Pu Chan Let kum-86 ( Rev Dr Hai Vung Lian nupi pa ) nih January 18,2021 Monday (12:06 pm) ah mual a kan liam taak. January 19,2021 Tuesday (10:00 am) Yangon Yewai Thlanhmun a ruak vui nak ah ka va kal kho ve. Tantak mi chungkhar an ngaihchiatnak Pathian tu nih hnem ko hna seh. Credit: Lian Iap

Image may contain: one or more people and indoor

Dinfelnak: Fir chom in tang hra a aungmi nih taang hra a awn caah Pathian sin ah lawmhnak a chimmi cu Pathian, ca ka firnak ah na ka bawmh i thluachuah na ka pek caah ka lawm ti he aa khat. Thilthalo a tuah ruangah hlawknak asiloah miaknak asiloah teinak a hmuh caah Pathian sin ah lawmhnak a chimmi cu Pathian, thilthalo ka tuahmi ah na ka bawmh i thluachuah na ka pek caah ka lawm ti he aa khat.

Thatlonak a tuah ruangah hlawknak asiloah miaknak asiloah teinak a hmumi cu va hngar hna hlah. A lawmh zong va lawmhpi hlah. Thatlonak thapetu na si sual lai. Bawipa ̣ttih bu tein tlawmte ngeih hi tampi ngeih i hnahnawk ngai i um nakin a ̣ttha deuh” (Phungthlukbia 15:17). Cucaah Bawipa ttih but te in sungh kha teinak hmuhnak ca Bawipa duhlomi tuah nakin i thim deuh.

Dinfelnak kha fakpi in i tlaih. Zeicahtiah “Miphun a lianhngantertu cu dinnak a si, sualnak cu zei miphun paoh caah ningzahnak a si” (Phungthlukbia 14:34). A ngaingai ti ahcun, vawlei thil ah teinak asiloah miaknak kan ti tawnmi hi thlarau thil ah sunghnak a rak si tawn. Vawlei thil ah sunghnak kan ti tawnmi hi thlarau thil ah teinak asiloah miaknak a rak si tawn. Credit: Rev. Biak Lian Vel

January 20, 2021 Ah Joe R. Biden Cu Us President Ah Lak Asi Cang Lai.Trump Nih Nuclear Control Briefcase Cu Florida I Mar-A-Lago A Inn Ah Kalpi A Timh.  Lai Phungthluk bia bang ” Ram Zu nih Inn Zu a thawl” an ti bang, a duh na lo bu in President Donald J Trump cu January 20,2021 Zinglei ah Whitehouse in amah umnak Innpi Mar-a- Lago resort, Palm Beach, Florida ah a thial cang lai. Hi amah Innpi ah hin a nupi le a fanu le nupa, Ivanka Trump le Jared Kushner, an fapa hniang Baron Trump pinah Whitehouse Staffs le Sihne pawl mi zeimawzat nih an zulh ve lai.

January 20,2021 chun Suimilam 12:00 noon bak te’ah Joe R. Biden le Ms.Harris cu 46 US President/ Vice President ca’ahah Whitehouse i West-court ah biatiamnak an lak lai. Tutan hi mi tlawmpal te lawng VIP – 200 hrawnghrang an i tel khawh lai. President hlun George W Bush le Vice-President Mike Pence an i tel lai na’in Ex- President Jimmy Carter te nupa cu an tartuk ca ah an i tel kho ti lai loh.

President Trump cu tel ve a timh lo ca’ah White House in 20/01/21 Zinglei 9:00 am ah US Air Force One in Joint Airbase Andrew ah US Army nih Red Carpet phah piakin Meithalpi zun 21 kahnakin President thlahnak an tuah piak dih hnu’in amah umnak Innpi Mar-a-Lago resort, Florida Palm Beach ah a kal cawlh lai.

