August 7 ah Hakha Post nih an rak taarmi artikel kong hi aho nih nan ceih lo e? Political party pakhat le pakhat karlak ahhin “colussion’ timi “secret agreement for illegal purpose” ti hi a um lengmang ttheu. Chin Party aa timi, CNLD nih kum 60 renglo a kan hremtu Burmese Army aiawh, USDP he “secret agreement”/ colusion an ngeih, ti cu, mah artikel ahhin a lang ko lo maw?

Hakha Post nih an rak ttialmi ka rel tikah Pu No Than Kap nih teinak a hmuh khawh nakhnga, amah aa cuhnak hmun, “Falam No 2” cu USDP nih an kianh. Cun, CNLD chairman Pu David Ngaisak hmun, Matu No 2. zong, CNLD aiawh Pu Zo Pa Maung nih teinak a hmuh khawhnak hnga, USDP nih an kianh bak rih. Cu lawng hlah, Hakha in Amyotha ah aa cuh dingmi CNLD aiawh Pu San Tin Mang zong an kianh rih fawn. USDP nih CNLD cu hmun 3 ah an kianh hna. “Kianh” timi cu conlusion/ secret agreement in a chuakmi result a si kho. Zeibantuk phun “secret agreement” dah an ngeih khawh? kan zoh lai.

Dr. Hmuh Thang hmurka bak in a chuakmi cu, “USDP nih 2020 ahcun Pyithu le Amyotha hluttaw ahhin thazaang kan chuah lai” a ti. USDP nih Cozah an ser khawhnak hnga ding ahcun “Pyithu le Amyotha hluttaw ah MP seats tampi hmuh hi a si. Cucaah, a fiangmi bakmi cu, Kawlrawn ahhin NLD an tei lo ding an ifiang tuk cia caah “Tlangpar” ah a ummi Pyithu le Amyotha hluttaw seats hi an von ibochan ngai ti a lang. CNLD pawl zong nih an mifim le bochan deuh pawl nih “Pyithu le Amyotha” lei kal loin, Ramkulh ah an ipawng viar zong cu von ruahdawmh khawh ngai a hung si.

Cucaah, USDP lei in tlangpar party/Chin Party telh in “offer” an tuah khawhmi hna cu, Centre/Nypyitaw ah USDP nih cozah kan ser khawhnak hnga kan bawm u. Ramkulh ah thazaang kan in pek ve hna lai. Kan in kianh hna lai. Centre ah Cozah kan ser i, Ramkulh ah nan tei ve ahcun, CM kan in pek hna lai tbk “Deals’ zong hi a um kho ngaimi a si. “2008 phunghrampi cu kan dirhkamh lai” tiah min a thutu hi Pu Zozam ( CNP) a rak si i, 2008 phunhrampi kan dirhkamh lai tiah fawituk in min a thumi nih USDP he thutnak/position duh ah conlussion tuah cu a fawi ngaimi thil zong a si ko hnga. “Chin miphun nan dawt ahcun Chin Party vote ding tbk a au lengmangtu CNLD supporters pawl, zeitin?

A tanglei ta hi Hakha Post nih an tial mi:

2020 November 8 ah tuah ding Myanmar ram party tling Democracy thimnak ah Chin Ramkulh chung mee hmun 39 chung ah USDP party in tlangcung party pawl nih hmun co ve hna seh, thawng hna seh ti saduhthat in mee hmun dihlak ah an i zuam lai lo tiah Dr. Hmuh Thang sin in kan theih. Mee hmun 39 a um mi Chin Ramkulh chung ah USDP party lei in Hakha Peng, Amyotha Hluttaw, Matupi Peng, Ramkulh Hluttaw le Falam Peng Ramkulh Hluttaw ah an i zuam lai lo tiah kan theih. Falam, Hakha, Matupi ah an i zuam lo ding kong he pehtlai in Dr. Hmuh Thang nih, “Kannih cu kan party i upa lei dirhmun in tlangcung party hi papek deuh ding hi duh peng a si Tlangcung party Hluttaw Palai hi a tha ko lai ti kan ruahmi cu kanmah hmun zong kianh kan i harh loh. Cucaah cun mee hmun 39 chung ah 36 kan sinak zong hi tlangcung party ti deuh lawng si loin Chin ram chung i party a rak dirmi hna hi papek in hmun kan kiahmi hna hi a si,” tiah The Hakha Post ah a chim. USDP party lei in a ra lai ding thimnak ah Ramkulh nakin Pyithu Hluttaw le Amyotha Hluttaw lei ah teinak kan hmuh deuh nakhnga papek in kan i tim deuh tiah Dr. Hmuh Thang nih a chimchap. “Atu kan i zuam lonak hmun hi Matupi in Ramkulh No.2 ah aa zuam ding NLD in Pu Vui Kaw le CNLD in Pu Zo Pa Maung an si. Hi hna pahnih chung ah Pu Zo Pa Maung hi biatak tein cawlcang kho seh ti kan duh. Hakha Peng in Amyotha Hluttaw ah CNLD in aa zuam ding Pu San Tin Mang a si. Pu San Tin Mang hi Surkhua mi a si. Surkhua cu khuapi zong a si ve, cun Senthang Peng zong a si i, amah zong zalong tein cawlcang ve seh ti kan duh. Cun, Falam Peng in Ramkulh Hluttaw No.2 ah CNLD in Pu No Than Kap aa zuam ding a si ve ca ah zalong tein cawlcang ve seh ti kan duhpiak hna ca ah kan i zuam lonak hi a si,” tiah Dr. Hmuh Thang nih a chimchap. USPD party lei in a liam cia kum 2010 kum party tling Democracy thimnak ah ram pumpi huap in teinak an rak hmu i Chin Ramkulh chung zong ah Ralkap Bawizik Pu Hung Ngai nih kum 5 chung Chief Minister a rak tuan. 2015 kum Myanmar ram party tling thimnak ah USDP party hi Chin Ramkulh chung mee hmun 39 chung ah mee hmun 5 lawng ah teinak an rak hmu.

Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.

Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor

By Chuncha