Ka vision langhnak hmuhmi hi lih zong a si kho. Chim duhnak cu Pathian bak nih a ka pek tiah prophet cheu khat nih an ti țheo lio ah Lih zong a rak pek hramhram tawn hna kha. Cucaah ka vision hmuhmi hi a dik bak tiah ka chim lem lai lo, a dik zong dik lo zong ah ka caah pakhat te zong a poi fawn lem lo.nain remhnak ah ho paoh nih an hman ahcun mak tuk khi asi lai. Dawtnak le Fimnak he lawng hmuhbakmi phuangtu ka si ko caah mu.

Cuticun a alh hluahmah mi meiphu chungah cun viu le raak thawng lawngte ka theih i, ka hei zoh cu Lai ralkap pawl lawng te an si. Ka kiangah a ka hmuhtertu pakhat a um i, a mah cu ka thawh i, “zei ruang ko ah dah Lai ralkap vialte hi meiphu chung ah peih an si ko e, a si kho lo, chuah zok hna, ka chungkhat zong an i tel hi” tiah ka ti. A ka leh i “An zapi cun a si lem lo nain 95% cu peih an si tak ko, fawi tein chuah awk an țha lo, an mah tlak in a rak tlami pei an si ko cu” tiah a ka leh. Ka thawh ve țhan i, zei sualnak ko dah an tuah i, mithat lainawn, mifir, tleihhrem hmangpawl le Kawlralkap bantuk pawl tlaknak ding ah an mah hi ka hmuh hna, a si kho lo, chuah zok ko hna ka ti. A ka leh țhan i, “an nih cu sualnak an tuahmi ruangah an ra tlak a si lo. An rak tuah balmi sualnak nakin a letzakhat in a ngan deuhmi sualnak pi an ngei. Cu cu an tuah awk tak tak a simi tu tuah loin an i umter caah a si, miphun pakhat nih ralkap an i ngeih cio i, a sangbik van khin țuanvo pek an si. Cu cu an Ro a simi an Ram kilven kha a si. Kilven nak ah a biapimi cu ralțhatnak a si. Ralțhatnak tel loin Ralven khawh a si lo. Ralțhatnak timi cu mihrut hmanh nih hmuh khawh ding in ralkap nih cun an langhter lawng ah Ram a kilven khawh. Ropisung pekmi Ram chung ah ral a lut mi cu kah ve le doh ve lawng ah mihrut hmanh nih pasalțha le raltha a si ko tiah an hmuh khawh. Ralkap nih tar thih le pul thih aa thim ahcun Ralkap si awk a tlak lo. Chuak seh law, phungkii ah lut seh, cu lo cun a thuk chinchin mi meitili ah peih an si ko lai” tiah a ka leh. A bia peh rih a van timh ah khin ka tan i, a si kho lo, kan pa le cheu khat nih Ram caah nunnak petu kan si an ti lengmangmi a um ko, chuah ko hna u ka van ti bak ah ka bia a vun ka tan leh colh ve i, “Ram caah nunnak petu tiah mipi sinah aa aukhuanter len tu pawl kha a tawne deuh ah khin an um. Vawlei thok tein ralkap sining cu Van Radar nih a tlaih cia dih mi a si. Ralkap cu zei bantuk a si awk a si timi vialte standard le record a um dih cang. Hngerhte ralkap hmanh nih an bu le kua sawksam piaktu cu an doh ve hna” tiah a ka ti țhan.

Cutikah ka thawh țhan i, “Kan Pa le nih cun Non-Violence lam pei an zawh cu, thisen luanter cu Biaknak zong nih a duh lo i, cabuai cung ah pei biaral an doh cu” tiah ka ti. A ka thawh i, “Siang Bawi, nang mah hi Laimi vialte nakin a let zakhat in na fim deuh tiah ruahmi na si nain hi zawn ahcun na hruhnak a thuk tuk cang. Tenglam hmanh na tluk ti lo hih, Non-Violence lam zawh na duh ahcun na meithal zong kha chia lawlaw, Thisen luanter na duh lo ahcun na meithal le nam kha chia lawlaw, Cabuai raldoh lawng a sang bik le na tuah ngammi a si ahcun meithal vialte kha chia lawlaw law Gandhi lam kha zul ko, Meithal tlaih i, Ralkap tiah aa ko vemi nih cun Cung lei in pek mi țuanvo kha a tuah a herh. Mihrutpa Siang Bawi zoh hmanh USA pi khi, Vawilei cungah a țhawnnak cu ram dang pawl țhawnnak nakin a let zakhat in a ngan deuh. Kawlram nak in a țhawnnak cu a let thong tam tuk in a ngan deuh, sihmanhsehlaw US nih Kawlram hi luh hnawh seh law, kawl ralkap chia hnawi tete hmanh nih hin kan tei bal lai lo tiah an zoh sawh lai lo. An kah ve ko lai. CuCu Ralkap umzia a si. An kah ngam lo ahcun Ralkap sinak in an chuak ko lai i phungki zong ah an lut ko lai, cucu ralkap umzia cu a si. Vawlei cungah Ralkap bu hi thong tam tuk an um i, Laimi lawng hi meithal bei phawt ahcun Ralkap a si rua tiah nan ruah. A si lo, ral timi a kap ngam lomi cu Vawlei hram thok ri in tu ni tiangah Ralkap cazin ah khup an si rih lo. Cazin i khup ve ko țung i a kap ve fawn lomi cu a tu bantuk in an mah tlak in meitili ah an ra tlak hi a si ko, ziah tiah cun Ralkap Umzia Phung an buar,” tiah a ka caak.