Hi a kal nakah US President nih an kalnak pohah an i put pengmi” Nuclear Control Briefcase” cu Joe Biden sinah a pe duh rih lo i, Florida a Innpi ah a kalpi chih lai.Hi hi US President an i thleng tik poh ah an i pek tawnmi ( First Important) asi na’in, Trump nih a pe duh loh. Amahbelte Vice- President Mike Pence nih Whitehouse Military Office i Second Nuclear Control Box kha Joe Biden kutah chanhnak a nei lai i, President Trump sin ummi Control Briefcase kha thah ( Deactivated) an tuah piak te lai.

Tu bantukin Kum 100 lengah khan, President thar lawmhnak ah a telpi duh lomi an rak um ve. 1801 ah John Adams nih President thar Thomas Jefferson. 2.1829 ah John Quincy Adams nih Andrew Johnson. 3.1869 ah Andrew Johnson nih Van Buren. Cun, 4. 1974 ah khan Richard Nixon nih Watergate ruangah Vice-President Gerald Ford kha Bible a pek ta i,helicopter in azam tak deih. 5. Cupinah 1877 ah Rutherford B.Hayes le 1921 ah Warren G.Harding hna nih Flu Zawk nak ruangah anmah te’in(Privately) President biatiamnak an rak tuah i, hnu deuhah Mipi hmai ah an tuah tha’n.

A zeipoh va si ah 2021, voi 46 nak US President nak cu Joe R. Biden an thim cang ko i, mi vialte lung sak thanuam te’in cohlan khawh i zuam cio ko hna usih. Donald Trump lei Republican Party pawl zongnih a ruahhlanah Joe Biden cu Impeachment tuah cawlh an i tim cuahmah lio asi ve ko cuh.. ( Thlacamnak he) By MC Biklian

Miphun Damnak: 16: Thatthut harnak (piahtana) lonh ning cang (phisinnak) hi thukpi in kan ruah cio a herhmi a si. Tuanbia an kan chimhmi Tenglam kong te hi hun ruat cio hmanh u. Voi khat ah Tenglam cu a paw a ttam tuk, a tha a uai dih. Theipi kung tang ah a zau. Theipi a hmin mi a hmuh ko hna nain, a tha a thu tuk i ttawh a zuam lo, a zau chih ko. Vantthat ah zulei pakhat nih theipi hminmi cu a rak tlanh. A ei lio zong khi a hei hmuh ko, a hngar pah ngai.

Zulei nih theipi hmin mi a ei mi pum cheu bang kha a thlak sual i, a ka a rak i aan mi Tenglam ka chung ah a rung tla. Pu Tenglam cu a tha a thut tuk caah a khai a huam rih lo ti a si. A mak ko nan ti cio ko lai. Kannih Chin miphun hi Pu Tenglam he kan i lawhnak a tam liangluang ve ko lai. Kan ka kan i aan-cia mi chungah hin rawl an rak thla cawk te lai lo, a cheu le bang cu rawl khai pah hmanh ah a phunzai ngammi kan um pah fawn i, zeican dah kan sining nih a kan kalpi khawh hnga? Fimkhur tein, ciammam tein khua kan ruah cio i thathut zawtnak hi kan doh a herh ko.

Fale fimthiam cawnnak caah phaisa kan sianmi le, inn le lo caah maw, mawttaw cawknak caah maw phaisa kan siannak le kan huamnak hi aa buaktlak lo ngai. Lung thawh in vok thah, puai tuah, le sopawt phun in phaisa kan sawksam ning zong hi, kan nunphung cheukhat hna kha kan kherhlai tthan, fingrilh in kan rilh tthan a herh ko rua lai. Kawlram cozah nih phaisa hmuhnak le hmannak kong ah ning (system) ttha mi a kan ngeih piak kho lo, cucaah kanmah te in kan i tuaktan a herh. A tha a thumi kan thluak, cirik nih a ei dengmi kan kut le kan ke pawl kha taat tthan an herh. Ahohmanh vak sawsawh hlah usih, biasawng tlawrh kha huam tuk hna hlah usih, Covid-19 pulrai lio zong a si i vah sawsawh kha ngandamnak lei ca zong ah a ttha bak lomi a si kha philh hna hlah usih.

