ZIANGAH IN UPAT LO?
Yangon le Magwe Ramthen tiangin Chin party kan din ti an theih veten, “Ziangah Chin Ramkulh ah din men loin kan Kawlram tiang nan party din in ram in nawr” tin Kawl party hotu hrekkhat in totlang thunuam relnak ah Capoh thungai in in sim.

Ka simve mi cu:
“Nan Kawl Ramthen (regions) sungah Chin party kan din nan Ramthen sungih um Chin Miphun lawng sungtel (member) ah kan la. #Nannih cu Kawl um lonak kan Chinram ah nan party nan ra din ih, Chinmi members ah nan lak ruangah, Chin lakah thenawknak le hmuhsual awknak tiang a suah phah.. Kawl le Kawl party rinsannak lungthin nei an suak phah ih hnamvai le hnamhlo lamzin zawh an um vivo.”

Annih in:
“A singai e. Na simmi cu a dik thei ko. Hmanseh, Kawl kanmah rori ra in Tlangram (Chinram) ah kan party kan hung din lo; nanmah Tlangmi (Chin) rori Yangon kan party hmunpi ah ra in Chinram ah party hung din uh, tin in sawm ruangah a si,” tin in sang. #Ṭong ding ka thei nawn lo. In neh. Ka lungsung ah riahsiatnak a suak.

Aw! Hi tlukin maw Phun U sive Chinpawl in hnamdang rinsannak kan neih ih mah le mah rinsan awknak kan tlaksam zo.. ti ka ruat. Ka awm ka cum. Ka thin a tur in a tur.
~~
Kan thurel kan peh vivo. In sim bet mi cu:
“Kanmah Kawl party hi 40 lenglo kan um zo. Tlangmi party nan komaw vivo nan kannih Kawl party cu kan ṭhenaw deuhdeuh. Kan Ramthen 7 lawngah party din in cuhaw sehla party kan tam tuk, lal cuhawk kan hmang tuk fawn ih party pakhat lawng ih Cozah din thei kan um lo ding. #Zoh hnik awla, nanmah Tlangmi Ramkulh 7 ah kan Kawl party thih ngam ih dinpitu le bawmtu nan tam ruangah 2010 le 2015 ah party pakhat (USDP le NLD) lawngin Rampi Cozah kan din theinak a si.”

An simmi 100% a dik ti ka theih ruangah mak tiin ka cal ka dawm, awn ring loin ka huiha ruangro!

Aw! Kawl lal cuh awknak men ah Tlangmi (Chin) kan rak buai ve rero ih an Kawl lakih kan uar deuh miin in uk theinak dingah lal Tohkham ah kan toter rero men maw! .. #Uktu lungput si lo ukmi lungput nei men fang maw kan rak si ti ka ruat. .. Lukun in khua ka ruat cuahco.
~~
Ka topi mi Chin hotu pakhat in;
“Nan simmi a dik. Mak ka tive mi cu Chin hmanah mifim, Bawi Upa le ca thiam sang timi rori hmanin nan Kawl party thih ngam in lo ṭantu an um laiah, nannih Kawl Miphun hrimhrim cun mi menmen leilet hnaṭuan rori hmanin Tlangmi party vote pe duh pakhat hman nan um lo.
#Thimnakah, Chin thawn um tlang kumkhua Kalemyo ih Kawl mi men men rori hmanin Chin party vote an pe dah lo. Hihi in nehnak, mai miphun cu (party tiangin) dinpi nan thiamnak, hnam Upa nan sinak langtertu a si hmang,” tin a hmuhdan a sim ve.

Kan rualpi Kawlpawl cu an lungkim zet. Asinan an lakih pakhat cun:

“Umhrih hnik uh. Kawl vek thotho in lungput nei Tlangmi ah nan um ve hokhaw. Thimnakah Zakhaing miphun hin anmai Zakhaing party bak Hnamdang party vote an pe lo tluk a si ti 2010 le 2015 ah kan hmu. Shan khal cu thotho. Kawl party vote petu cu rel tham lo an si,” tin a sim.

Aw! Tlangmi 7 lakah Kawl in anmah tlukih mai miphun ṭan ngam Zakhaing le Shan an um ve ti an thei ih tawk deuh lai. Ram thu ah thurelpi tlak taktak ih an hmuh mi cu Zakhaing le Shan lawng maw an si. Annih cu Kawl in an lungsung ten an upat, an zah. Kawl lakah mithmai an nei.. Chin in kan va tluk lo.. hmnnn.

Um thei loin: “Hiruangah maw Zakhaing cu nan hua in nan do bik a bang nan kum tin paisa (budget) nan pek mi khal Kawl party 100% tluk lo ṭantu Chinram hnakin a tam sawn. A tlawn in nan tlawn a rak si hi..” ka tive. An hni lem lo!
~
A fiang tuk mi cu: Miphun khat le khat do awk le zuam awknak ah hriamhrei hnakin thinlung hi a rak thupi deuh, Hnamdang in kan lungput umdan hi an rak zoh, an rak upat, an rak ṭih deuh.. ti hi a si.
~~
Tuisi talin, Ukmi (sal) lungput maw..Uktu (Bawi le Lal) lungput kan nei sawn ding?

Kawl, Shan le Zakhaing cun Uktu lungput an neih thluh zo ruangah, an lakah a cak sawn an um hrih nan thinlung lam ah nehtu cuang an um lo. Anmah le Anmah an zah aw, an upat aw! Chin hnakin mithmai an nei, kan tluk lo. Dawt an um. An dinhmun tal ziang tikah kan thleng thei ve ding?
~
Kan tokhawm ban zik ah tlawmlak thil thu ah hitin ka sim hai:

Kawl hotupawl in Democracy le Federal nan duh taktak asile, April 9, 1947 ih hrilawk ah, Aungsan ih party AFPFL in Tlangram ah party din in an cuh lo vekin tui hnu hrimhrim ah Tlangram ah Kawl party din in cuh ve nawn hlah uh. .. Tlangmi mipi tam sawn in anmai Tlangmi party sungih an hriltlin mi in an Ramkulh cio ah Cozah din dingin ṭan lakpi sawn uh (2015 ih mipi tam sawn hriltlinmi Zakhaing party Cozah nan dinter lo tla hi democracy le Federal dan kalh rori a si).

Beidawnnak thu rel a sinan beiseinak sangpi nei in kan inn lam panin ka tlung.

Credit: Pu No Than Kap

By Chuncha