kha ti chung ah a tla i cucu Rebecca nih cun a va lak. Ti tanglei tha nih nute cu a lak i a tlak behnak hi asi lai, cu ahcun a Ta le a dang pahnih nih Nute cu khamh dingin an zuan hnawh ko. “Cu lio caan ahcun Nute kha ti nih a lak caah a dang chungkhar pawl nih bawmh le chanh khawh an i zuam ko nain an ti kho lo” tiah Hawley nih cun a chim.

A bawmhtu pahnih lila zong cu ngatlai tu pawl nih an hun chanh chap ve hna i siizung ah kal pi colh an si. Sihmanhsehlaw Rebecca cu a um ti lo. “Ka khuaruah a har tuk” tiah a pa te Pastor Dawt Uk nih cun a chim. “Zeitin dah ka tuah lai ti zong ka thei lo, ka tuah kho mi cu an ca ah thlacam piak lawng asi” tiah ati. Nute ti a tlak ni zarhte zaan thok in khan zarhpi ni chun nitlak kawl asi ko nain an hmuh kho rih lo. Burmese Community zong nih chun zaan it lo in an hngah pi hna. “Duh a nung tuk mi Community le thazaan pe tu Comminity an si. Kan caah thla an kan campiak, kan ngeihchiatnak an kan tuar pi” tiah Pastor Dawt Uk nih cun a chim.

 

Nute cu hngakchia asi rih ko nain Pathian aa bochan tuk mi asi hlasak hi a huam mi asi tiin a Pu nih a chim. “Laam le kui a huam phun asi i hlasak zong a huam ngaite” tiah a Ta nih cun a chim ve. Nai te ah khan hla thar aa tuah mi aum i mipi sin hmuhsak te ding zong timhlamhnak kan ngei nain atu cu kan tuah kho ti lai lo tiah a chim chap. A rau hlan ah hmuh kho zokzok ding le dai tein aa din khonak din caah ruahchan asi. “Kan dawt, kan zohthla, kan awthlam te ka ngai zungzal lai” tiah a Ta nih cun a chim. Hawley nih a chimnak ah cun Kansas um khoika tiva hmanh hi ke in tan awk ah a him lomi an si tiah a ti Fox4kc cherhchan in theih asi. Photo: Fox4kc

Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.

Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor

By Chuncha