NLD dirhtu founders asimi hna; Brigadier General Aung Gyi, General Tin Oo, Colonel Kyi Maung, Brigadier General Aung Shwe, Captain Win Htein (atu mihuaisen NLD U Win Htein) tepawl DSA chuak Kawl ralbawi hlun lawngte an si. Daw Suh zong Kawl tangah a kan luhtertu General Aung San fanu asi thiamthiam.

Kawl le Kawl karlak i thutdenh icuh ruangah rakap in dawimi le phuahmi pawl, a phuahtu le a thawltu hna pawl lehrulhnak ah; 1988 a hun chuak i Democracy aa titermi (tuphaw aih cenghngia) lawngte an si.

Tlangcungmi hna a chanchan in namnehtu, an kut ah thisen aa nehmi lawngte, “Federal cu rampi in chuahnak asi” tiin ralkap le Kawl cheukhat hna thi a ronhtu an si. An party kalning hrim zong siseh, an hrihram in Central Uknak a uar taktakmi, Order a uar taktakmi hna rual nih dirhmi le hruaimi Party nih Tlangcungmi vialte nih kan khelmi Federal cu an kan pe duh hnga maw mu. A cian deuh sual ahcun ka ngaithiam uh; tuanbia dik asi ko. Catialtu: Ram Tin Thei

Biden le Harris nih zei ko dah an chim?; Harris hi a ka bawmtu dingah kai thimmi kongah kai lunghmuih ngaingai, tiah Biden nih tweeter ah a tial. Harris hi santlailo pate (Biden) caah tihnak ngei lo in hmai a tawntu a si i, kan ram pumpi cozah riantuan vialte lakah a thabikmi ah ai tel mi nu a si, tiin Biden nih a chim.

Harris hi California attorney general a tuan lio tein khan tleicia ka fapa Beau he naihniamtein rian a tuan bal. Bank ngan pipi an cawlcanghpi hna, riantlai mipi pawl an cawisan hna, serhsatnak kut chungin nunau le hngakchia pawl an kilven hna. Cu lio tein cun Harris hi kai uang ngai cang i, a tu zongah ka campaign ah a ka dirpi lai, ti zong ka theih caah kai uang ngaingai, tiin Biden nih a chim.

Biden nih American mipi caah a chan chung vialte tan a kan laakpiaktu a si caah, amah lawnglawng nih hin kan American mipi hna hi a pumhkhomh khawh hna lai. President dirhmun ai ngeih ah cun, America hi amah le a standard ning tein khua a sakter khawh lai. Kan party aiawh in president ai cuhmi a si i, a Vice-president tuan te piak dingin a ka thimmi cungah kai lawm hringhran. Cucaah, kan Commander-in-Chief si kho dingin zeibantuk a herhmi thil paoh tuahpiak khawh kai zuam lai, tiin Harris nih a chim.

“Kan ram hmailei a fon khawh nakhnga, a nunnak thaw (soul) kan remsiam ti hna lai i, rian a tlaimi chungkhar hna caah ral kan tu ti hna lai” timi tlangtar in Wednesday chunhnu ah Wilmington, Delaware ah Biden le Harris cu biachimnak an ngei te lai.

Ka vice-president tuan dingah nunau kai thim te lai, tiin March tein khan Biden nih a chim bal. Cu tikah, African American cung i police pawl an thatlonak kongah rampumpi cuul in duhlonak langhter a si caah, vunnak nunau nai thim ah a thabik ko lai, tiin Biden cu nolh le cip in phone in an chonh.

Kamala Harris hi mizei dah a si?

Harris hi kum 55 a si i, Democratic lei nih an chuahpi mi nominee a tei khawh lo caah December ah khan president cuhnak a sung bal cang. Cu lio i Biden he debate an tuah lio ah hin thalo in khat le khat an i ti bal. Miphun thleidannak, thenhmalnak chuahpi a duh pengtu senators hlun pawl he pehtlaihnak na tuah peng, tiin Harris nih Biden cu a rak ziah len bal.

Harris hi Oaklan, California ah a chuahmi a si i, hringtu a nu hi India ah a chuakmi a si i, hringtu a pa hi cu Jamaican ah a chuahmi a si. Howard University a kai. Hi University hi tuanbia chungah minak pawl an kai tamnak bik sianginn a si. Cu sianginn ka kai lio i ka hmuhtonmi thil pawl hi kan nunnak a hram a dirhtu bik an si, tiin a chim bal.

Ka sining ah ka tha a nuam ko. Keicu American mi ka si, tiin tluangtein a chim tawn. Politicans pawl hi an takvun rong asiloah an chuahkehnak ruangah kawm chung ah erh an si awk a si lo. Ka chim duhmi cu, keimah cu keimah ka si ko. Ka sining ah kai lawm ko. Kai lomhnak a ruang theih nan duh men lai. Asinain kei cu ka singin te ah kai lawm ko, tiin 2019 ah khan Washington Post ah a tial bal.

