1.USDP nih an suaimi 2008 Phunghram nih a hrinmi in tuahmi thimnak ah ramkhel party dang an luhnak a ruang hna;1.Thimnak ah an luhlo ahcun mipi aiawh in riantuan khawhnak lamdang a umlo caah duh zong cepa duhlo zong cepa sinak in an luh kha asi.2. A chung ah luh in siamremhnak lam a um hngamaw ti asi caah Thimnak ah an luh asi.3• 2008 Phunghram ah USDA/USDP/Ralkap nih thimnak an luh zongah kanmah tello in remkho hna hlahseh tiah 25% ralkap thuthmun an pek cia. Cu pinah Parliament chungah zeilo karah kanmah chungin zukphiaktu an um sual i 75% +1 an tlin sual ahcun tiah Rampi vote pekho mi milu hnarcheunak tam nih rem kanduh timi lungtlinnak lak siseh tbk…. kha Article 436 ah an hren.4• Cu ruang ahcun NLD party nih 2015 thimnak ah 82%in teinak a hmuh i a mah party pakhat longin Cozah a ser ramuknak a kalpi i kum 5 chung a kalpi nain 2008 cu a rem kho mi chimding pipa a um lo, a ruang tampi lakah Major party pakhat duhning le policy in uknak an tlaih caah le an kalpi caah asi kho.


5• Cu nih a hrinmi cu anmah Ralkap/USDP lungtlin pilo in 2008 hi remh a ngah lo ti kha a langh caah cu remh khawhnak ding lam a ummi cu Cozah sernak ah Coalition system long asi. Cucu zeitin asi tiahcun Tlangcung mi hna thazang le Kawl rawn thazang hna fonh in Cozah ser longah i rengh le i samh pah in remhnak lam kawl kha a lam umchun asi. Cucahcun Ralkap eiruknak le kawl pennak zungzal hmunhter a timtu 2008 Phunghram a suaitu le a dirkamh tu USDP party le mah miphun sinak sangbik le cungnung ah chiah a duhmi NLD hna va dirkamh le le va tanh le khi Langak nih Awtaw nun cawn men asi kati ko hih. Cu lakah micheu nih NLD or USDP kan vote lo ahcun Chin ram ah thanchonak an kan tuahpiak duh lailo eh, Bawmhnak an kan pe duh lailo eh, cu eh.. kha eh.. tiah an chim sek len. Hiti bia a chimmi hna khi tuaktannak a ngei lomi minung ansi.

Taktak tiahcun Chin state ca i center leiin an rak kaiter mi khi Kawl nih an kan pekmi silo in kanmah Chin ram chung chuakmi ngunkhuai siseh, tlangcung ramthen hna chung in a chuakmi ngunkhuai center leiah kan apmi chung deuh ansi khih. Kawl hna ram in a chuakmi Ngunkhuai cu anmah Kawl lila ca hmanh ah an i zat velo caah cun dahkaw Tlangmi kan hmun cu an kan chuh, chanthar pensal in an kuttang ahcun an kan chiah cuh. Taktak ah Chin state caah kumpi Budget pek duhlo in kan chia hna sehlaw, Chin ram cu Union of Myanmar ram in chuah he khin aa lo lai i cucu Kawl kuttang i um nakcun i lawmh deuh ding hmanh khi kan si.Cucahcun NLD ansi ah USDP ansi ah Kawl pennak chan sauter a duh mi le Kawl miphun cungnung sinak a duhmi ansi caah anmah tein Cozah dirhter ti hna loin Tlangcung mi hna nih kan mah le ramthen ah kan miphun party nih teinak hmu ve sehlaw center cozah dirhnak ah miphun party hna komhmi in cozah ser ding hi a biapi tukmi asi. 2008 Phunghram tu hicu kan ram rumnak le ngeihnak vialte a eihmuar dih i aa rumpi mi, Tlangcung mi cungah rialdipnak le thahnawnnak a tuah mi USDP le Ralkap cheukhat fiarkhu pawl an thih dih hlan paoh cu remh a har rih lai.Credit:peng Hlawnceu

Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.

Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor.

 

By Chuncha