Sahrang Kong Innchungkhar Crusade timi an tuahnak ah kan nau nu Bawi Tha Dim hlasak tu an sawm mi nih langhnak a hmuhnak video kan i share chin hna. Atu bantuk in langhnak a hmuhmi hi a sawhsawh a si lo, tha tein ngai khawh cio rak zuam hram uh. Mah Innchungkhar Crusade ah hin Cawnpiaktu: Upa Sang Kio, a si i, Hlasa: Bawi Tha Dim an sawm mi hi asi. Mah hi Hakha ah an tuah mi a si. Video hi a donghnak lei lawng in kan thlak. A hramthawk langhnak a hmuhmi cu white board ah ca in tampi a tial. Cu ca a tialmi cu kan rak thlah than te lai. Video credit: Biakamfa Mino Note, Atang bik ah Video zoh khawh a si lai.

NIHIN CAAH PATHIAN BIA, The Word of God for Today  Pathian Tuhi Pakhatnak Ah Chia Ko Phungthluk 3:9,10 = Bawipa cu na chawva le nan thilri theitllai hmasa bik in upat tuah. Cun na rawlinn cu khat thluahmah in an um lai; na mitsur nennak khor cu mitsurhang in an liam lai. Math 6:33 = Sihmanhsehlaw Pathian pennak le a dinfelnak kha kawl hmasa u law thil dang vialte hna zong kha chapchih nan si lai.

Minung paoh cu kanmah ca le kanmah he ai neihniammi ca hi a hmasa ah a chiami kan si. Pathian tu nihcun amah pennak le amah duhnak le amah dinfelnak kha kawl hmasa a kan fial. Acunglei i kan relmi Baibal bia nih a kan chimh ko. Elijah le nuhmeinu kong kha kan theih lengmang. ” Tih hlah na chim bang khan va tuah ko, sihmanhsehlaw a hmasa bikah keimah cu hlum hmete in va ka ser piak law, rak ka put, cun a hnu ah nangmah le na fapa caah cun va ser, ” tiah Elijah nih ati ( 1Siang 17:13). Ati bang cun minu nih a tuah caah an changvut um cu a lawng lo i, an chiti thawl cu a reu lo (1Siang 17:16).

Pathian thlahmi profet nih a chimh bang a tuah caah nuhmeinu le a fa caah zeizongte ai rem. Kannih zong mah hi kan hngalh ko nain a zul duh lomi kan tam tuk. Pathian ai palh bal lo. A kan hleng bal fawn lo. Kum 200 hrawng a rau cang na i atutiang a hmun pengmi kampani hi Amerikaram ah a um. Amin ah ” The Colgate Palmolive Company” an ti. Athoktu le a ngeitu hi khuatemi a rak si. Apa nih kan sifak tuk i nangmahten khuapi ah rian vai kawl ati ruangah New York khuapi ah a va pem. Aminah Colgate asi. Lampi ah khan an khua i an innpa a rak si balmi he an i tong. Atar ngai cang. Lawng captain asi. Zeitiahdah na rat ati. Kum 16 lawng asi rihmi Colgate nih a kong lam cu a chimh.

Nathiammi a um maw ati tikah sahphiat le phazawngdan tuah ka thiam ati. Cun tarpa nih ” Khan thla kan campiak lai mu” ati i lampi ahcun biatak thlak in thla a cam piak. Mah hnu ah hitin ati than. ” Mi pakhat hi New York ah sahphiat sernak in mirumah ai chuah te lai. Nangmah na si kho men. Cucaah mitha si i zuam; na thinlung dihlak Pathian pe; dollar na hmuhmi chung in a hmasa bikah cheuh hra cheu khat kha Pathian pe; sahphiat na ser tikah hman le dikten a khing thlai law cawh hna law ser. Cuti na tuah ahcun na thangcho lai i mirum na si lai,” ati.

Tlangvalpa nih tarpa bia a theih tikah fakpin a lungne ah ai chiah i a zulh. Cheuhra cheu khat kha hmanten a pek. Arauh hlanah kampani cu a dirh. Pumh a tlolh bal loh. A nunnak kha Khrih a pek. Khrihfabu ah zumhtlakten a nung. Athang deuhdeuh. Pathian sin a peknak a than ter. Cheuhra cheu khat in cheuhra cheu hnih, cun cheuhra cheu thum, cun cheuhra cheuli, khan cheuhra cheu nga tiin a pek lengmang. Adonghlei ahcun a miakmi a dihlak kha Pathian ram caah apek an ti. Amah chan chungah Pathian sinah a pe tam cem asi. Cun a rum bik zong a rak si. Zeiindah ai thok? Tarpa i a chimhmi nih a nun chung a chuahtak ti lo i kha ti khan Bawipa kha pakhatnak ah a chiah caah asi ko.

Nihin zingka zongah colgate hasi le palmolive sahphiat in a ha ai tawl i a hmai ai phiahmi kan um theu lai. Colgate nunzia le Pathian bia nih kan cawnpiak ko seh. Mah ti nung ding in mifim bik Solomon siangpahrang nih a kan cawnpiak (Phung 3:9,10). Cuhnuah Pathian le minung a kemhmi Jesuh nih a kan cawnpiak fawn. An bia hi zul hna hmanh usih, kan i chir bal lai lo. Kan lam a tluang hrimhrim lai. Elijah nih minu kha ” Tih hlah” ati bang tih hlah usih. Pathian cu pakhatnak ah chia ko hna usi law a herhmi dang cu Bawipa nih tavuan a kan lak ko lai. Reltu, sharetu le chimchintu nan dihlak Bawipa nih nan lam tlaunter ko seh. Amen! By: Thio Za

By Chuncha

Leave a Reply

Your email address will not be published.