Hakha Caah Thlacam Ta Ve: By Tluang Lian

Hakha Caah Thlacam Ta Ve: By Tluang Lian

Hakha Caah Thlacam Ta Ve: A tu zan suimilam 8 tlinhlan deuh te khan, Chinoosi Zung hrawngin bomb thawng le meithal puah thawng a tam ngai cang. Mipi himnak caah thlacam ta cio hna usih. Hakha khua Mipi vialte BAWIPA nih in Huppheng in phaw in chawnkanh ko hna seh. THIANG THLARAU nih Hnangamnak Daihnak in pe ko hna seh. Credit: Tluang Lian

Tunai Thawngpang: Pastor Cung Biak Hmun ruak JMBC khrihfabu pastor hna nih an laak khawh cang: 2021 September 18 zaanlei sang Thantlang khuapi chung ah meithal le bomb puah thawng theih hnu inn 10 leeng a kaangh lawng si loin TCBC khrihfabu Pastor Cung Biak Hmun cu SAC mithat phu hna kut in a nunnak a liam tiah thawng kan theih.
Thantlang khuapi chung inn a kangh hi zaanlei suimilaam pathum fai in kangh hram aa thawk i, 6:00PM fai lawng ah mei an hmih khawh.
Inn a kang mi mei phalh awk ah a kal mi hna cu SAC lei nih an kah hna i, hi an kah mi chung ah Pastor Cung Biak Hmun an khen i lamkam ah a ruak in hmuh a si.
Hi kong he pehtlai in Thantlang khuami pakhat nih, “Inn a kang mi phalh awk ah a kal mi poh SAC nih an kan kah. Saupi inn a kaang mi hmih khawh loin kan um. An kan kahnak ruang ah TCBC khrihfabu pastor kuanfang nih a khen i a nunnak a liam. A dang hliam a tuar mi le a nunnak a liam mi an um le um lo kan thei kho rih lo,” tiah The Hakha Post ah a chim.
Pastor Cung Biak Hmun hi nupi le fate pahnih he khua a sa mi a si i, tu thla a si lo hmanh ah hmaithla chung ah a pathumnak a ngei ding an si tiah kan theih.
Tuzaan 6:30PM tluk ah JMBC khrihfabu upa le pastor hna nih a ruak tluang tein an va laak khawh tiah kan theih.

May be an image of 1 person, standing and outdoors

ZEIRELLO IN UM LAI CIH! Thihnak le nunnak kong hi kha hlan ahcun faak in kan rak ruat cio lai lo dah ka ti. Nunnak timi hi zeirello in a ummi kan tampi lai dah! Atu ah kan ram ah kahdonak a hun chuah tikah i kahdonak hmunhma ah a ummi hna cu thinphang thlalau in kan um i, thaizing khuaceu kan hmu kho te hnga maw ti kan ruat.

Khioka in dah kuanfang le bom cik a rat lai kan hngal lo. An meithal kuan le an bom cik cu an hmete nain zung nga tluk a chahmi thinghak (သစ်မာ) tung hna le thapkhat chahmi tlakrawh vampang (နံကပ်) hna cu tlengko in an vawr khawh. Champheu inn le bang cu kuan fang pakhat nih inn nga/ruk tiang a hlanh khawh lai. Cucaah mi cheukhat caah cun mi inn phen ah kan um ko zong ah a him thiamthiam lo. Zan khat a liam cun thlankhur pakhat in a chuakmi bantuk in kan i ruat.

Hi caan ah ka lung chung ah a hun chuak tukmi cu: Bawipa nih ka nunnak ni khat a hun ka chap tthan hi ta ti hi a si. Ni khat nunnak a sunglawi zia hi a ka theihter. Ni thar pakhat hi laksawng nganpi ah ka ruah cang. Dawtmi unau, nang tah na nun rih mi hi thluachuah nganpi ah na ruat tawn maw? Asiloah zeirello in maw na um? Moses nih cun, “Kan nunnak hi zeitluk in dah a tawi ti kha kan hngalhter law cuticun kan fim deuh lai,” tiah a ti (Salm 90:12).

Na nun rih caah Bawipa sinah lawmhbia na chim tawn maw? Asiloah na nunnak hi zeirello in dah na hman tawn? Zeizong vialte lakah a sung bikmi na nunnak hi zeirello in um lai cih mu! Don’t take it for granted! Credit: Rev. Biak Lian Vel

Leave a Reply

Your email address will not be published. Required fields are marked *