Dr. James “Charlie” Mahoney hi Brooklyn ah kum 30 chung sibawi a tuan cangmi a si. Coronavirus doh ah suul a nam pengtu miraltha sibawi a si. A thisa nih a celh ti lo tiangin chungzaan in midang nunnak khamhnak rian le Coronavirus doh rian lawng ai hmaithlaaktu pa a si. 1982 ah University Hospital of Brooklyn, SUNY Downstate, ah sii lei a cawng i, coronavirus nih US a hun deen tiangin mizualhma pawl thlopbultu sibawi rian a tuan.

Coronavirus nih a hun kan phaak le cangka, hawihlanbik ah hmai a suangtu paraltha a si. Anih hi kan suuttungpi a si. Minung hawi khamh rian hi a Pathian kawhauhnak ah ai ruah zungzaltu pa a si, tiin SUNY Downstate ah a ummi Pulmonary and Critical Care Division i an lubik Dr. Robert Foronjy nih a chim.

Mahoney hi kum 62 a si ve cang caah, a kum le a ngandamnak ruahah cun, pulrai a tlun lio ah hin hnunglei ah daitein a tolh ziar kho a si ve ko. Cu ti hnunglei tolh cu a ruah hrimh a ruah bal lo mi thil a si, tiah a chungkhar le a riantuanhawi sibawi pawl nih an chim.

Tutan pulrai hi kum 60 cung minung le zawtnak in a kuahmi pawl an ca ko ah tihnung a si khun, tiah CDCP zong nih ralrinpeknak an rak tuah bal ko cang. A kum le a ngandamnak kongah khan chungkhar in kan lungre a cu a thei ve ko e, asinain, a rian hu tuan lo ding cun kanmah zong nih kan ruat phaak kho lo, tiah a fanu nih CNN ah a chim.

Ka pa cu hnungtolh ding phun a si lo, a bomh khawh zat minung pawl vung bomh ai tim peng ko lai, tiah a fanu Stephanie Mahoney nih a chim.

A mizaw pawl nih zeitik caan paoh i ton khawh dingin ai tuah. A cell phone number hi a pek peng hna. Downstate innnganbi (hall) chung i ai chokmi mayor ko khi a lo, tiah Dr. Foronjy nih a chim.

Sizung campus chungah a chungkhar an um. A upa Dr. Melvin Mahoney hi kan sizung i sibawi a si. Ka pa le a upa cu siai kong i sizung nih an chuahmi ca chung zongah an i tel tawn, tiah a fanu nih a chim.

Mahoney hi Charlie tiin an theih bik i, anih hi academic sizung zongah cachim bawmtu a si. Sibawi rian a tuan chungah hin sii sianghngakchia pawl tampi a domhtlaitu le a hruaitu hna saya pakhat zong a si. A caan le bangah cun an liang hna “phuk” tiin a hei bengh tawn hna. An angki hna a hun remhpiak thulh tawn hna. An zawn a ruah taktak hna kha a sianghngakchia nih an theih zungzal, tiah Foronjy nih a chim.

“Ka Pa cu Tuanbia Chimh a Thiamtakmi a si”

Vytas Vaitkus hi cuap lei sibawi pakhat a si i Mahoney kut tangah kum 7 chung ca a cawngmi a si. 2013 lio ah khan voikhat cu mizaw pakhat kha Vaitkus nih Mahoney sinah ap a duh. Mahoney hi a min a thantuk caah, a zenh ngai nain, a sin a vung phaakpi taktak tikah cun, khualrangtein a mizaw cu a rak chohlanpiak colh.

Mizaw le a sining kong ka chim lai ka di dungdang ah khin amah (Mahoney) tu nih a hun ka hal. Ka thaw a hei chuah khawh ning cu amah khi si, tiah Vaitkus nih a chim.

