Myanmar ram cu lungrethei chin lengmang dirhmun a phan cang. Kawl ralkap tuanbia zoh tikah, ram mipi duhlonak langhtermi nih an lung a thleng kho bal rih hna lo; mipi thisen tu a luang tawn! Ramkhel lei thiamsang cheu khat nih, “2021 cu hlan lio deuh he cun aa dang tuk cang” an ti cio i cu aa dannak theipar cu a um phum te hnga maw, ti te khi kan i ruahchanmi cu a si.

Image result for min aung hlaing

UK nihcun “Myanmar ralkap uknak hi khirh tthan khawh a si ti lai lo. Zeicatiah vawlei cung democracy ram ngan bikbik hna nih ralkap uknak khirhter tthan ding tiang in an tuah khawhmi zeihmanh a um ti lo” tiah a ti.

Image result for min aung hlaing

Nizan ah ralkap lei in Min Aung Hlaing nih ralkap dirhmun fiang tein chim nolhnak a ngeih tthan i kan biakam le kan tlahttem ti bak si ko khah! Cu lawng hlah, atu an ttuan cuahmahmi rian hnahnawhnak petu vialte {sandahpiahmi telh in} action kan lak cang lai caah minung cu zat kha zat leng a buu in um a ngah ti lai lo” tiah felfai tein ramri an ser cang.

Cu bantuk an ramri te lonhnak cun thisen luan hram aa thok tawn kha a si; a luan ciami caan ah!  Sandahpiah caan a sau deuh deuh, mipi zong an thi a lin deuh deuh ve. Ralkap lei nih le an ramri an bitter deuhdeuh ve fawn.

Cucaah ram chung ummi kan miphun hawi hna hi an him lo chin lengmang cang. Zeitik poh ah, thisen luang kho peng dirhmun kan phan cang hih!  Fak chin lengmang in kan miphun le kan ram caah thlacamnak ngei ko tuah hna u sih!

Relchih: Kawl ralkap le palik kut in rammi nunnak zeizatdah a liam rih lai. Nunnak pakhat liam hmanh a tam lei a si cang ti lio ah. Do-au mibu cung ah kutthlak le tlaihkhih muisam len aa timpah cang rua, nihin in. Thin a lin deuhdeuh lai, zaangen in palik le ralkap he i tukdennak risk a sang deuhdeuh lai. Cucu thindomh (critical concerns) dirhmun a si cang lai. Dimawkaretik uknak dothlen hi a man a fak tuk timi kha hnathlam ah a thangthan.

Chungkhar tlingte in aa nuam dekmak komi nun kha mitha rual nih an hrawh. Nun a liam sual ding kha phan lo awk a ttha hrim lo. Tlerhnak caah kai tinh lo, nun pakhatte hmanh ka uinak kong kha ka moral principle in langhter ka duh bia tu a si.

Cucaah, mahte nih lung i thlehnak in, a man a fak tukmi dothlennak ah an luh cio ding kha a dikmi a si, thih le nun kar, fai le nam kar, thilchia le tilet karlak ah mah nun ui lo in, ram le miphun caah nun derthawm ah va chiah khi a si.

Cucaah, ramleng um nih i tel forh nakin anmahte biakhiah cung ah dirpi kha a dik deuh ah ka ruah. Fimthiamnak, chaw le va le hmur le kaa hmang in va dirpi tiang khi hmualngei cem i kan tuah khawhmi a si ko lo hlah i? Thaizing ka zenh, kiptuh ka tih, zei dirhmun ah dah kan semnak ram a phak te hnga. Thlaza camnak hi ka tuah khawh tawk a si.Credit:Salai B Chan Khar

By Chuncha

Leave a Reply

Your email address will not be published.