Minung hi zeitik caan ah khin dah hlen kan fawi bik lio caan a si ti ahcun kan lungre a theih lio caan, lungdong in kan um lio caan le hmailei kong ruah ah thinphang thlalau in kan um lio caan ah hin hlen kan fawi bik lio caan a si. Cun kan buhrit lio caan le rawlțam tihal in kan um lio caan ah khin hlen kan fawi taktak fawn. Zeicahtiah cun kan hnangam nakding a si le kan ton sual lai ti kan phanmi țihnak chungin kan him khawh nakding le kan pawkhim nakding a si paoh ahcun tiah an chimmi paoh le kan relmi ca paoh a zumh kan i fawih lio caan a si.

Nikhat cu ramtang tupi chungah rawlțam tihal ngai in rawl kawl ah a vakmi cenghngia pakhat khua pakhat pawng a rak phan. Inn pakhat ah ngakchia ṭah thawng le a nu nih a hnemh len thawng a theih. Inn tangah a dir ziar i an bia a ngaih hna. A nu cu changreu zuar ah kal ding a si nain a fa a ṭah tuk caah a kal kho lo.

A nu nih a hnemh deuhdeuh a fa a ṭah zual deuhdeuh ve. A pawfah țah deuh maw a si hnga mitkuh nih a sual i a țah deuh dek a si hnga ti cu hngal ve ruam hlah. A nu a thin aa sum kho ti lo i, “Ṭap ti hlah, ngam zokzok. Na ngam lo ahcun inntang ah kan thlak lai i cenghngia nih an ei lai,” tiah a ti. A taktak ti ahcun a nu nih inntang ah cenghngia a um le um lo kha a hngal lo. A fa ngam seh tiah a ṭhihpheihnak tu khi a rak si.

A nu nih a chimmi bia cu cenghngia nih a theih i, wow… a lawmawm tuk e. Nihin cu ka vanṭha bak hih, hmun dangah vah len hau loin ngakchia note sa ka ei lai i a thawt lai ning cu a ti i zeitikah dah ngakchia cu inntang ah a nu nih a vun thlak te lai ti lawng a bawh ko. Khua a hung tlai deuhdeuh, ngakchia le inntang ah a vun thla bal ti lo. Ngakchia ṭah thawng a thei ti fawn lo. Zanlei ni a liam deng cang i changreu zuartu nu zong inn leiah a hung lawi cang. Chun nitlak rawl loin a um caah cenghngia cu a rawlṭam in a thi deng cang.

Cutikah cenghngia nih bialo dipdep ka si cang, changreu zuarnu chimmi bia a si tak ruah tiah ka ruah i kai zumh sual ruangah rawl hawl loin chun nitlak ka um. Midang nih an chimmi bia sawhsawh ka zumh sual ruangah nihin cu rawl loin um ka hau ko cang ne a ti i aa ngaichih tuk. Sihmanhsehlaw san a tlai ti lo, zaan khat turpi rawl loin a riak. Amah le amah fahnak aa pe diam ko.

Hawi dawt, atu lio cu coronavirus zawtnak hrik ruangah mikip thinphang thlalau le lungrethei in um lio caan a si. Media deu nih an țialmi le mikip nih an chimmi paoh a zumh kan i fawih tuk lio caan a si. Cucaah cozah nih ngandamnak lei zung in thawng an thanhmi dah ti lo cu zumh ding a si lo. Media deu, lai media deu pawl nih an țialmi le a țha an timi paoh siseh mikip nih a țha an timi le an chimmi nan theihmi paoh kha va zum hna hlah u. An chimmi paoh le nan theihmi bia paoh nan zumh hna ahcun meidap haang ding u an in ti te hna lai i nan din te lai. Asilole vok zun din le phihlik, hmaifa ei a țha ti hna ah an in hlen țhan sual te hna lai hih.

Hawi dawt, nifatin kan tlonlennak le kan nunnak ah kan minung hawi nih hihi na caah a țha. Kan tuahpiak lai, kan pek hrimhrim lai tiah zumh awkin bia an chimmi na theih in na ton bal ve ko lai. Na dawt tukmi na nungak sinin siseh, na dawt tukmi na tlangval sin in siseh, na dawt tukmi le na tlaihchan tukmi hna na hawikom sinin siseh an chimmi bia na theih tawn ko lai. Minung cu kan bochan ngaimi hna le kan zumh ngaingai cangmi hna nih hlen an kan fawih khun. Fawi tein an kan hlen khawh. A ruang cu an chimmi paoh a taktak ah kan ruah sual tawn caah a si.

Changreu zuarnu bia ai zumh sualmi cenghngia kha cu rawlei lo le rawlṭam tihal in nikhat lawng a um ko lai. Sihmanhsehlaw kannih tu cu hawi nih a si ngai bang zumh awk ngai in an chimmi bia kan i zumh sual a si ahcun kan nunnak (Life) tiangin a rawk kho. Kan i ruah ning bantukin a si lo tikah lungrawk in um a fawi te. Micheu cu an nunnak tiangin a lo tlaumi zong an um.

A bikin mino nih kan i ralrin dingah ka duh. Na dawt tukmi na nungak nih maw asiloah na dawt tukmi na tlangval nih maw kan ṭhit, kan vat hrimhrim lai tiah an in ti hnga. Zumh awkin bia dawhdawh le bia ṭhaṭha, bia thlumthlum an chim hnuah zumhawktlak loin an um an theih ko bu zongin an zumh peng hna ruangah an tuah awk an tuah ti lo i a nunnak tiang a rawkralmi mino kan pawngkam ah an tamtuk cang, an tlawm ti lo.

Cucaah cun hawile hna kan minung hawi nih bia dawhdawh, bia thlunthlum an chim ah siseh, zeibantuk miphun nih an chimmi bia siseh a si tak maw si tak lo ti kan tuaktan cikcek hnuah kan zumh ah a ṭha bik. Na minung hawi nih zumh awk ngai in an chimmi bia le media pawl nih an țialmi ca paoh hi ai zumhmi kan si sual ahcun mah le mah fahnak ai pemi kan si lai i kan lohnak tu a si sual ko lai. Mah le mah cu fahnak i peh duh hna hlah usih mu.

Dinnak kha a cat lomi tiva bantukin luanter camcin ko u (Amos 5:24).

Credit: Salai K. Biak Lian Thawng

By Chuncha