UADP le Ralkap cu tangti an si kan ti lio ah UASDP Center Chairman nih Ralkap he kan tangti lo tiah a rak chim mi cu hlenthawinak a si zia cu March ni 10 ni Phunghram remh ni ah hmuh khawh a si. Mahte in Chief Minister thim khawhnak pohmah khi Federal zauk phung ah a biapi cem mi silo in a biapi mi pakhat tu a si ve. cu pohmah 261 remh ding biatung an rak dirh lio ah NLD nih a van hnon khawh tik ah Tlangcung Party tete le ramkheel thuk deuh a bih lo mi nih cun NLD nih Federal a duh lo e tiah an soisel hna. USDP le Ralkap nih pohmah 261 hmanh remh an duh tung i March ni 10 ni I remh ding chuahpi mi an pom khawh lo ahcun pohmah 261 remh ding an rak ti mi kha Tlangcung mi phun Party pawl hlenthawi nak le dehdainak a si zia a fiang khun.

March nihran ni remh ding hna cu;
2008 phunghram pohmah (5) : Ramchung vawlei tang le tichung thilchuak le vawlei cung thilchuak nak hmunhma vialte hna cu phunghram ning in fehter a si ni thawk in a hmun peng lai.
Remh duh ning: Ramchung vawlei tang le tichung thilchuak le vawlei cung thilchuak nak hmunhma vialte hna cu phunghram ning in fehter a si ni thawk in a hmun peng lawng si loin hmailei caan zong ah vawlei tang, tichung le vawlei cung in thil a chuak kho ding mi hmun le hma vialte zong aa tel chih lai, tiah USDP Party in U San Than Naing nih biatung a dirh.
Note: USDP nih kan ramchung thilchuak mi vialte le a chuak kho hnga ding mi hmun le hma vialte ralkap kut le phunghram tawhhrenh chung ah chiah duahmah an timh.

2008 phunghram (6/d): A dik I zulhphung tling te in Party kip/tling fawnh democracy nining serchuah ding.
Remh duh ning: Adik mi Party kip/tling Democracy serchuah ding tiah thlen ding in NLD Party in U Thun Aung nih biatung a dirh.
Note: Ralkap le USDP nih an duh ning ahcun A dik i zulhphung tling te in Party kip/tling fawnh democracy nining serchuah ding tiah an ti mi ah Adik I zulhphung tling a ngei mi /a zul mi tiah an ti mi hi kawl zulhphung maw/ ralkap zulhphung dah an chim duh mi a si hnga. hi biafnag hi USDP le Ralkap nih an duh lo caah aa remh kho lo.

2008 Phunghram (6/f): Ramchung Miphun Ramkheel lei i thithruainak ah ralkap hi an i tel hrimhrim lai.
Remh duh ning: Rampi Miphun Ramnkheel i thithruainak ah ralkap cu mipi duh ning hoih in tel ding, tiah NLD lei in U Thun Aung le U Thun Thun Hing an dirpi.
Note: Ralkap hi ramkheel an I tel chung poh cu phunghram aa remh kho lo ti kha a fiang. Phunghram remh loahcun democracy taktak hmuhnak a um khawh lo caah USDP le Ralkap nih democracy an aupi mi cu a deu le mihlennak a si. ralkap nawlngaihnak a thawnnak hram zong a si.

2008 phunghram (7): Rampi cu a dik I zulhphung tling a zulmi Party kip/tling sining in kalpi ding.
Remh duhning : Rampi cu a dik mi Party kip/tling Democracy sining in kal ding tiah NLD in U Thun Aung le U Thun Thun Hing nih thlen ding in an dirpi.
Note: USDP le ralkap nih a dik i zulhphung tling a zulmi Party kip/tling sining in kalpi ding tiah an ti mi ah a dik i zulhphung tling a zulmi tiah an ti mi hi kawl zulhphung le ralkap zulh dah a si hnga. a fiang mi cu Democracy an aupi mi hi anmah Party zulhphung ning in kalpi an duh. Democracy zulhphung kha zulh an tim lo.

2008 phunghram (8): Rampi cu Union Systerm (Ramkawmh) sining in ser ding
Remh duh ning : Rampi cu Federal Democracy ramkawmh sining in ser ding, tiah NLD nih an dirpi.
Note: Ralkap le USDP Party nih Federal democracy min hman an duh lo va si kaw cu lio ah pohmah 261 remh ding an rak ti mi cu sio rawl bantuk a rak si diam ai. rak dolh uhsihlaw ngapum bang a rak kan sio hnga.

