NULE SINAK TLINH LE TLINH LO ZOHFELNAK

(Tuchun ka sermon)

Nule nih fale hi a hrin lawng hrin hin cun nule sinak hi tlinh asi lo. Saram zong nih fa cu an hrin ko. Cucaah atanglei hi zoh chih a hau.

  1. NA THILTHUAM LE NA HLAWN NIH A LANGH TER

Nule cheukhat cu inchungkhar ah a lutmi chawva nakin an thilthuam le an chawhlawm kha alet in an ttha deuh. An inn le an lo cu zei ngai cu asi lo nain thilthuam man fakmi lawngte an i hruk, sui tlangtlang an i serh. Khuasaknak ca nakin thuam le hlawm caah phaisa an hman deuh. Nupi fel lo he khuasak ahcun phaisa khawn khawh asi lo. Phaisa na hmuh ngai ko buin phaisa nan ngeih lo ahcun na nupi sual ruangah a si bik lai.

  1. NA FALE FIMTHIAMNAK NIH A LANGH TER

Fale cathiammi, catang sang tiang a phanmi nule hna cu an zaapi in an rak fel ngawt. Na fale tangriat in an i maak dih ahcun zeitindah nu fel sinak cu na tlinh rua hnga. “How are you” tihmanh a hngal lomi fale tampi na ngei sual maw?

  1. NA COKA NIH A LANGH TER

Na coka khengbel chiah ning, fimtawl ning le thianhhlimh ning nih nule a felmi an si le si lo cu a kan chimh fawn. Cun nan puantom nih khan a langh ter fawn. Nan coka i thopaw hna an khah sual ahcun na lo cang.

  1. NA FALE ZIAZA LE TLAWNLEN NIH A LANGH TER

Na fapa pakhat zu-ta-ma (zu ai nei), pakhat mifir, pakhat thongtla, pakhat zuzuar asi ahcun nufel dirhmun ahcun na dir kho hrim lo. An hmet lio tein na rak cawnpiak hna lo caah asi ko. Nu fel nihcun an fale nih an no lio tein an cawnpiak hna, ca an chimh hna i biakin ah an hruai hna.

  1. VA LE CHUNGKHAT HE IPEHTLAIHNAK NIH A LANGH TER

Mirum pa pakhat nih fa pahnih a ngeih hnu ah a nupi cu a maak i a nupi a maak zan ah cun a farle le a nu cu an i nuam tuk i an laam an ti. Na vale chungkhar le nan inchungkhar karlak ah dawtnak le pehtlaihnak hri hna na cat ve sual maw? Cunihcun nupi fel na si le si lo kha a langhter ve lai. Na va le chungkhar cu na chungkhar an si ve kha va philh hlah.

  1. PUMPAAK ITHEINHHLIMHNAK NIH A LANGH TER

Ha ttawl zuam lomi hna na si sual maw? Na rim hna a chia tuk sual maw? Sahriah zuam ti lomi hna na si sual maw? Nu fel nichun an takpum kha duhnung, zohdawh le thianghlim tein an chiah (maintain an tuah) peng. Asilo ahcun na va nih an fih lai, an zahpi lai i Pathian thei lomi le thlachiat ruat lomi hna a si sual ahcun darling dang an ngeih taak khawh. Hi ruang ahhin nu/va ttang tampi ai tthen.

  1. NA THLARAU NUN NIH A LANGH TER

Thlacam bal lomi hna na si sual maw? Pathian bia ngaih a huami hna na si sual maw? Phungchim a sau i a thinhangmi hna na si sual maw? Khuacaan ah zu peek khat/peek hnih hna a pomhmi hna na si sual maw? Ai pum bal lomi hna na si sual maw? Pathian hlam a hngal lomi hna na si sual maw?

Jesuh nih, “Ahohmanh vancung i a ummi ka Pa duhnak a tuahmi cu na unau an si, ka nu an si” tiah a ti (Matt. 12: 48-50). Pathian duhnak a tuahmi hna cu Jesuh nih unau bantukin a dawt hna i ai bochan hna, Pathian duhnak a tuahmi nule cu Jesuh nih a tlaihchan hna i ai bochan ve hna.

Cucaah Mother’s Day hi nule sinak na tlinh le tlinh lo i check nak ni ah Laimi nih hmang hram ko hna usih (fale sin in laksawng bawh ni lawngah hmang loin).

Credit: Aung Myint Thang

 

 

By Chuncha