Coronavirus he pehtlai in Washington DC ṭuanvo ngeitu pawl nih thinphannak an ngei ko bu ah zarhte ni, July 4 US luatnak ni cu hlunghlai ngai in tuah dingin President Trump cozah nih an tawlrel. July thla ni 4, Luatnak ni puai he pehtlai in US Secretary of the Interior David Bernhardt nih phangphang le meipar dawh pawl 10,000 hman ding telh in vanlawng pawl zong zuang in hi Luatnak ni sunglawi cu hman asi lai tiah Secretary of the Interior nih thawngthanhnak a tuah.

Atu bantuk vanlawng pawl hman in sunsak mi cu ralkap thazaang langhternak phun khat asi I US ralkap pawl upatpeknak tiah President Trump i “2020 Salute to America” timi sunlawinak tuah asi lai tiah thawngthanhnak ah aa tel.Washington DC square ah caan hmang aa tim mi mipi pawl phawtzam ding caah hmaihuhnak (mask) 300,000 zong timh cia asi tiah ṭuanvo ngeitu pawl nih an chim, asinain hi puaizawh a ra ding mi nih hmaihuh hman ding timi cu telh chih asi lo. US Secretary of the Interior Bernhardt nih cun mipi nih hmaihuh huh ding, pakhat le pakhat aa hlat tein um ding tiah forhfialnak a tuah.

Washington DC, Mayor Muriel Bowser nih cun hi puai cu Central Government hmunhma ah tuah mi asi caah khenkham awk aum lo nain Department of the Interior cu CCD le ngandamnak lei zung nih chuah mi zulhphung pawl an zulh lo tiah a soisel hna. Cu leng ah July 4 lawmhnak puai zawh aa tim tu mipi pawl zong nih mah le inn pawngkam hrawng ah tuah ding le mibu umnak hmun pawl cu hrial ding asi tiah Mayor nih cun ati.

President Trump le First Lady Melania Trump cu White House thlanglei hmun ah Luatnak puai cu hlunghlai ngai in tuah an timh. US ram khua ngan tamdeuh ah cun coronavirus ral ṭih ruang ah sunlawinak puai an tuah lo bantuk in phangphang le meipar dawh pawl zing cu tampi thlah lo in tu kum US Luatnak ni cu hman an tim.

Ref: VOA

Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.

Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor.

By Chuncha