A fale rual biachimmi:

Ka pa hi tuanbia chim a tuantukmi a si. Tuanbia a kan chimh ah hin ai biataktuk tawn i amah hi minta (tuanbia chung nawl) nawl a cawng tawn. Nih zong hi a chuaktuk tawn, tiah a fanu nih a chim.

Coronavirus ai thokka hrawng i mizaw pawl thlop hi thluak le pumpa a baa ngaingai i cu bantuk lio caan ko ah cun Mahoney hi thazaang a tluntertu a si zungzal. March tein khan New York City hi virus ai hlumnak hmun ah ruah a si i mizaw 191,000 an umnak asi. SUNY Downstate ah a ummi mizaw vialte hi virus nih a tlunhmi mizaw lawngte an si dih. Hi kan sizung hi governor Cuomo nih virus dohnak lawngah hman dingin nawl a pekmi sizung 3 lakah ai tel ve mi a si. April thokka i CNN nih a kan len lio suimilaam pakhat chung te lawng hmanh ah cun minung 4 bak virus in a thi.

Ka fanu, pulrai a thokka i a tu bantuk thil kan tonmi hi sibawi rian a ka tuan chung vialte ah a harbik ni a si lai, tiah ka pa nih cun a hun ka chonh, tiin a fanu nih a chim.

‘Ka ca i a pakhatnak, ka hawi thabik le ka ca i mi raltha (hero)”

SUNY Downstate ah hin chunni tang (day shifts) lawng a tuan ko nain, zaan paoh ah hin Kings County Hospital Center ah le sizung a phan lo mi mizaw veh ah caan a la peng, tiah a fale nih an chim. A fale rual cu Jamie, 31, Stephanie, 27, le Ryan, 25 an si hna.

Chun ah hin midangnak in a riantuan caan a tamdeuh lai, tiah na ruah thiam rih ko lai, tiin a fanu nih a chim. A fale hi an than rualrual in lentecelhnak lei ah a mersan hna. Zeitluk hmanh in rian ah i hnim in sizung ah suimilaam saupi chung tuan hmanh sehlaw, ka caah ai hmanh peng. Nikhat hi Downstate ah a um, a thaizaan hi Kings County ah, chun ai manh caan ah ka team pawl nii a kan piah, cun a don zong a kan don tawn. Kan sinah a um peng kho rih, tiah a fapa Ryan Mahoney nih a chim.

Ryan hi a pa bantuk tein collegiate baseball ai celh ve i Rutgeres University ah sii lei sianginn a kai lio ve.

Ka tuahmi thil kip ah lam a ka hmuhsak. Papa hi ‘Ka ca i a pakhatnak, ka hawi thabik le ka ralthabik pa (hero)” a si, tiah Ryan nih a chim.

Ka pa nih hin siai kong zong a ka chimh pah tawn. A nunnak tuanbia cawn awk tampi a um ko bu ah, thilsining tampi a kan cawnpiak, zeibantuk in dah kan nun can lai, timi kong zong a kan cawnpiak peng. Thil tuah ningcang hei ti bantuk, khi a kan cawnpiak, tiah Howard University ah law a kai lio mi a fanu Stephanei nih a chim.

A kan hringtu kan pa hi rian ai zuammi le tha a chuah pengmi a si, tiah a fale rual nih an chim. Ka pa hi chungkhar in khualtlawn a uar ngai. Tilawng in khuatlawn hi a uar khun. Kanmah chung lawng si lo in, ka pa hi unau rual 5 a ngeih hna caah, cu a nunau rual le an chungkhar le tiin cun a bubu in vacations kan tuah tawn, tiah a fanu nih a chim.

Casino ah hin Craps ai kah pah tawn, chimh a duhmi paoh cu a chimh tawn hna. Tutan pulrai a thian le cangka vacation chuahti kan i tim hna. Ka pa hi riantuan re a thei ko nain, nuamtein khua a sami a si. Coronavirus nih a hun den lio hmanh hin, “Khual tlawn ding kha kan lettaak hna a hua ko ne, a poitak si” tiin a ti salam khawh.

