Frankly Graham i a sining a nunnak dihlak chungah 100 ah 65 hi ka lung a tling lo ngai. 100 chungah 45 tluk ka lung a tlingnak cu Pathian rian caantling in a ttuannak ah le zeidang thil a tuahnak ah a si i ka upat. Amah hi biatak tein Trump cu US president sinak caah le thim tthannak ding caah hehtiah a lamkip in a cawlcangtu a si. Evangelical phungchimtu hna lakah Jerry Falwell Jr., James Dobson le Kenneth Copeland zong Trump thimtthan a si khawhnak dingah biatak tein a aumi an si ve.

Image may contain: 1 person, meme and closeup, text that says 'FRANKLIN GRAHAM: SHAME, SHAME' ON THE 10 REPUBLÍCANS WHO VOTED TO IMPEACH TRUMP Justin Sullivan/Getty Images'

Pathian rian caantling in a ttuanmi nih an i thawh riangmang i Pathian i hmanmi le thimmi bantuk in Trump cu Graham nih a dirpi mi le a ttanpi mi cungah keicu ka mawhchiat ngai. Republican party chung in a fel deuh le a ttha deuhmi, a dirpi le a ttanpi ahcun a ttha ko/a zia ko ka ti. Cun Pathian rian caantling in a ttuanmi nih thimnak ah a cuhmi hehtiah vote kawlpiak cu a dawh deuh lo ka ti. A luan deuh ka ti.

Bawi Zisuh zultu, Jeim le Johan a lo ka ti. Matthai 20:20-28 chungah kan hmuhmi cu Jeim le Johan i nu nih a fapa le pahnih caah Bawi Zisuh cu a orhlei le a kehlei tthut ding in a halpiak hna i Bawi Zisuh nih fak piin a sik hna. Mi fapa i a rian kha an i fiang lo. Anmah i Bawi Zisuh an zulhnak a ruang le an rian zong an i fiang lo ti khawh a si. Sunparnak le nawlngeihnak an duh tuk. An ramri lengah an pet. Cuve bantuk in, Graham zonghi a rian lengah a pet deuh. Sunparnak le nawlngeihnak a duh tuk ve. A pa, Billy Graham i minthangnak le larnak cu amah nawlneihnak le larnak, hlawknak le sunparnak caah hmang a timh ve ti khawh a si.

Franklin Graham & Lost Evangelical Witness: Transactional Approach to  Politics Hurts Church | National Review

Franklin Graham i a ruahnak, a kalpi ning le Trump a ttanhning le politics ah a telning hi ka zohtik ah Kawlram i Buddhist phungki, mi ttha lo taktak, Ashin Wirathu he khan an i lawhnak a tam ngai ka ti. Time magazine zongnih Wirathu cu “The Face of Buddhist Terror” tiah an cover ah an rak ti kha. Wirathu i a ruahnak, a kalpi mi, le a timhmi pawl cu Kawl ralkap cozah uknak ttha lo kha a dirpi, tlangcung mi vialte a kan rem lo,

Rohingya muslim zong a rem hna lo i Muslim dang le Khrihfa le Hindu le biaknak dang zong a kan rem lo. Biaknak le miphun karlak zongah buainak a chuahpi lengmangtu a si. Tthat lo leiah vawlei pumpi in a min a thang. Daw Aung San Suh Kyi le NLD party zong a rem hna lo i hehtiah a doh hna. Buddhist biaknak, Kawl ralkap cozah le Kawl miphun ca lawngah biatak tein a cawl i a ruatmi a si. Mah ruangah a phungki hawi tamdeuh zongnih an rem lonak a si.

US preacher Franklin Graham tries to reverse UK tour cancellations | World  news | The Guardian

Franklin Graham zonghi Wirathu phun in a kal ve. Vunrang Khrihfa tlawmpal ca, US ram ca, le mirang ca lawngah a cawl ve. A kalpi ning le a ruahnak a bi tuk lawmmam deuh ka ti. Republican party chung in minung pa 10 nih Trump impeachment dingah an lung a tling ve ruangah “ningzak” an si a timi khi a palh tuk ka ti. Khrihfa mi nih cun a palhmi le a sualmi cu dirpi phung a si lo cu mu kanmah lei minung an si zongah. Khrihfa mi nih cun dinnak, biatak le a hmanmi kha ralttha ngai in kan dirpi ding lehlam tuk a si deuh ka ti. Credit: Van Tum

Laitlang din lonak, eihmuarnak, le ziknawhnak kongah buai ngam hna uh sih, US thimnak bantuk in: Atu tan, US ram thimnak ruangah fak piin Laimi (Chinmi) kan buaibai le kan i ceih lulhnak in ka lungah a hung chuakmi cu Kawlram uknak tthalo le Laitlang i din lonak, eihmuarnak, le ziknawhnak a tambik a sinak kong zongah pastor te, evangelists le hruaitu dang vialte nih fak piin rak doh in rak au ve uh sih law zeitluk in dah a tthat hnga i tthangcho nak zong tampi a chuahpi cang hnga tihi ka ruat. Mah lioah cun Facebook a rak um rih lo ruang zongah a si ko lai. Silole kan ralchiat ruangah le kan ttihnak ruangah a si ko lai.

