Nizaan kawl khuachia police le ralkap meithal kah nak in a nunnak a liam mi Angle nih nizaan thil a ton hlan ah a facebook ah hi tihin ca a rak tial. Angle ka thi cu “A” thi asi. Mizei poah nih nan herh caan le zeitik caan poah ah {+959265202005} ii number ah hin ka pehtlaih ulaw ka cohlan peng ko lai. Mithmuh{khuahmuh} a duh mi nih ka mithmu nak kan pek hna lai, ka tak pumchung ii a um mi thil zong zeitik caan poah ah nan herh ahcun kan hlut khawh hna.

May be an image of 3 people, people standing and outdoors

Atu bantuk caan ahcun siizungah kal in aherh mi catlap pawl sign thut ding ah a fawilo. Asinain Angle nih tuah ka duhmi asi ko caah catlap cung sign thut nak  ding ahcun ka nunak tiah ka pek lawnglawng in  ngah asi. Cucaah nan herhtak tak asi ahcun nunnak pek in kan hlut ko hna lai tiah nizaan a thih hlan nithum ah khan a facebook ah a tar. Nusal ttha taktak pakhat hrim arak si mu. Zeitih hman ah a tuanbia le cu Ram mi nih philh a um bal ti lailo. Ram caah a lungthli tein aitimh bantuk in a nunnak tiang in a rak peek.

May be an image of 1 person

Relchih: Tlawmpal te ka ruahnak ka vun langhter ko lai. Atulio ca ttial cu i muaicawk lo ti zong a fawi ngai ko nain thil sining chim hi ka rian asi ve ko tiah ka ruah caah asi. Atulio Ralkap nih hramhram loin uknak an chuhmi kongah ahohmanh nih kan duh cio bak loh. Ralkap le Palik zong nih methal kahnak in nunnak zong an laak thluahmah kan hmuh tikah kan ngeihchia tuk cio. Atulio thil sining zoh tikah Non Violence Movement in Violence Movement ah a chuak lai tihi ka thin phang ngaingai.

Hakha/Thantlang dirhmun chim ahcun atu tiang cu nunnak le thisen luan tiang a pha rih loh i hnangam deuh asi. Atulio tiang cawlcanghnak dirhmun pin in cawlcangh ahcun Thisen luannak a chuah khawh caah atu cawlcanghnak level tu hi Control tuah khawh i zuam peng ah a ttha.

Ralkap Lutlai pawl nih dai tein lamzawhnak, duhlonak langhternak zong an duh ti lo caah ningcang loin tlaihkhih le thongthlaak, meithal kahnak le thisen luannak, nunnak liamnak hi atulio Kawlrawn Khuapi dang ah tampi a chuah bantukin kan Chin Ramkulh ah a can lonak ding cu Mizapi kan rian asi. Zeicah tiah Non Violence Movement le Civil Disobedience Movement nih cun Thisen chuahnak le nunnak liamnak, buaibainak chuahpi kha ai tinhmi asi lo caah asi.

Kan mino hruaitu hna an thi a lin i an thin hannak a sang taktak cang ko nain zei kan ti hnga, daihnak in cawlcanghnak tuah ding hi i tiim peng ko uh tiah nawl kan duh hna. Ramdang ummi kan miphun hawi hna zong nih bawmhnak chawva nan peknak cungah kan i lawm i , daihnak le a nemnak in cawlcanghnak tuah ding lawng hi thazaang pek le chimrel ding asi tiah ka ruah.

Atulio sining kan zoh tikah, lamzawhnak le duhlonak langhternak hi UN le US,EU tibantuk hna nih kan thei hna sehlaw kan zuanhnawh hna seh ti khi i tinhbikmi aai ko caah cucu a tlamtlin khawhnak caah Mipi nunnak liamnak, Upadi an chuahmi buarnak in tlaihkhik le thongtlaaknak te hna hi asi khawh chungin hrial i zuam a hau ko.

Hakha/Thantlang nih a zatawk cawlcanghnak langhternak hi a zaa ko tiah ka ruahning asi. Hriamnam i tlaih in ral tuk caan a phaak tik i nunnak liam le thisen chuahnak phaak cu phundang asi te hnga i atulio caan ahcun fimkhur tein cawlcangh hi a tthabik asi ko rih tiah chim ka duh.

CDM atuahmi hna Cozah Rianttuan pawl kha a thawk ahcun dai tein inn ah um ziar ko uh tinak in lamzawh le duhlonak langhternak ah sawm le telter asi pah tikah Ralkap lei nih tlaihkhih i thongthlaak an timh cang hna.(Uniform hruk hrim ahcun Decree san ngai dawh asi. Upadi cu an kutcung ah a um viar cang cu mu).

Cucaah, CDM tuahmi cozah rianttuan pawl zong ralring ngai in um thiam a herh ko.  Kan nau le pawl an tlaih hna i zaankhat (24 hrs) thong chung an khumh hna ah zeitlukindah nu le pa, u le nau, mipi kan thin a phan ti cu mithmuh kuttongh asi. Pumpaak a tongmi chungkhar kha lungretheih chinchin asi. Atu cu, zaankhat(24 hrs) ti bantuk lawng asi ti lo kho men.

Cucaah ahcun, atu ah duhlonak langhter le lamzawhnak in kan i tinhmi hi zeitindah mipi himnak in kan kalpi khawh lai tihi hruaitu hna nih biatak tein ruah lo awk a ttha lomi asi.

Laimi cu Cozah rianttuan upa zong kan tlawm tuk caah i dirkamh khawhnak zong a har ngaingai i fimkhur deuhin cawlcangh i zuam ko uh tiah ka ruahnak tlawmpal ka vun langhter.

By Chuncha

Leave a Reply

Your email address will not be published.