Israel miphun nih cun an ram, thetse ramcar bantuk a simi kha an par ter khawh dih. S. Korea ram, chengpalang le lunghrawkhrawl in a khatmi ram cu vawlei cung ram rum ah an chuahter khawh ko. International zulhphung nih nikhat sml 8 lawng rian ttuan ding kha annih cu aho hneek lo in mah lungtho tein nikhat ah a tlawmbik sml 10 pei an ttuan huam cu! Shan nu pawl nih an chimmi cu “Namtong pakhat ka pe, ka chungkhar cu fawituk in ka cawm khawh hna lai,” an ti ngam. Mindat peng mission rian kan ttuannak Phoih khua hin Malaysia ah kuli ttuan ding in an fale mino pali/nga an kale ve nain, an nu le an pa nih an cah hna, Tawlre ba an cinpi hna i kum khat ah a tlawmbik ting 50 an zun khawh i an nun ning a thlen ngaingai hna. Thathut hi sual phun khat pei a si ko hi tiah a ziah kan ti khawh ve hna lo? Sifah ral kan do lai tinak in cun hlangfang deuh in, thathut ral kan do lai ti hi hmaan deuh dawh a si.

Miphun Damnak: 17 Minung nih zeidah kan herhmi a si ti hngalh khawh hi a biapi tuk. Kannih khrihfa zumtu hna nih cun Pathian bia hi, cu kan herhmi hngalh khawhnak ding caah a hrampi a si i fim a kan chimtu, lungthin a kan cheutu a si tiah ka zumh. Minung nih kan duhning le kan duhmi paoh hi hei hmu kho usih law, ttuanvo la kho fawn hlah usih law, zeidah kan can hnga? Zei huah dah kan huah hnga? A ngaingai ti ahcun, kan herhmi hi kan rak hngal taktak lo. Dornak inn ngeih hmasa maw a herh deuh, fale cacawnnak dah? Inn hnih thum pi hoi hna hei ngeih ko bu in nupi le maw pasal le maw, fale hoi hna zawt ngai ttung i Yangon/Bangkok kal i thlawp a herhnak hoi hna hei hngalh khawh fawn lo zong hi, kan sining a si kho ko. Zeidah kan herh taktak mi a si kha Pathian duhnak kan kawlnak nih a kan chimh khawh (cf. Salm 127:1-3).

Kan duhmi cu kan hngalh khawh ngai, thli lak innsak (saih-ku-yin) phunphai hi cu kan duh ngaingai. Duhnak ngeih khawh hi ruahchannak kan ngeihnak phunkhat a si ve i a sual hrimhrim lo. A tthatnak a tampi. Asinain kan herhmi i theih lo bu in, duhnak lawnglawng ruat in cu duhnak nih kan nun a iap tuk lo ding kha a biapi tuk ve. Duhnak faktuk nih an nun a iap mi hna cu, ningcang lo thil an tuah ngam ko, lamphawk a simi kip kha an tuah, an zulh ngam dih. Khrihfa sinak zong kha zei ah an rel ti lo, nunzia rawhnak zong kha a poi ah an chia kho ti lo.

Tuah lo ding, cozah hmanh nih a khammi thil kha tuah a si, hihi Kawlram kan sining hmanthlakpi a si tik ah a poi taktak ko. Miphun damnak taktak caah cun, a hmaanmi duhnak le herhnak hngalh khawh le tuah ttuan huam hi a si deuh ko lai tiah ka ruah. Cucaah thla kan cam tik ah “Maw Bawipa, zeidah kan herhmi a si kha na Thiang Thlarau in kan hmuhsak law lungchin kan cheu ko, Nangmah cu kan in duh bikmi na si khawh zungzalnak lai zong thazaang kan pe ko sawh,” tiah nawl ko hna usih. By Lai pek Lian

By Chuncha

Leave a Reply

Your email address will not be published.