Covid-19 zawtnak ruangah hin mipi tampi cu thihnak an ton i, cu bantuk zawtnak a ngei lo hmanh ah Crona Virus ruangah lungre theih le harsatnak tuar ruangah thihnak a tongmi zong tampi an um ve cang. Covid-19 ruangah vawlei cung cu lockdown tuah asi dih i, Thailand ram zong lockdown an tuah mi cungah mipi nih tuar khawh lo in nunnak a lami zong an um leng tiah theih asi.

Thailand ramah Rayong, Pluadden khua I khuasa Mr. Suphakit kum 34 cu a nupi kum 31 Phanida cu a nghawngah a rep i a thi cawlh tiah theih a si. A pasal zawng cu a nupi a thih tlompal minute rauhlo teah a mah tein athah ve tiah theih a si. April 22 zan akkhan an chung te nih cun an nupa phone ah an chawn veve hna i an phone an tlaih l;o veve caah April 23 ah an inn ah an va kal hnawh hna i. An nupa cu thih in an chuah hnawh ko hna. Police pawl nih cun misual nih an thah mi hna an si sual maw tiah an zoh fel tikah an innka chung vialte cu a lock dih caah an innka hi an poah I an lut hna.

Misual nih an thah mi hna cu a si kho lo hrim hrim tiah an chim. A nupi a hngilh lio i hri in a nghawngah a rek i amah zong minih meithail puak thawng theih lo ding in chantling ah alu a chiah i aa kap ve mi a si tiah an chim hi a si. A nupi i a u nu nih a chim ning ahcun an nupa in Electronic company ah riantuan mi an si i,  an hlawh hi a that tuk lo veve caah phaisa an ngei chun mi te cu thlakhat chungah an ei dih nak kong le phaisa cawi kan herh ko lai ti a chimnak kong a chim i, kanmah zong phaisa a kan cuai ve nain harsa mi kan si ve caah phaisa zong kan chuah piak kho ve hna lo hmurka tu in ka hnemh hna i hi tiang dirhmun cu an phan lai tiah ka ruah lo tiah a chim.

Hi hi a cozah nih lockdown a tuah ruang i ei awk dinawk an ngei lo ruangah hi tin thil a cangnak hi a si. Covid-19 cu mi cheukhat caah cun thihnak le harsat tuar hi a si ko. April 25, 2020

Ref: ZoNews

By Chuncha