Kawlram uknak cu democracy uknak a si lo ruang zongah a si ko lai. Asinan tuni ah Kawlram uknak cu a ttha cang i democracy uknak kan hmang cang ko nan kan mino pawl le kan pastor pawl le evangelist zongnih din lonak kong, eihmuarnak kong, le ziknawhnak kong, le I thleidannak kong pawl cu kan chim ngam hlei lo/kan phuang ngam hlei lo/kan ttial ngam hlei lo. Din lonak, eihmuarnak, le ziknawhnak a tuahtu pawl kha hmaitonh bak in kan ti ngam hna lo hmanh ah phungchimnak in maw siloah cattialnak in maw silole video ti bantuk tal in maw, Laitlang i din lonak, eihmuarnak, le ziknawhnak kong cu kan chim awk le kan ttial ngam awk a si ka ti.

US ram cu democracy uknak in kum 250 nawn an i hruai cang ruangah duh tawk in kan chim ngam, kan ttial ngam, kan soisel ngam hna i kan buaibai ngam. Cuve bantuk in atu tan thimnak kongah hehtiah a buaimi, Laimi kan zapi tein, Laitlang le Kawlram i din lonak, eihmuarnak, i ruan lonak, thleidannak, le ziknawhnak kong vialte khi buaipi ngam ve uh sih law zeitluk in dah a tthat hnga ka ti. Biaknak lei hruaitu pawl an rian hrimhrim zong a si. Campaign le crusade cu atu le atu kan tuah lengmang ko nan Kawlram chungah din lonak, eihmuarnak, le ziknawhnak a tambik nak state cu Laitlang (Chin state) a si.

Dinnak tuah ding kong kan i cawnpiak ti lo. Eihmuar lo ding kan i cawnpiak ngam tilo. Zik i nawh lo ding kan i cawnpiak ngam ti fawn lo. Cu vialte cu biaknak lei hruaitu pawl rian a si. Bible chungah profet vialte nih mah kongcu biatak tein an rak dohmi a si. Biakam thar chung zongah Johan cu din lonak kong a chim ruangah Herod siangpahrang nih a thah. Dinnak kong, eihmuar lo ding, le zik i nawh lo ding cu Khrihfa a si lomi ram pawl le miphun zong nih biatak tein an I cawnpiakmi le an dirpi mi a si. Mah ruangah miphun thangcho le ram thangcho ah an I chuah ve hna. Khrihfa a simi nih cun tam chinchin in din lonak, eihmuarnak, ziknawhnak, thleidannak, le I ruan lonak vialte cu kan doh awk a si.

Laitlang cu Kawlram chungah a thathu bik le rian a ttuan lobik state a si an ti, hlathlaitu pawl nih. Aphichuak cu a sifak bik state kan si ve ko Kawlram chungah. Din lonak, eihmuarnak, le ziknawhnak lawng i bochan cang ahcun rianttuan zong kan huam tilo cu mu. Mah te i zuamnak lungthin zong kan nei kho ti lo. Kan teima ti lo. Rianttuan huam ding le teimak nun neih ding in i cawnpiak zonghi pastor le evangelist te rian a si. Bawi Zisuh nih a timi cu ka pa cu a zungzal in rian a ttuan a ti. Paul zongnih a timi cu nan caah thilrit phurtu ka sinak hnga lo nan sin ka um lioah hehtiah rian ka ttuan a ti. Bible dangah a ti rihmi cu a ttuan lomi cu ei hlah seh ti si hoi. Curuang ah a thathumi le rianttuan a huam lomi cu Khrihfa ttha le a piangthar mi zong a si kho lai lo tikhawh a si.

Din lonak cu Laitlang ah a tamtuk ruangah sianginn kan kai zongah ca zoh kan huam tilo i ca i fir ding lawng kan i bochan. Atu cu cafir a ngah ti lo. Curuang ah Laitlang cu Kawlram chungah tanghra awng cazin a chiabik a si peng rih ko. Ca zoh huam lo cun zeitin dah kan awng khawh fom hnga.

Atutan US ram thimnak ruangah a buaimi kan za tein Laitlang i din lonak, eihmuarnak, ziknawhnak, i ruan lonak, le thleidannak vialte khi hehtiah buaipi cang hna uh sih. Democracy uknak a si cang ko i nan ral zong a tthat deuh awk a si cang ka ti. Facebook le social media dang san an tlaih ning le an tthathnem ning zong kan I fiang cang ko I a hmang zia thiam ve cang hna uh sih, kan Lairam le kan Lai miphun caah. Crusade le campaign kan tuahtik ah le sermon (phungchim) kan neih tik zongah din lonak kong, eihmuarnak kong, le ziknawhnak kong vialte biatak tein i cawnpiak cang hna uh sih law chimrel in ttial cang hna uh sih. By Van tum

By Chuncha

Leave a Reply

Your email address will not be published.