Laimi cu Pathian zangfahnak thawngin ramleng ah fimnak cawn dingin a phanmi tampi um asi. Ram dang cu chim lo, India ram i bible sianginn kaimi hmanh hi kan tam ngaingai (milu fiangin ka thei lo), hlan deuhnak in tlawm cu kan tlawm deuh kho men, nain atu ah Lautu, Mara, Zotung, Zophei, Senthang, Zomi, Hakha, Thlantlang, ect.., tiin kan um hna, kan kainak khua tu cu adang cio.

Tukum 2019-2020 cacawn kum cu Covid 19 ruangah cheukhat Bible siangin cu February, March thla thawkka in sianginn an khaarpiak dih cang hna, cheukhat nih camipuai rang deuh in an tuahter hna i buaih(degree) an pek zokzok hna i an tlunter dih hna. Tamdeuh sianginn cu March le April thlacheu ah hin camipuai dih asi. Sihmanhsehlaw zawtnak ruangah nithla thawn in tuan deuh ah an phitter hna. Senate of Serampore College nih a tlaihmi sianginn dihlak tu cu March 24- April 17 tiang tuah ding a si, March 14 ah cunglei in, camipuai tuah hlan chung cu sianginn khaar ding tiah ca an rak chuah, Tlawmpal ah, campuai tha tein tuahko ding, class chung ah mask hruk onh ding le a hlat deuh in thutter ding ( thutpeng si ko nain), alu fakmi le damlomi cu class dang ah phitter ding tbt.. hna in ca an rak chuah than hoi, kan hawile cheukhat cu an zaicang, ca zohzong huamcio asi ti lo. Sihmanhsehlaw, March 19, ah Senate of Serampore nih a tlaihmi sianginn poah cu khaar dih ding le camipuai tu cu June 1 in tuah te ding tiah cunglei in ca an rak chuah than.

Kan i nuam ngai cio, nain tlunkalnak kongah lungrethei in kan um than. April 17 ah camipuai dihding a si caah 18 ca in train ticket le flight ticket lak cio asi, acheu cu Delhi lei chungkhat sin tlun dingin lak asi, cu vialte cu sunghdih dawh kan si cang (flight ticket cancel man thawngthum hrawng si i Indian airline hna cu cancel a ngah lo). Cheukhat nih flight le train ticket an lak than, sihmanhsehlaw Prime Minister Narendra Modi nih March 24 thawk in 21 chung lengchuah loin um ding (lockdown) siseh tiah nawl a chuah caah hohmanh kan tlung kho ti lo.

Kawlram in ara mi cu chimlo India ramchung um Mizo, Nagaland le Maghalaya hna hmanh tam deuh cu an tlung kho ti lo. Cu ticun Sianguk (principal) nih sianginn ah umnak nawl a kan pek i lungrethei ngai in kan um hna. Lungrethei in kan umnak a ruang bik cu, leng kan chuah ah Kala pawl nih an kan zoh dan a dik ti lo ( kan titsa a ngo deuh caah Tuluk ah an kan ruah) Corona ti hna in auh kan tong (sayapa cu an velhhnik), eidin le meh phunphun man a kai i fawi tein cawk a har cang. Cucaah pawngkam ruangah si seh, tangka kong ah siseh, eidin cawknak kongah siseh kan lungrethei ngaingai in kan um hna.

Chungkhat le ule nau nih zoh mi ka si ko nain cheukhat caah lungretheihnak a zual khun ko, aruang zohtu tha ngaingai ngeihlo cun khuaruah ah a pit ko. Hmunkhat umti ngam tuk a si lo, rawl ei caan le rawlchumh caan tbt hna lawngah kan i tong hna, principal nih lengchuak hlah u! tiah a kan hmuh poah ah hlasak in a kan sak hnawh, kan u le deuh nih meh hang cu an kan zalhpiak. Nikhat hnu nikhat in a lin chinchin, kan rawl ei ka thawlo (pakan nganpi in pakhat lawng kan ei..capo), kan i hngilh kho lo, kan chungkhar, u le nau, hawikom kan ngai hna, cu ticun zing a chuak, zaan a chuak kan caan a dih ko.

Pathian zangfahnak thawngin tutiang cu kan dam, rawl-ei ding kan ngei rih, hmailei kong belte cu hohmanh nih kan chim kho lo, kan biak Pathian kutchung ah a um mi a si. Cucaah u le nau, nu le pa, hawi le kom, Khrihfabu nan thlacam piaknak kan herh ko. Pathian sin ah thlacam piak rak kan philh sawh hlah u law kan nih zong nih thlacam piaknak kan in ngeih ve lengmang hna.

Biak Za Thawng

kan phanhnak aruang tu aa dang dih, cheukhat nih pawcawmnak fawi deuh ruangah kal si, cheukhat nih ram uknak chiat tuk ruang le tukle velh tawn ruangah, cheukhat ve nih fimnak cawn duh ah tbt.. in a ruang tampi ruangah phanh a si cio.

By Chuncha