Burmese People’s Nationwide CDM Day (15-February-2021) Ralkap Uknak duh lo ruang ah mah pawmcawmnak rian chiahtak in, 15-02-2021 ni ah Burma ram pumpi in CDM tuah asi lai. CDM apui tlinnak ca-ah, atanglei ban tuk in tuah asi lai. 1. Non-violence Resistance: Ralkap nih Mipi Nawlngeihnak (Power) hramhram loin an kan chuh mi, kan duh lo. Cu caah hriamnam hmang lo tein kan duhlonak kan langh ter i, lam kan zawh. Cucu hmual angei tuk mi asi. Kan peh rih lai.

May be an image of text

2.Non-cooperation: Adik lomi, ahman lomi, mipi sin in Nawlngeihnak afir mi Ralkap Uktu kan duh hna lo. Kan duh hna lo caah, an sin ah rian ttuan lo le “Zungkai lo” in um asi. Cucu abiapi chinchin. Mipi le Zungrianttuan mi vialte zung kai lo in um asi ah cun, hi Ralkap Uknak cu aruah hlan ah athi hrimhrim lai.

3.Swaraj: “Self-rule” timi “Mah tein Uknak”. Kan duh lo mi Ralkap Uknak tang ah um hrimhrim lo ding. Kanmah te in kan ni “Uk” lai. Atu Kawlram pumpaluk ah “Mah tein Uknak” (Yah-kuat Federation) tuah an thawk cang. Asaang kip ah an mah tein an ni uk. Khua an khan, lai an rel, himnak caah an ni huppheng. Hi hlei in hmual angei deuh mi a um lo. Atthawng tuk. Hmual angei tuk fawn. Kan peh rih lai.

Image result for Civil Disobedience Movement Myanmar

Swaraj (Self-rule) hmang in zei dah kan tuah lai? 1. Chinram chung vialte ah: Asaang kip in “Sang Tawlreltu Committee” (STC) tuah ding. STC nih mah le sang cio ah Ralkap nih mi an thlei ah cun, Mipi nih Asaang ning in dirkanh ding. Thawng-inn an kal pi mi hna an um sual asi ah cun; Mipi nih va luh hnawh in, va chuah dih ding. 2. Ralkap Uktu hna nih “Khualtlung Cazin” (Eh-sazin) nan pek lai, an ti mi tuah hrimhrim lo ding. Chinmi kan phung le kan Laiphung ah khual-tlung adaw mi kan si. Kan khual-tlung an himnak, Inn-tek le Mipi nih zoh khenh ding.

3.Ralkap Uktu nih Kawlram pumpi ah “Thawng-tla” misual taktak an chuah hna i, “Thawng-inn” an lawn ter. Ralkap Uknak aduh lo mi thleih in, “Thawng-inn” khah ter an timh. Cucu kan duh lo. Aho hmanh itleih ter kho lo ding in, Mipi kan dir tti lai. STC le Mino nih kan dir-kanh ding. Mipi lungrualnak le tthawnnak nih, Ralkap Uktu atei hrimhrim lai. Upatnak he, Dr. Lian Hmung Sakhong (2021-02-15)

Image result for Civil Disobedience Movement Myanmar

 Tutan i mipi nih Civil Disobedience Movement (CDM) an tuahmi hi hramhrma in nawlngeihnak a lami ralkap cozah thlak khawhnak dingah hriamnam tha bik a si. Salai Lai Ram Thang nih cun “CDM cu cozah a thahripi chah bantuk khi a si ko” tiah a chim. CDM hi ramdang zongah an hman lengmangmi a si. Tahchunnak ah Tunisia (2011) le Sudan (2018)! 88 lio CDM: Kum 1988 i ralkap nih nawlngeihnak an lak lioah cozah riantuan hna nih CDM hi an rak tuah. Hmual a rak ngei taktak. Asinain thongtla tampi an rak chuah i hna i cu hna nih cun CDM pelzulh kho lo dingin an rak tuaitam hna. Cucaah 88 lio CDM a hlawhtling lo.

