Kan chungkhar hi minung 4 kan si i, a rauhhlan ah tirawl ei awk kan chambau chom cang lai. Italy i lockdown an tuah hnu khan cun, tirawl cawknak dingah chawva kawlnak lam kan ngei ti lo, tiah Bricklayer Salvatore La Barbera nih a lungretheihnak a langhter.

Hmawngkhu (black market) in riantuan hi a si kho ti lo, zeicahtiah police pawl nih lam kan i chawh tikah zeidah na tuah, tiin an kan hal peng cang. Zeizongte theih an duh cang caah, hmawngkhu na tuanmi pauh a fawite cang, tiin a chim.

La Barbera bangin hmawngkhu rian a tuanmi hna hi Europe ah hin million tampi an um i, lockdown ruang i an ram chawhlehnak hnursuan a si hnu cun, an dirhmun a him lo ngaingai cang. Sicily hi Italy ah a sifakbik khua a si i, tirawl cawknak man a ngeiti lo mi miharsa pawl cu supermarket ah an vung kal i, eidin pawl an vai lak hna. Cu tikah dawr ngeitu pawl nih an man an hal hna i an pek khawh lo caah police an auh hna.

November i International Monetary Fund nih thawngzamhnak a tuah ningah cun, Europe ram hna i hmawngkhu riantuannak hi 10% in 40% tiang a kai, ti a si. Italy i hmawngkhu chawlehnak hi 2016 ah khan 27.3% tiang a phan. Greece ah cun 30.2% tiang a phan.

Economy lei in thancho a panhmi ram paoh ah hmawngkhu chawlehnak hi a karh deuh ve i, International Labour Organization nih an fonh tikah, 2 billion hrawngah an chuah i, cucu vawleicung riantuantu miluzat i 60% hrawng he ai tluk, tinak a si.

Coronavirus ruang i chiatchuah a tongmi company pawl bomh dingin cozah kip nih phaisa an thaapmi hi cu bantuk hmawngkhu chawlehnak a tuahmi hna belte nih an tingco ve lai lo, zeicahtiah hmawngkhu chawlehnak nih cun cozah phaisa a hmannak cazin a langhter kho lai lo caah a si. Cun, a miak a hmuh kong zongah chim fian a ngamh fawn lai lo.

Virus a caam chung paoh cu, mahtein rian ai sialmi paoh cu thla khat ah 800 euros in Greece cozah nih a bomh hna. Tax an va pek ko zong, minung a thong a sang tampi hna cu chawva bomhnak a pe duh hna lo.

Tax kongah cozahlei nawlngeitu sin i an income kong report a pe lo tu paoh cu, zeibantuk minthang company i riantuantu a va si hmanh ah, tutan bomhnak hi an tingco kho ve lai lo. Hmawngkhu chawlehnak a tuantu hna ca i bomhnak belte cu a rauhhlan ah thawngthanh a si te lai, tiah finance ministry official nih thawng a thanh.

Ahohmanh Taanta An Si Lem Lai Lo

Unempolyment benefit asiloah state bomhnak a tingco lo dingmi minung pakhat a um i, Katerina, kum 30, a si. Crete i cawngsaya a si i, kum 8 chung tax pek a duh lo.

Sianghngakchia 5 ka ngei. Virus ruangah 3 an ka kaltak cang. A cheukhat an pa le nih thlahlawh an k ape kho lo. Anmah zong chawva lei ah harsatnak an ton ve caah a si, tiin suimilam pakhat ca a chimh ah 10 euros a hmutu Katerina nih a chim.

Mei man le ti man pek dingin an ka hnek. Cu tikah, ka mawtaw cawknak company sinah instalment ka pek dingmi hun ka thawnpiak deuh u, tiin ka vung nawl hna nain an ka cohlang duh lo. A tu cu chawva kongkau ah ka nu le ka pa lawng kai bochan cang hna. Zeitik tiang an ka cawm khawh lai cu ka chim kho ti lo, tiin a chim.

Spain i lo rian a tuanmi a cheukhat pawl cu virus ruangah an loruan an mak i, har ngaiin nifatin khua an sa hna. Supermarket ah vung kal in an tisik an hnah pawl an vung chiah khawh ti lo nak hi zarh hnih a si cang. Cu tikah, lo rian a tuanmi mi tampi hna cu tirawl chiahnak bank lei lawng an vung panh cang hna, tiah Caritas Economic Solidarity team ah coordinator a si mi Ana Heras nih a chim.

Italy hi corona nih a denbik mi ram a si i, minung 3.7 million hi hmawngkhu rian a tlaimi an si. Chungkhar pawcawmnak ai harhmi hna tu cu cozah nih kan bomh ko hna lai, tiah Prime Minister Guiseppe Conte nih a chim.

Mayors pawl ca i bomhnak ah 4.3 billion euro a kamh hna, cun tirawl cawknak phaisa a ngeitu lo mi hna caah tirawl coupon caah, tiin 400 million euros pek dingin bia a kamh hna. “Ahohmanh tantaak nan si lai lo” tiin bia a beuh hna.

Income a ngeilo mi, asiloah pension zong a ngei lo mi paoh cu lakhruak lahkhah serpiak hna i, thla khat ah 600-800 euros hrawng pek dingin Treasury nih a chim.

Cu bomhnak cu khuacaan hoih in thlai a cingmi, samram a zuami hna le hmawngkhu in chaw a letmi hna lawng bomh an si lai.

Emanuel Smmartino, 32, hi Sicily peng Catania khua i vanlawng kawrawn i rian a tuanmi cu an phih cang caah, August ah le nau ngei ding an si fawn i, cuhlan ai khonmi phaisa i bochan in khua an sa cuahmah.

Ka tuannak company lawng hmanhah hin a caan tete lawng i rian a tuanmi hi minung 40 kan si i, vanlawng choklet i 90% hrawng hi phih dih si cang caah, cu kan tuanmi rian cu an um ti lo. Rian lo kan dirhmun cu a tutiangah kan cozah nih cipkhap a kan ti rih lo, tiin a chim.

Kan hnung July tein khan rian in an ka phuah i, keimah tein tlakrawh ka rual i, so ka siam i pawcawmnak ka kawl, tiah Palermo ah a ummi La Barbera, 39, nih a chim.

Cun nafia boss Tommaso Buscetta tuanbia chirhchan in an i zukmi “The Traitor” timi film telhchih in baisikup zeihnak rian ah electrician dirhmun in rian an rak tuan bal.

Hi tih a nungmi virus hi zeitin dah ka dironh khawh ning a si lai, tiin ni khat hnu ni khat khua ka ruat ve lem ko. Asinain, a tu cu zeizongte hi an i taap dih ko cang, tiin a chim.

Credit: Chelsea Bawi

By Chuncha