Upatmi CBCUSA chungkhar hna,

Bawipa min in nan kut kan tlaih hna. A herh tiah kan ruahmi cu thlah lengmang le i theihter lengmang a hauh ko caah nan sin ah ca kan rak thlah ṭhan.

Tulio kan tonmi kong ah CBCUSA ram pumpi le ramkip ummi Chin miphun nih thlacamnak kan ngeih cang bantuk in rak ngei hram rih ko u tiah nawl le forh kan in duh ko hna. Abik in tuzarh March 15 ni, pumhnak ah nan siarem ning cio in kan tonmi kong ah hleice thlacamnak (Special Prayer) rak ngeih cio ding in kan in sawm ko hna.

Khuazing Pathian nih Israel miphun bia a kamhmi hna kha kan lak zong ah a tlinter hrimhrim ko lai tiah kan zumh ko. Siangpahrang Solomon nih thla a cam tik ah Khuazing Pathian nih a lehnak cu hihi asi ve:
“Cun Bawipa cu Solomon sin ah a lang i, na thlacamnak cu ka theih cang i hi hmun cu raithawinak inn caah kaa thim cang. Van cu ka phih hna i ruah a um lo tikah siseh, Khaubok hna cu vawlei ei awkah nawl ka pek hna tik ah siseh, ka mi hna lakah RAI ka tlunter tikah siseh, ka min in kawhmi ka mi hna nih an lung an ṭhumh i thla an cam i ka hmai an kawl i an lam ṭhalo khan an i mer ahcun, van khin ka run theih lai i an sualnak cu ka ngaihthiam hna lai i an ram cu ka damter lai”(2 Chanrelnak 7:12-14).

Cucaah ule nau hna,
March 14, le 15 cu mahle nan umnak Khrifabu cio ah, nan khuale ram cio ah Bawipa sin ah a hleice in thlacamnak rak ngeih cio ding in kan in nawl ko hna.

Kan miphun caah March 15 hi sullam a ngei ngaingai fawn. Kan hnulei kum 121 lio, 1899 kum March 15 ah kan siangbawi hmasabik Arthur le Laura Carson cu kan khualipi Hakha khua an rak phan i Jesuh Khrih Khamhnak Thawngṭha an kan chimh thok Ni a si. Khuazing Pathian nih a kan kaltak lo, a kan philhlo nak kan tuanbia ruah bu in hleice thlacamnak cu rak tuah cio ding in Khrih min in kan in sawm ko hna.

Bawipa nih kan miphun kan kilveng rih ko seh. Amen.

Thlaawr Bawihrin

General Secretary

CBCUSA

By Chuncha