Lungsau a hau: CDM hi a tha tuk nain lungsau lo ahcun theipar chuah hlanah ngol than a fawite! CDM ruangah rian in chuah le harnak dangdang tampi ton khawh a si, a tongmi cu an um len cang. Harnak ton pah cuahmah bu zongin lungsau tein CDM hi pehzulh khawh i zuam a hau. i bawmh cio a biapi: CDM ruangah harnak a tongmi, rian in chuahmi hna kha ramchung ramleng in bawmh le dirkamh a hau. Nan thachia hlah u, tiin a langhlat in forh le thazaang pek lawng a za lo. Harnak an ton taktak tikah i zuanhnawh le i bawmh cio a biapi tuk.

Image result for Civil Disobedience Movement Myanmar

Kachin ramkulh, Phakanh khuapi i peng uknak zung (Myone GAD) riantuantu minung 10 hna zong an rian in an chuah cang hna. Laimi nih rian in chuah hi kan ton te lai, a tong cangmi zong an um kho! Hi bantuk a tongmi an um ahcun i zuanhnawh cio a herh. Cun minung pakhat maw, pahnih maw an chuah hna ahcun tuanti hawi dang le zung dang i a tuanmi hna zong nih nan chuah hna ahcun kannih zong kan chuak ve i ngam usihlaw CDM hi hmual a ngei chinchin hnga! A thahripi chah cangmi Pawpi cu duhsah in a thi ko lai, a suttung khiah cangmi innpi cu a rauh hlanah a pur/tlu ko lai. A riantuan piak ti lomi cozah cu a duh lo bu tein a rawk/thi ko lai. Ralkap cozah an tlak i a dikmi Democracy kan hmuh hlan tiang CDM. By Chin Post

Kawlralbawi pawl zia le za hi…ruat tuah! Mi kip nih dohtti mi Ral an si. Zapi nih kantheih cio bang in kawlralkap bu nih kanram tuanbia ah mipi aiawh cozah pi office cu voi(3)tiang an fir cang. 1962 ah Gen. Ne Win nih siseh, 1988 ah Gen. Saw Mawng le Gen. Than Shwe nih siseh, 2021 ah Gen. Min Aung Hliang nih siseh, anmah bawisiduh ca le pumpak ca menmen ah mipi vialte cu khuaruah vansang le hnabeidong in an tuah lengmang ko.

Image result for Civil Disobedience Movement Myanmar

Cu ruang ah cun ramchung ralthawh nak cu hmunkip ah miphunbu pawl le Democracy duh pawl an chuak. Cu ti in mizapi ral ah anni chuah nak hram cu a si. Cun rawhral nak le vansang sifah nak phuntling nih zul in 1988 ah cun Burma ram cu Vawleicung ram sifak bik (lDC) sinak ah an phanhter. Ralkap uknak hlan ah cun Asia chung ah ramrum bik, facang chuahter biktu Burma ram tiah rak theih mi a si. Cu sifah nak nih cun nihin ni tiang mi mitzoh le bawmh hal in vawleicung ram hna sin ah kan phan. Miit hmai bi in kan um.

Cu dirhmun in ram mipi kan um lio ah kawlralbawi pawl cu sui le ngun in siseh, inn le lo hmanh ah khuaruah har in tthabik mi anni ngeih hna pin ah adangdang an chawva zong chim cawk lo in an rum hna. Cu nih an langhter mi cu mipi zawnruah le bawmh duh nak ca si lo in uktubawi siduh ca le mah pumpakrum an duh ca ah rampumpi cozah nawlngeih nak fung/seal cu meithal he mipi cozah kut in an rak chuh ton mi cu a si. Cu ti in damiah (mifir)an rak si nak cu bia dawhdawh le ca dawhdawh tial in mipi ca ah kan tuah mi a si ee..tiah kum (60) chung an kan hlen peng mi cu a si.

Cu caah mipi nih kum (60) chung doh an si. Kawl ralbawi pawl zong nih an ttuan bik mi rian pa(3) a si. Cucu an pawcom nak zong a si. Cun mintthat nak laksawng (medal) aphunphun an ni pek ton mizong cu a si. Cu hna cu..ram mipi hlen, tlaih le thah hna hi an si.Ttha te in mithiam pawl nih an hlat tik ah hihi kanram mipi ca ah kan ttuan an ti mi cu a si ko an ti. Na in IT chan mipi cu an kan tei kho bal lai lo. Kan dir hmun cio in rak do/ al peng ko hna uh sih… Kalawm e. Peh tthan te lai. By Khua Uk Lian

By Chuncha

Leave a Reply

Your email address will not be published.