Cu bantukin a ka chimh cuahmah lio bak ahcun Meiphu tili chung cun Siang Bawi kan chanhchuah ko law e tiah viukio thawng cu ka hna khat in a theih țhan tikah, Ka kiangmipa cu ka thawh i, Chuah zok ko sawh hna u law chuahnak ding a lam um ti lo maw, an sualnak cu zei tluk ko in dah a ngan i ka ti,” a ka leh țhan i, “An Sualnak hi a ngan tuk lehpek, an rak tuahmi sualnak ruangah si loin an rak tuah lomi, daipatlang tuk leh pek i an rak ummi sualnak hi a ngantuk ngamsam, Kum 30 ralkap aa ti ve mi nih cun cu chung vialte ah Ralkap a tlawm bik thongkhat te tal ngeih a herhnak zong an rak pemh lo. Cu ruang kha ruang tiah solhphelh thiamnak ah an hman. Lai ralkap miral tha tiah rak ti zungzalmi tuanbia zong an mah nih hin a thar bak in an hrawh dih cang. An mah nih cun Laimipi cung ah cun kan mah dah lo ho dah lo tiah an chal hnawh hna. An ral AA le Ralkap tu khi chal hnawh ding a simi ah Lai mipi tu kha, nan mah santlaihlo a si, ralkap zong ah nan lut duh lo ti phun rumro in an lak hnawh hna. Mi va luh duh ding tlak zong in timh tuahnak an ngei lo. Farasii bantuk nak in fih an nung deuh. Lai mipi sin nak in Kawl le Suh Ci ti bantuk sin in mithmaițha hmuh an duh deuh. An mah cu ram daw bik ah an i ruat, meithal hmanh AA hmai ah zunkhat zong puah ngam țung lo ah, an mah nih cun ngamh lo a si lo tiah sawnhtarhnak a thong leng in an ngei. Kan kah ve hna ahcun Lai mipi pei nan fak ve lai cu tiah Lai mipi tu țhihphaih tlerhkhawnhnak ah an hman. Lai mipi a hrut tuk ve mi pawl le luat tlak lo, sal cikor taktak pawl nih cun amen an pek ngai ve. An i sawnhtarhnak vialte ruangah an sual hi a thuk chin chin cang. Sihmanhsehlaw nangmah nih an caah na kan nawl tuk caah hi bantukin a si lai. Na hmuhmi langhnak hi na phuan lai, an zumh i Ralkap Umzia taktak he aa tlak ning in ralțha tein hmai an nor ahcun an luat lawng si loin laksawng tampi pek an si lai. Min țhatnak zong pek an si lai. Kawl sin si loin Lai Sui mipi sin in mithmai țha an hmu lai. Cu tikah cun an ral hmanh nih an upat ve hna lai. Na Diamond bia zong in na hlawi ve te hna lai” tiah a ka ti.

Ka ti ve țhan i, “Ka cabia cu Laimi tampi nih an zum lai lo e, sal lungput an ngei dih cang hna, kei mah chiatnak tu ah an ka hman lai, hi ka phuan thawng hin kei mah ca tu ah chiatnak tlung seh law, Laimi caah țhatnak tlung țung hlah seh law a miaknak um lai lo. Bia phuan zong hi ka zuam ti lo, a ka nor cang, ninghngal tukin santlailo tete hmanh nih an ka comment țheo i, aa kaih lo e,” tiah ka ti.
A ka leh i, “Laimi tuanbia ah nang mah Siang Bawi bantukin Bia phuang kho mi an um bal lo. Laimi tuanbia ah nan mah bantukin a fimnak kum zakhat hmai ah a tli mi an um bal lo. Laimi tuanbia ah nangmah bantukin aa toidormi an um rih lo. Na cabia ah mihrut taktak nih an in comment zong ah lungsau ngai in na leh hna. A tu chanmi nih na cabia sunlawi zia an pemh lo hmanh ah hi hnu kum zakhat ahcun Laimi nih na cabia tlangkhat te hi Diamond tlang khat nak in an duh deuh te lai. “Hmutu bia” tiah hmai lei chan laimi nih an cawn te lai, na delete cia na cabia pawl hmanh kha phaisa tampi dih in an kawl țhan te lai. Kawl pawl nih an i uan bikmi saya Jaw Gyi, Takhin Ko Taw Hmaing te pawl nak in a let zakhat in na rak fimthiam deuh le Laimi caah cun a let thongkhat in na rak san deuh zia kha an pemh te lai. Cucaah a tu na phuanmi dingmi hi na țuan vo cu a si ve. Ralkap nih kah ve a țuan vo a si bantukin nang zong nih na hmuh mi phuan ve hi na tuanvo cu a si ve. Aa kaih le kaih lo kongah buai hlah.” tiah a ka leh.

Credit: Siang Bawi

By Chuncha