CINCIK THLACAMNAK KAN PEH RIH LAI

Ule nau hna, Ngaihchiatnak le harnak nih a kan zual lio zong ah a kan kaltak lo tu cu Bawipa a si, Amin thangthat si ko seh.

Kan theih bantuk in kan khuachung ah kan dawtmi kan upatmi kan pu Thiangceu pa (Pu Thankio Hengcin-ICBC Khrifabu) ruak le Salai Ye Aung (kan tuanhawi Rev Steven Taknan tuanvo lakmi) ruak kan i hunh lio a si. Battle Creek lei ah kan naupa Zingdawt pa (Pu Zung Bawi Lian) ruak an i hunh lio a si ve. Ngaihchiatnak mitthli a luan lio ah tulio kan tlangrai boruak ruang ah an ruak te hmanh humh khawh lo ding phun a si fawn caah a tuar a har khun ko.

Kapkhat lei ah Vawlei pi a hnursuang cuahmah tu Covid-19 tlangrai nih kan community le Khrifabu cio zong a kan pal pah cuahmah lio asi fawn. Chungkhar chungkhar in lockdown lio mi zong a karh lei kan panh hna. Bawipa nih kan kilveng rih ko seh.

Hi lio caan ah thlacamnak kan pehmi hi a biapi ngaingai. Pumpak le Chungkhar thok in ramkip tiang ngaihchiat harnak a tongmi hna caah thla kan cam lai.

Kan Khrifabu zong Tuzan zantim in nithum ni tiang(April 27-29, 2020) CINCIK thlacamnak kan peh rih lai. Hi chung ah lamhlat lamnai in aa telmi tampi nan um caah kan i lawmkhun. Rak i tel rih ko u tiah kan in sawm hna.

Matthai 7:
Vs. 7: Hal law, pêk na si lai; kawl law, na hmuh lai; king law, on piak na si lai.

Vs. 8: Zeitintiah a haltu kha an pêk i a kawltu nih a hmuh i a kingtu kha onpiak a si tawn.

Vs. 9: A fapa nih changreu a hal lio ah lungtum a petu ahotal an um hnga maw?

Vs. 10: Ngasa an in hal lio ah, rul a petu nan um hnga maw?

Vs. 11: Nanmah misual hmanh nih nan fale thilṭha pêk nan hngalh ahcun; van i nan Pa nih cun a haltu sinah thilṭha cu a pe chinchin hnga lo maw?” Amen.

BAWIPA NIH SUNPARNAK CO DIH KO SEH.
HALELUIA
AMEN.

Credit: Thawngling Mualhlun

By Chuncha