Ka Kawi Pa Kep (Chum Ling pa) nih mual akan liam tak ti kan theih i, Van Lian nu he keimah he kan ngeih achia tuk i, chun nilak lungleng in khua zaza kan ruat tthan. Pa Kep hi Haka High School kan kai lio te in aa rak i daw mi kan si. A aw ara ttha tuk i, Haka Lungbiak Inn ah atu Rev. Herbert Tum Ceu le Saya Lai Ram Hu te pawl he khin hla an rak remh tawn i, ABC Aw-kua pa tiah ahmet te in a min arak thang cang. Cun Rangoon University ah kan kai tti i, Pegu Hall ah kan rak um tti bal fawn. Acan ah Judson Church ah an rak um i, Aa Do te pawl he hla an rak sa, hla an rak remh tawn. PPP nih arak thanh mi “Kei Lung Kawi Ter Tu Maw Na Rak Si” ti mi hla zong kha a rak phuah. University kan dih in, Kawl Ralkap Acozah nih thleih ding in an ka dawi i, Mizoram ah ka rak zaam lio ah, Pa Kep le Kawi Tawk te, Aa Uk te, Pa Bet le Chan Awi te pawl RASU lio kan hawi le tam pi an rak um i, cu lio ah cun Pa Kep cu khua dang ah Saya an ttuan na-in B.Ed degree lak ding in Aizawl ah training an kai lio asi i, sau pi kan rak i kawngkoih rih hui.

Cun ramdang kal ahung chuak i, Pa Kep te pawl cu USA an phan. Kei hi Sweden ka rak phan. Van Lian nu he hin kan um kho tawn lo i, Summer Holidays ah kum hnih-thum peh in US lei cu kan kal tlawn ka rak i thawh tawn i, cu ah cun Pa Kep le Zing Zing pa le Biakku pa le adang kan hawi tthing tampi nih an rak kan dawt tuk i, kan ni nuam tuk tawn. Nikum 2019 ah khan US cu ka va tlawng tthan i, “Ka Kawi, ka dam ti lo” arak ka ti i, sau pi kan ni leng. Haka High School in Rangoon University in, Aizawl in, USA tiang kan ni zulhnak kong hna kha, bia-sawng kan tlorh tthan.

Pa Kep cu, vuikhat atheicang mi ahawi le pohpoh nih nun chung hawi ah kan ni thleih colh mi, Mi-ttha Mi-fel asi. Thil liangan kan tuah ah si seh, thil hmete kan tuah ah si seh, zumh awk tlak in afel mi asi. RASU kan rak kai lio ah Chin National Day, Khua Do Puai, Freshers’ Welcome, Farewell te hna long si lo i, RC ah kumkhat voi khat kan tuah tawn mi, “Lai Rawl Zuar” lio zong ah fungfei khua chung ah kan va kawl i, (Denis Thal Peng le tiah) Sa-bu-ti kan rak chuan. Cucu 1981-82 lio ah arak si. Cu lio ah cun: Haka hmanh ah Sa-bu-ti cu zei dah asi, tiah mi nih arak thei rih lo. Kanmah pawl nih “Bu-ti” khi bete he si lo in, “Sa” he kan chuan i, Sa-bu-ti tiah amin kan phuah chawm mi arak si. Kan rak tlawnlennak kong le Pa Kep arak fel ning le bochan awk thlak arak si zia kha chim lengmang ah cun, adih lai lo.

Ka Kawi, kan lam thlaun arak sau hringhran ko. Anuamh zong kanmah tawk te kan rak i nuam ve ko. Philh khawh cu asu asi lai lo. Vawleicung pei asi fom cu. Lungsia herh lo tein, liam ai kun. Hi Vawlei cung ah na khual tlawnnak lam cu, dih riangmang hmanh seh law, Vanram tu ah kan ni tawng ttahn te lai. Cu tik ah nuam te in kan lamthluan kan peh tthan te lai. Kanmah cio zong nikhatkhat hi Vawleicung kan khual lam adih tik ah, Vanram ah kan ni tawng tthan lai i, Aizawl ah na rak kan dawn ban tuk te khan na kan dawn tthan te hui lai. Dam tein mang ttha, Ka Kawi Pa Kep! RIP.

Credit: Lian Sakhong

By Chuncha