A Dongh Tiangin Sibawi Rian ai Tlaih

Downstate i doctors pawl nih teimaak chuah in an zohkhenh mizaw pawl cu April dih lei sang khan cun an hung tlawmdeuh ngai cang. Cu lio hrawngah cun Mahoney hi virus nih tlunh sehlaw a dawh. ICU a herhmi zong an umti lo ngacha khi a si. Virus kan doh khawh ngai ko cang, ti kan hun i ruah bakah a tu bantuk in Dr. Mahoney kongah kan hun i thlahphawih hi a si.

Ka cekne tiang a ka runh ko e. Mizaw hna caah na si khawh chung cun pei thazang na chuah peng ko cu. Ka thlarau nun tiang a uai dih, tiin a sibawi hawi nih a chim.

A tak linhnak hi zarh khat a ren ti lo cash amah tein a tuannak sizung i emergency department ah ai vai check, tiah a chungkhar nih an chim.

Anih cu a dih donghnak tiangin sibawi a si e. Zungthiamnak le tlamtlinnak ai ngeihtu pa a si. A kan liamtaak mi hi cu a faaktukmi sunghnak a si ko e, tiin Foronjy nih a chim.

Virus in a thimi a dang minung thong tampi hna hi cu an thih lio ah an ruak a zuanmuaitu thitha in an i ngeih kho hna lo nain, Mahoney belte hi cu a thihnak (a tuannak) sizung ah amah a dawtu pawl nih a donghnak a kut tlaihnak ah an vung telpi.

Caan saupi a sianghnakchia a simi Vaitkus zong nih cun ICU he a kuah lio ah a sayapa Mahoney cu a tu le tu a vung veh. A zawt a zualtuk lio caan hmanh ah hin veel a ngei i ai toidor i a nun a neem i vung len hi a nuam ka ti tuk e. Kan saya a si ko bu zongah cun kan toi ah ai dor i, ICU he a nunnak ni le thla a rel lio ko zongah cun “Nan ka len caah kai lawmtuk e” tiin lomhbia a hun chim kho rih, tiin Vaitkus nih a chim.

Oxygen tuun a hauh cang caah, SUNY Downstate i riantuantu pawl nih cun Dr. Mahoney cu NYU Langone Hospital lei ah an vung thial. April 27 i an thialnak hmun an phaak le cangka virus thazaang cu a hun lalh kho ti lo.

Cu in cun a thlarau nih cun a hun kan chuahtaak colh ve. Mipi nih zeitluk in dah an dawt, kan sizung caah zeitluk dah mibiapi a si, ti cu a thihni nih a langhter ko. A kan lohtaak ruangmang mi hi a cohlan a har ko. A mikip zong nih a cohlan an i herh ve cio ko lai dah. A liamcia thla khat, thla hnih lio ah khan khuate zat minung hi an thih ka hmuh ko hna. Asinain, amah bantuk mitha nih a kan liamtaak hi cu a faak hringhran ko, tiin a hawidawt Foronjy nih a chim.

Dr. Mahoney philhlonak ah, tiin Foronjy nih GoFundMe a ser i sii lei a kaimi sianghngakchia bomhnak $30,000 fund raise a tuah. A thih hnu zarh khat hnih chung kha cu a dawtmi a hawile pawl le mising pipi hmanh nih a taantaakmi a fale rual sinah an ngaihchiatnak an nun langhter cio hna.

A tu bantuk i mikip nih an dawtnak an langhtermi ka zoh tikah, ka pa hi an rak dawt tatak ti ka theih i, cun amah ka pa hrimhrim zong nih minung tamtuk a rak bomhchanh hna, ti hi ka hun fiang. Kai lunghmuhtuk. A fanu ka simi nakin i uapi ding ka ngei hlei ti lo e, tiin a fanu Stephanei nih a chim.

BY : Chelsea Bawi

 

 

By Chuncha