Atu lio Kawlram thimnak kong hung ruah ahcun thinlung a nuam lonak tampi a chuak cang, Party kan tanh ning zohah mah le chungkhat, hawikom unau, nupa ti bantuk cu i hua thai a fawi dawh in kan catial mi le kan thinlung put a hung lang ngai hna i thinlung a nuam ruam lo. Abik in kan ruah ngai ding pakhat cu Kawlram pi level in kan dam hmasa a herh, Ralkap uknak in kum 70 reng lo kan tuar fahnak hi ruah samat hrim a cu ko cang. Ralkap uknak a si lio i kan khua cio ah zeitluk in dah kan rak tih i kan rak temtuar, cheukhat khuabawi hna zeitluk in dah an tuar fah timi pawl hi kan ruah chih hi a biapi ngai.

Ralkap uknak duhlo ruangah tlangcungmi poh nih hriamnam iput in ramtangah a dikmi uknak, mah tein khuakhan lai rel khawhnak ding, kanmah tein kan covo lakthan khawh ding caah ram an khel cuahmah. A sinain kan duhmi thil taktak atu tiang tlangcung mi nih kan hmuh khawh rih lo, zei caan dah kan rauh rih lai timi hi chim awk a tha rih lo mi a si. Kanmah Chinmi CNF/A nih zeitluk in dah nunnak tampi liam ve in an khel ve, atu ah hriamnam in cun i doh caan a si ti lo, cabuai cungah kan duhmi i hal cang seh an ti i, NCA minthutnak he hmai an kan nuar pi cuahmah.

Mah lamtluang an kalpi mi hi kan hmuh te hrim ko lai tihi ruahchannak tampi kan theih, tlam a tling ko ahcun atu lio kan aupi mi kan covo kan lak than lai ti hi au a hau ti lai lo, kawlram ah zei taktak hmanh tuah kho lo in a kan tuah tu 2008 phunghram pi zong an remhnak lam um chung cu NCA pakhat lawng nih remhnak nawl lam a um lai timi Dr. Lian Hmung Sakhong nih a chimmi kha kan theih dih fawn. Cu caah anmah riantuannak hi tlam a tling khawhnak ding caah alam kip in mipi zawng nih bawmchan cio an herh ngai lio a si fawn.

Atu lio cozah tlaitu NLD hi kum 5 te lawng ram a hruai rih, cheukhat nih kawl party tiah tamtuk nih kan tialmi hmuh a si, NLD hi kan theih ding pakhat cu Party pakhat men a si, a herh bikmi hi kan nganh ton, cu cu zeidah si tiahcun NLD party hi minung nunnak tampi a rak liam ve i kawlram thlennak ding caah thihngam tuk in a rak dirhtu a rak cawlcang tu an sinak hi kan philh piak hna lo hi a tha ngaingai. NLD CEC pi ah Chin kan itel tung lo ti hna catialmi nan tam ngai, anmah tel le telo kha abiapi ah chiah ding asi lo, a dikmi le a hmangmi thlennak a aupi i kawlram pi lung hnangam tein a kan chiah tu an si caah doh ding hi kan rian a si maw ruat tuah uhsih.

Chinram zongah kawl an itel tung lo, Chinmi thiamthiam nih tawh an tlaih ve ko cu teh, anmah nih hin kan covo a si mi kan aupi lengmang mi hi fawi deuh tuk in akan lak piak than chin lai ding zong kan ruat lem lo, CNLD party zong chinmi thotho nan si, a zei hlei nan tling zawngah na kan tuah piak kho ding lam a um rih ve hlei rih lo caah Kalwram level in siseh, Chinmi nih kan herh deuh mi kan hmuh hnga ding lam a um chung te NLD tu hi 2020-2025 tiang cu dirpi rih ko uh sih.

Kan hawi tlangcung mi KIA an bawi Guanmaw le atu mino zong hi an dihlak in NLD party le Daw Aung San Suh Kyi lawng an bochan i an tanh dih ko hih.Uknak tha lo tu hin ka chuahkhawh nak hnga NLD tu hi tanhdih ding asi ko. Lai party e cue khae ti in miphun tanh caan asi rih loh. kan ramtu hi aa thlen khawhnak hnga tu tang dih rih ko hna uhsih. Ralkap uknak kan kir than sual ding hi tih a nung tukmi a si hih, a ngai ngai ti ahcun CNLD ko nih hin NLD hi doh lo in a dirpi tu lehlam kan si cu, kan dirti lai ti tuah uhsih, zeitluk in dah chinram caah thatnak kan chuah chin lai ruat cio tuah uh. Cu caah kan hmuh ning a dang phung a si ko, kan ruahnak a dang phung a si ko, Amah belte mipi zawnruahnak cio tuin kan miphun kan dawt ning cio hi a thatnak lei kap in cuanh thiam cuio tu hi i zuam cio ko hna uhsih.

Note: Mipi sinah lunglawmhnak le zaangfahย  nawlnak: Thawngpang {News}kan tialmi a kan relpiak tu ka Miphun Chin/Laimi nan dihlak cungah lunglawmhnak tampi chim cawklo kan ngei. Thawngpang kan tialmi nan kan relpiaknak thawngin a dikmi le a hmaanmi thawngpang {News} kan thlah{Post}khawh hi mipi nan thawngin asi.

Thawngpangย  kan tialmi hi careltu mipi caah thathnemnak si hram seh tihi kan itinhmi asi. Chirhchanh {Source} kan lak hnu ah a dik mi asi lai tiah kan ruah mi kha kan Miphun Laimi {Chinmi} nih fawizang tein kan theih khawh cio nakhnga theihter khawh kan i zuam. Asinain vawleicung cu tlamtlinlonak a si caah chirhchanh {Source} kan lakmi tete hi a dik lomi a um khawh caah a dik lomi thawngpang a si tiah nan ruahmi kha zeitik caan paoh ah theihter khawh kan si i, kanmah lei zong in a dikmi thawngpang tial khawh le kan palhmi remh khawh kan i zuam lai.

Mipi nih theih ve hna seh ti na duhmi, thawngpang {News} siseh, Pathian bia siseh, siaherhnak bia in siseh, capar biazai le theihtlai pawl tialpiak ding a um ahcun zeitik caan poah ah tialpiak le thlahpiak khawh zong a si. Nan dihlak cungah lunglawmhnak le zaangfah nawlnak he- Lungleng Tlang Editor.

By Chuncha