Biakinn An Khar Tik Khalah Biaknak Baanghlah Uhsi – Thazaang Peknak ; Salai V Bawi Lian

Biakinn ah pungkhawmnak camkhat hrang tuah hrih lo dingin rampi thuneitu pawl le upa pawl in thuthan an tuah ko ding tiah zum a um. Hi dinhmun kan rak thleng khal asile, zumtu pakhat cioin mah le innsang tin ah Pathian biakkhawmnak le thangṭhatnak hi baang hlah uhsi.

Leitlun Hardamnak Bupi asimi World Health Organisation pawl in Covid -19 cu pulhnak hrikhat asi tiih an puan veten leitlun ram tinkim ah nat hri lak ihsi ralrinnak nei dingin acozah in thusuah a tuah. A tuah bet vivo lai ding.

Tui dinhmun tiangah Covid -19 hi leitlun pumhuap ram 123 ah nat ngahtu 132536 an um ih a thi 4947 an um.

Tuini tiang rampumhuap mipi punkhawmnak tuahlo dingih kharpitnak tuahtu ram pawl cu China, Italy, Norway, Denmark, Ireland pawl an si hrih. USA rampiin rampi lakhruak thuthan tuah dingin an timlam rero tiah thuthang a um. Australia ah mipi 500 hnakih tam pungkhawm lo dingin an than.

USA ih biakinn tumpi pakhat asimi Joel Osteen in a biakinn a khar ding thu a tlangthan, midang khalin an than bet vivo hrih lai ding tiah zum a um.

Punkhawmnak lawngah kan biakmi Pathian hi a sunglawi ringring cuanglo, bulpak innsang tin remawk caan, thlacam khawm caan, Bible siar khawm caan, Pathian biakkhawmnak caan tiin, thimkhawzing asimi tui caan hi, caan ṭha hman khawmnak tiin Pathian hrang caan hmang dingin tu ihsin timlam aw cio uhsi.

Ramtin um zumtu pawl ih thlacamnak thawn hi natsia khal kan Pathian in a damter thei asi. Kan Pastor pawl khalin tamsin le tuhnak ih ring sin in mipi thlacamnak nei dingin thazaang peknak le forhfialnak, Online par in siseh mah le Kawhhran tin ih neih cio mi social Networks tete ah Kawhhran mipi pawl Pathian thuthawn forhfialawknak caan ṭha ah rak la cio uh. Thazaang in rak pe cio uh!

Ṭihphannak le harsatnak lak ih a mipawl hnemtu le humhimtu Pathian ih thiltitheinak le a huham cahnak phuansuahnak caan ṭha a si. Zumtu pawl hrang Kumkhaw nunnak Thuthangṭha kan phuan theinak ding hrangah kan Bawipa ih caan in tuahsak mi a si tiin caan ṭha ah rak la cio uhsi.

Thihnak hawrkuam sung, nat hrih le thihnak, pulhsia le ral naam lak khalih a mi paw humhimtu kan Pathian, Jehovah Pathian hnenah thlacamnak khal ahlan hnak ih tam in nei cio uhsi.

Kan Bawipa ih in sim cia mi, a ratnak ding caan a naizia tilangtu pawl an siih kan ni zumtu pawl hrang kan Bible a famkim zia, kan biak Pathian ih thukam a rin um zia, Amah hnen lawngah nunnak, kumkhaw nunnak a um timi ringsin in, leitlun thimkhawzing a tlun rero laiah hin ausuah piin Amah Biaknak le thang ṭhatnak hi cawl hlah uhsi!!

Bawpa hnen ih hnangamnak le daihnak leitlun khuazakip ih zumtu pawl le hi ca a siartu pawl hnenah a tharin thleng hramseh!! Amen

Credit: C-Ministry

 

By Chuncha