US President Donald Trump nih raifanh-sii ka dinnak zarh khat cheu chung si cang tiah thawnglatu sinah a chim.

Fox News anchor hlun Neil Cavuto nih an mipi sinah ralrinnak a pek colh ve.

US President Donald Trump nih nizan thawngfianhnak a tuahnak ah thil khuaruahhar phun hnih a chim.

Thawnglatu pakhat cu mask aa hruk. Mask aa hruk bu in president cu bia a hal. “Zeicah na mask kha naa phoih ko lo?” tiah Trump nih a mask phoih a fial.

Donald Trump mask phoihter fialnak bia nih mi an khuaruah a harter. “Ka zoh uh, keimah zong mask cu kai hruk lo,” a ti hna.

Donald Trump nihcun, raifanh-sii hydroxychloroquine ka dinnak zarh khat le cheu si cang tiah aa phuan.

“White House siibawi nih maw an dinter?” tiah bia an hal. “Aw, si! White House doctor nih,” a ti.

Cu hnu ah, “ding ko” ti cun ka fial lo a ti ṭhan.

“Na duh maw?” ti in a ka hal i “Duh e,” ka ti a ti.

Trump nihcun, raifanh-sii cu keimah lawng si lo midang zong nih an hman cio ko a ti. Hmaikal ngandamnak rianṭuan pawl zong nih zawtnak in ikhamnak caah an din a ti. A dingmi an tam tuk tiah a chim chap.

Zawtnak rai nih a kan tlunh lo nakhnga, raifanh-sii dingtu cu kan tampi ko tiah a ti.

Trump bia ruang ah Fox News biachimtu Neil Cavuto cu a lau tuk. Mi vialte nih raifanh-sii an din cio lai ti a phaang.

Zeicahtiah raifanh-sii cu Covid-19 caah hman lo dingin FDA nih ralrinnak an pekmi a si. Cu pinah, sii-lei thiamsang kherhlaitu hna nih Covid-19 caah hmual a ngei lo ti an hmuh.

Hmual a ngeih lo pinah, mizaw a thihter chinchin ti zong an fehter khawh cangmi si fawn.

Cavuto nih Fox News zohtu pawl cu Hydroxychloroquine maw ding citcet lai uci a ti hna. “Raifanh-sii nihcun an thah hna lai” tiah a hrilhfiah hna.

St. Joseph University Hospital Chairman Dr. Bob Lahita nih raifanh-sii san a tlaih lonak kong a phuan ve.

“Covid-19 mizaw kan thlopnak ah dinte a zawmi siseh, a zual deuhmi si hna seh, hmual a ngei lo hrimhrim” tiah a ti.

Mr. Cavuto nih Fox News zohtu cu chun ah ralrinnak a pek hna. Nain adang pakhat in phundang in zan caan ah a chim ve.

 

 

By Chuncha