2008 phunghram (14): Pyidawngsu Hluttaw, Ramthen Hluttaw le Ramkulh hluttaw ah hluttaw palai si ding in hi phunghram bantuk in Ralkap bawizik nih min a pek mi hna ralkap an i tel lai.
Remh duh ning: Pyidawngsu Hluttaw, Ramthen Hluttaw le Ramkulh hluttaw term a voi thumnak ah zatuak 15%, hluttaw term a voi 4nak ah zatuak 10% , Hluttaw a vozatuak 5% cu hluttaw a voi 5nak ah zatuak 5% tiin Ralkap bawizik nih min a pek mi kha hluttaw ah an I tel lai, tiin NLD nih a dirpi.
Note: Ralkap 25% thum an duh lo ahcun kan ram chung ramkheel a thianghlim kho bal lai lo. hi nih a langhter mi cu pohmah 261 remh an duh mi kha tlang cung mi phun dehdai le hlenthawinak bak ar ak si diam.

2008 phunghram (17/b): Ramkawmh, Ramthen le Ramkulh, Ramkawmh vawlei, mahte uknak a hmu mi hna le Pengkmawh ramri humhimnak rian ah, Humhimnak lei, Runvennak lei le Ramri uknak lei rian kip ah Ralkap bawizik nih min a pek mi hna ralkap an I tel lai.
Hrawh ding tiah NLD nih a chuah pimi a si. Asinain Ralkap nih an duh lo. Ralkap nih kan ram vawlei 99% pen a duh ti a fiang. ralkap nawl ngaihnak thumh an duh lo ti a fiang.
2008 phunghram (20/c): Ralkap bawizik cu rhiamtlai vialte hna i an lubik/nawl ngeitu bik a si lai.
Hrawh ding tiah NLD nih a ti i ralkap pawl le USDP nih an duh. President nak in nawl ngeihnak a tam deuh caah Democracy zauk phung he cun aa kalh tuk.
2008 phunghram (26/d) : Ram chung cozah riantuan tu vialte hna cu ramkheel ah an I tel kho lai lo.
Hrawh ding tiah an ti I ralkap le USDP nih an duh lo. Democracy zauk phung he cun an kalh tuk. kan ram ca rian a tuan mi vialte, a bik in cozah riantuan cu mifim lawng te an si caah hi bantuk mifim hna nih ramkheel an an i tel lo ahcun lothlo thingphur mi lawng nih ramkheel kan i tel khawh ahcun zeitin dah a si khawh lai. a fawinak cun kan mifim le cathiam vialte hna hi ramkheel lei ah an kham hna.

2008 phunghram (32/d le 32/b cu pumtling lo hna kawh auh ning he aa pehtlai mi le nulepa ngei lo, tar le ralkap fa le hna zohkhenhnak a si caah USDP le ralkap nih doh ding ah biapi in an ruah lo caah remh ding in hnatlak a si.

2008 phunghram (29 le 40) nak cu ka van langhter ti lo. pohmah 29 ahcun A dik i zulhphung tling a zulmi/ngei mi Party kip/tling Democracy ti mi kha “adik I zulhphung tling a ngei mi/zulmi” timi zawn kha hnawh ding NLD nih a dirpi nain an duh lo. Pohmah 40nak ahcun lakhruak in ramchung ah harnak a tlun tik ah ralkap nih a nawl ngaihnak in a tawlrel lai ti mi ah President nawl pekank in ralkap nih a tawlrel lai ti in NLD nih a chuahpi nain ralakp le USDP nih an duh.

Biafunnak
Tlang cung party hna nih NLD nih Federal le Democracy a duh lo, a chim hmanh a chim bal lo tiah nan ti. USDP le ralkap hmanh nih an chim nan ti. khoi an chim le Federal le Democracy a duh an duh ne tung lo. cu bantuk minung le Party nih pohmah 261 remh ding biatung an dirh mi cu a dik mi ramkheel thil pek a si hnga maw?
Mipi zong nih kan I fian a herh mi cu, zei bantuk Party hmanh nih teinak an hmuh zong ah 75% tlin lawng ah phunghram aa remh kho va si kaw cu phunghram aa remh khawh alwng ah mah teuknak cu kan hmuh khawh ding a si. cucaah ralkap 25% le USDP tei khawh hi a biapi. ralkap cu zuamcawh awk tha le tei khawh an si lai lo. Party lei in USDP lawng hi zuamcawh khawh an si. cutik ah USDP nih zatuak in thutden 1% hmanh an hmuh lo ding hi a biapi. USDP nih thuitden pakaht te hmanh an hmuh lo ahcun ralkap 25%, ataang mi thutden 75% a tling i phunghram aa rem kkho ti kha philh lo tein 2020 thimnak ah vote pek I zuam hna u sih. (By: Rolian)

By Chuncha