(BBC nih a tial ning tein lehmi asi siaherhnak he)

Malaria thlopnak sii (hydroxychloroquine) hi a him (safe) ruamlo dawkaw, tiin ngandamnak lei i official pawl nih ralrin an pek len ko bu zongah cun, US President Donald Trump nih hman a hun thok cang.

Malaria le lupus (thisen lei sawtnak tihnung taktak) thlopnak sii keimah pumpaak hrimhrim in hman kai thok cang, tiah Trump nih White House i biachimnak a ngeih lio ah thawnglatu hna sinah a chim. Hi sii phunhnih din kai thoknak hi zarh khat le a cheu a si cang i, a tu hihi ka si ko hi ta, tiin a ti hna.

Sibawi pawl nih malaria sii san a tlaih le tlaih lo an dothlat cuahmah lio a si. Coronavirus dohnak
ah san a tlaih le tlaih lo tette a um rih lo.

Trump Nih Zeidah A Chim?

Virus ruangah vava a tummi rawldawr ngeitu pawl cu Monday ah kum 73 a si cangmi President nih cun a ton hna. Cu a lio ah cun a tu bantukin a cunglei sii phunhnih a dinnak kong a chimh
Hna.

Minung zeizat remruam nih, abikin mizaw a thloptu suulpahtu hna ko nih, hi sii an din diam cang hi thei ve u law nan lau ko la. Tamtuk nih an din cang hi aw. Keimah lila zong nih a din kai thok ve cang, tiin a chimh hna.

Cu sii na dinmi thawngin zei thathnemnak tal na cungah a um el maw? tiin an hal. “Hi sii pawl an thatnak kong he pehtlaiin phone in thawng a ka thanhtu an tam ngai cang” tiin a leh hna. Hi sii a thatnak kong hi tamtuk in an chim. Tha hlah sehlaw cu kan chimh ko hna lai. Mah le mah fahnak pek cu keizong ka duh ve la maw zei. White House ah positive a piahmi an um ko bu ah, a nichiar ti awk cun pei test an ka tuah nain, “zero symptoms” ka piah peng ko hi, tiin a chimh hna.

Cun zinc ai telmi eidin le siai ka ei chih peng, cun nikhat ah azithromycin ril khat paoh ka din chih peng, tiah a ti.

Ziah hman dingah bia an chah rih lo mi sii na din cu White House sibawi pawl nih an in on ko le maw? tiin an hal. “Keimah nih ka nawl hna caah an ka onhmi a si” tiin a leh hna. Kan President ngandamnak a thatuk, symption free bak a si, tiin President a congtu sibawi Dr. Sean Conley nih Monday ah khan a chim.

Malaria sii a santlaihnak le tih a nunnak kong kan President he cuai kan thlai cikcek hnu, a thatnak nih a lerhdeuh ko hih, tiin biachahnak kan tuah, tiah US Navy officer nih a chim. US health officials nih teh zeidah an chim? Malaria sii din hi a him lo (safe a si lo), cun thathnemnak zong a ngei lo, tiin kan hnung thla ah khan US Food and Drug Adminstration (FDA) nih thawng an thanh. Coronavirus in a zawmi hna pawl an chiatchuattertu a si leh lam lai. Cucaah, sizung le cozah nih laakhruakin mizaw chiahnak an hmanmi inn le lo ah dah ti lo ah cun, hi sii hi kaadang ah hman lo ding a si lai, tiin FDA nih an chim.

US minung 90,000 lenglo a thattu le 1.5 million lenglo a tluntu coronavirus thlopnak sii hi a tutiang ah hmuhchuah a si rih lo, tiin CDC nih an chim.

Thawngpang phurtu cycle a mongh dan hi Trump nih ai thiamtuk Coronavirus khamnak sii chuah khawh a si cang lai, timi thawngpang bochan in stock market pawl cawlcangh hram an hun i thok in cun a nichiar ti awk in Trump cu deetkhawt a tong cang caah, restaurant businesses pawl ton ah ai thok. Meeting kham in a hung chuah le cangka, malaria sii kan dinnak hi zarh khat lenglo a si cang, tiin a chimhmi hna kong lawng te cu media pawl nih an hun i ceih lulh cang. Virus kong i thawngpangchia vialte ning le cang lo piin a khutthal hun leh a duh caah, a tu bantukin tonghmanglo piin bia a chim hi a si, tiin Trump a soiseltu pawl nih cun an hun thlircawipiak hrimhrim te lai. A cheukhat ca belte ah cun, Trump nih karhlannak a tuahmi kongah thawngtha a tlun ni, tiin an ruah ve lai.

Asiloah, khuaruahhar damnak sii, tiin tuan i malaria sii a rak faktukmi kha, kai vaiveek cang, ti phun in i let a duh ti lo caah a tu bantukin a chim lawlaw zong si sehlaw theih lo. Azei bantuk a va si hmanh ah, zapi hna cu a hun tunter viar than hoi ko hna hih. Hi kongah ai nuam ngai lai, ti cu lunghrimh awk a um lo.

Trump Nih Zeidah A Chim Rih?

Kan chimh khawhmi vial hna cu hihi a si: Ka tha huar ko hi aw. A thatlonak lei in thawngpang ka theihmi vialte hna hi keimah (Trump) a raalchanhtu pawl, science ningin thil a hmu kho lo mi hna pawl sinin a rami lawngte an si, tiin a chim.

A chim mi hna pawl cu, April lio i ralkap pensen pawl an thlopnak hna sizung i malaria sii san a tlai lo. Hi sii a dingmi hi a dinglo mi hna nakin an thi deuh lehlam, tiah a titu hna pawl hi an si.

Hi sii a thatnak kong hi tamtuk nih an ka chimh cang. Cucaah, zeihme sungh ding a um ti le? tiin thawnglatu pawl cu a hun ti hna.

Hi sii hi lung a hrawk khotu, mah le mah thah duhnak a chuahpi khotu, le thin a hrawk khotu a si, tiin sibawi pawl nih an chim. Media pawl capo: Pulrai a tlun lio ah Ramadan puai lio i rawlulh he ai khat ko lo naw hi?

A Dang Siiai Lei Mifim Pawl Chimmi Tah?

New York mizaw 1,400 hrawng malaria sii in kan thlop hna i a thathnemnak kan hmu lo, tiah hlathlaitu phu pahnih nih an chim. Sizung mizaw 84 le a dang tein thatein an thlopmi mining 97 cu malaria sii in kan thlop hna nain, a that zong an i thatpi lo, cun a chiat zong an chiatpi fawn lo, tiah French research tuahtu pawl nih an chim.

Coronavirus khamnak dingah malaria sii hman lo dingin American Medical Association, American Pharmacists Association and American Society of Health-System Pharmacists nih lungkhat tein kan hnung thla ah khan ralrinpeknak thawng an thanh. Malaria sii ka dirpi lo caah ka rian in an ka phuah, tiin April ah khan federal vaccine agency director Rick Bright nih a chim. Bright nih a chimmi cu Health deparment nih an cohlanpiak lo. Bright hi mi ingai chia riantuantu pakhat a si, tiin Trump le bangin nih cun a hi ti.

Credit: Chelsea Bawi

By Chuncha