Mai Jenevy Sui kan in lawmhpi hringhran. A sunglawi tuk mi laksawng na hmuh. Bawipa nih lam in hruai ko seh. International Youth Fellowship (IFP) nih kum khat voi khat an tuah tawn mi vawlei cung ram huap hlasak zuamnak, 2020 kum ah Myanmar ram aiawh in aa zuam mi Thantlang Peng, Aibur khua mi Mai Jenevy Sui nih, hi zuamnak ah laksawng a sang cemmi Grand Prize Winner a co mi thawng kan rak thanh cang bantuk in atu te kha Roca le lawksawng cu an pek cang.

IYF hruainak in vawleicung ramhuap hlasak zuamnak hi kum dang ahcun Korea ram ah tuah a si nain tukum hi cu COVID-19 ruang ah a hmun ah tuah kho loin Online in an tuah. Hi hlasak zuamnak ah aa zuam mi hi a ram in ram 64, aa zuamtu dihlak minung 138 an si tiah kan theih.

Grand Prize Winner a co mi Mai Jenevy Sui nih, Atu bantuk in vawleicung ramhuap in zuamnak ah zuam khawhnak caan ka neih i, laksawng tiang ka tinco khawh ve tik ah kaa lawm tuk, Pathian zong ka thangthat i thazaang a ka petu online le mizapi nan cung zong ah kaa lawm. Hi zuamnak hi kanmah miphun hla si loin Korea hla in i zuam a si.

Keimah changtu ah laksawng a cotu hi India ram aiawh in aa zuam mi a si. Kei hi “Crush Landing On You” timi hla in kaa zuam. Hi zuamnak ah atu bantuk in laksawng ka co lai ti hi ruahchannak le zumhnak tlawmpal te lawng ka ngei. Pathian dawtnak thawng le mizapi nih nan ka tanpinak thawng in atu laksawng ka co hi si tiah a lunglawmhnak bia a chim.

2019 kum IYF nih hlasak zuamnak an tuah mi ah Myanmar ram aiawh a rak i zuammi Kachin miphun Roger Doy nih laksawng a rak co bal ve. Hi zuamnak ah laksawng hi MacBook pakhat le Korea ram ah Free in khualtlawn khawhnak an pek hna tiah kan theih. Ref: Myanmar IYF Page Live

By Chuncha