Chinram laifang ah a ummi [ The Heart of Chinland ] Halkha khualipi nih a tonmi kokek rawhralnak kha Pathian nih Halkha khualipi tharchuah a timh caah a si timi cu caan nih a fianter chin lengmang tiah ka hmuh. Kan lungput kan thar chuah lai, Kan vawlei kan fing le kan tlang kan tharchuah lai, kan inn le kan lo zong kan thar chuah lai. Kan lo thlawh le kan thingphurh zong kan tharchuah lai. Kan lam le kan sul le ka nuncan ziaza zong kan thar chuah lai.

Image may contain: night and sky

Kan lungput hi miphunpi lungput in kan tharchuah lai. Chinram a laifang ah a ummi kan si bantuk in nule pa dirhmun in kan dirhmun kan tharchuah lai. Lungput pical ngeih kan i zuam lai, peng dang nakin lungsau thinfual kan I zuam lai, dawtnak le zangfahnak thinlung zong a hlei in ngeih kan I zuam lai. Kan miphun cungah zaanghlei cawi lungput ngeih kan i zuam lai. Zaanghleicawi le thlachiat ruahnak lungput zong ngeih kan i zuam lai. Kan lungput zong Dawtnak le zaangfahnak lungput in kan tharchuah lai. Kan ram dawtnak thinlung zong kan tharchuah lai, Kan fing le kan tlang ah tingkung, pangpar phuntling cin t’han kan I zuam lai. Va phuntling, saram phuntling lennak ram ah kan tharchuah lai. Kan fing le kan tlang hna hi dollar phaisa hmuhnak caah kan tharchuah lai. Chokhlei, dingdi, senri, vaurawng le thingkep par hna nih kan thar chuah lai.

Image may contain: mountain, grass, outdoor and nature

Halkha khualipi cu Sui khualipi ah kan ser lai, city planning tein kan tharchuah lai i, Falam lam lei le Thantlang lei lam ah khua thar in kan thar chuah lai. Kokek rawhralnak ruangah umnak a ngeih lomi hna caah International standard tluk dawh in inn le lo, lam le sul kan thar chuah lai. Halkha City Hall nganpi zong ngeih kan i zuam lai. Shopping center nganpipi zong ngeih kan I zuam lai. Chin State parliament innpi zong kan ngei cang. Halkha college kan ngei cang i, University sianginn ah tharchuah kan I zuam lai. CCC sianginn zong CCU sianghlerun ah kan tharchuah cuahmah lio a si. Airport Vanlawngtual zong ngeih kan i zuam colh lai. A rawkmi sianginn, biakinn hna zong a dawh bikmi le a fek bimi inn le lo ah kan tharchuah lai.

Image may contain: mountain, sky, grass, outdoor and nature

Pathian nih kan khua le kan ram tharchuah a duh bantuk in kan lungthin le kan lungput zong tharchuah a duh. Kan tonmi thil vialte hi hmailei kan kalnak lam tluan caah hmuhsaktu le fimchimtu lawngte an rak si.

Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.
Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor.

By Chuncha