A caan ah cun, ciammaam tein thil kan thim tikah, thim hnawhchannak pakhatkhat fiangtein a um tawn. Ka vice-president caah cun nunau kai thim te lai, tiin March lio in Biden nih a chim tein khan Harris hi a si te ko lai, tiin ruah a si bik cang ko. Anih hi a kum zong a no, a hir a zaang, cun Jamaican le Indian cawh a si caah miphun kip an tlinnak Democratic Party caah ai rem bak fawn.

Cu lawng hlah, Harris hi national media ah an laar ngaimi a si fawn. 2019 ah khan President tiangin a rak i cuh ve bal. Cun, pakhat dirhmun tha ai ngeih rih mi cu, Biden i tleicia a fapa Beau he zong hawikom tha ngai a sibal. An pahnih ning tein hin attorney general an si. Biden hi chungkhar a sunhsak ngaimi pa a si i, tleicia a fapa le Harris an i hawikomhnak ruangah Harris hi a thimnak chan bik zong a si kho mi a si.

Campaign cu a thar in a hun tuah than lai i, tuanbia chungah avoikhat nak minak nunau Vice-president dirhmun phan in a cawlcang cang lai. A hlawhtlin a si ah cun, 2024 hrawng tal ah khin cun President cuh than khawhnak lam tha chinchin in ai ngeih te lai, tinak a si. Nihin a dirhmun hi a ra laimi kum ah Democratic Party caah thazaang a si.

A Record hi zeidah a si?

Howard ah kum 4 a um hnu ah ah, University of California, Hastings ah law degree a la than i, Alameda County District Attorney’s Office ah a rian a thok. California ah a hmasabik nunau le African American attorney general i an thim hlan ah, 2003 ah khan San Francisco caah District attorney – biaceihtu lubik dirhmun a phan.

Attorney general a tuan a hmasabik kum 2 chungah, Harris cu minthatnak a hmu colh i, Democratic party ah an arfi bantuk a vun si. Cu a minthatnak nih cun 2017 ah California’s junior US senator tuan dingin thim a si. Cu chamber chung thu dingin an thimmi minak nunau lakah amah hi a pahnihnak a si.

Ni kum kum hramthok ah khan, Oakland ah ai pummi minung 20,000 lenglo hmaika ah President cuh dingin biachimnak le cawlcanghnak a tuah. Asinain, healthcare hei ti bantuk key policy kongkau ah a hram in a coih khawh ti lo caah, President thimnak cu a sung.

Cun, debate a tuahnak kongkau zongah thitha in biahal mi a leh khawh lo caah le Biden doh le kalh phunphai lawng a renh caah a sunghnak hi a si fawn.

Cun, amah party kong lawng tamtuk in ai hmaithlaak. California Department of Justice ah special agents a tuanmi hna nih body cameras (takpum ah i temmi camera) i ken hna seh, tiin a chim caah mipi an lung a la kho hna lo.

“Harris hi cop (palik) a si ko hih” tiin campaign a tuahnak ah tlaang an aupiak cang i, cu tikah libral pakka a si mi Democrats pawl an lungthin laak a timhmi vialte cu an sawksampiak dih ah a cang. A ngaingai ti ah cun, Democrats nih teinak an hmuhnak dingah cun police pawl an thazaang hi a herh ngaingai mi a si ve.

Lehnak teh zei a lawh?

Harris hi a diklo mi tuanbia tor le cheng chim a hmangmi nu a si. Thil biapi kongah san a tlailo ngamsam. Santlai deuh seh, ti cu duh cio a rak si ko nain, a donghnak ah cun 2% hrawng lawng hmaak a hmu khah. Nan theih cio ko khah. Biden nih Harris ai thim hi cu ka khuaruah lei a har. Tuan i Democratic lei nih ai ngeihmi biapihla debate lio ah khan Biden caah Harris hi mi lurii le tihnung zong a rak si bak. Biden zeiah a rel lo taktak tu a si i, minung zeiah a kan rello tut him cu a um bal theng lo mi thil a si, tiin President Donald Trump nih thawnglatu pawl sinah a chim.

A tu bantuk i Harris an thim ruangah, Biden hi Democrats pawl lila a kaptu ding kuanfang pawl chiahnak zenthongbawm bantuk ah an canter ko hme cu, tiin Trump campaign a tuantu pawl nih an chim. Harris hi a rian caah ai timlaam cikcek cang. Anih hi kan Constitution a kilvengtu rian ah a lu ai hlinh bakmi a si i, thil ningcang tein um kho seh, ti a duhtu hna caah hmai a suangmi nu a si. Nihin hi kan ram caah ni tha a si. A tu ah kal tho u sihlaw teinak hmu hna u sih, tiin Obama nih a chim.

By Chuncha