Barak Obama le a nupi, Michelle Obama zong online video a tuahtu, Netflix ah political documentaries tuah ding in Netflix company he hnathlaknak minthut nak an tuah ve. Obama te nupa nih a tlawm bik in 100 million cu an hmuh lai tiah ruah a si. Obama te nupa nih Netflix I riantuan ding in hnathlaknak an ngeih tlawn pal ah, Obama president a tuah lio I, national security advisor a rak tuanmi, Susan Rice zong Netflix Board of Directors ah rian an pek colh ve. Susan Rice nih hin MSBC TV ah President Donald Trump nih ramdang mi [ Russia] sin in information le ruahnak a laak lai tiah a zumhnak kong in President Trump cu soisel a thawk ve. CNN nih rian an pekmi Obama minung James Clapper nih CNN in President Donald Trump nih 2016 thimnak lio ah Russia sin in bawmhnak a hal ti in biatak tein soiselnak a tuah.


CNN nih Trump sualnak kawltu dingah CIA le FBI a rak tuan balmi zong rian an pek hna. Mah hna cu CIA director a rak tuan balmi, Mchael Hayden, CIA agent hlun, Steven Hall, FBI agent hlun, Asha Rangappa, FBI agent hlun James Gagliano, hlan lio Deputy National Security Adviser Tony Blinken le hlan lio national security council adviser Samantha Vinograd hna an si. Mah vialte hi CNN nih Trump dotu dingah an hlanmi hna an si. Mah hna nih hin Donald Trump tlamtlin lonak pakhat khat an hmuh ahcun chun le zan in media hmang in sum phomh in an pomh I an soisel.

Obama nih a ttih bikmi cu Media I soisel a si an ti. Election Campaign on Accountability Data I an hmuhning ahcun White House i Obama a um lio ah hin Google palai pawl cu zarh khat ah meting a tlawm bik voikhat lengmang White House ah an kai ve ti a si. Obama kutang ah rian a tuanmi balmi, minung 250 cu Google company le Google he a pehtlai mi company ah rian an lut dih ti a si. Google executive chairman a rak tuanmi Eric Schmidt pumpak hrimhrim nih Obama election campaign ah biatak tein a rak bawmh.

Relchap<<Obama nih President in a chuah hnu thla hnih ah California state, San Jose khua, Fairmont Hotel ah technology company I hruaitu pawl a rak ton than hna I a lemsoi hna ti a si. Mah tonnak ahcun Obama President a tuan lio I, Cyber Security policy director Nathanial Gleicher [ atu ahcun Facebook cybersecurity lutlai a tuan cang] department of homeland security analyst a rak tuanmi, Jason Ally [ atu cu Google ah search quality analyst a tuan cang], NSA analyst a rak tuanmi, Andrew Honig [atu cu Google ah software engineering manager a tuan cang] mi hna an I tel. Google le Facebook ah hin hlan lio Obama minung hna nih hmunhma tampi an laak khawh caah Google le Facebook hmang in mipi sin ah a dik lomi information tampi an pek hna. Democrats party le liberal ruahnak pom ding in mipi sin ah information tampi an pek hna. Republican le Donald Trump he a pehtlai mi thawngpang le information tampi cu fawite in mipi nih kawl khawh lo ding in renghnak an tuah ti a si. Conservative pawl ruahnak le Pathian zumhnak he a pehtlai mi khrihfa pawl cabia le thawngpang poah cu fingrilh in an rilh hmasa lengmang ti a si.

Obama Minung Hna Nih Media Hmang In President Trump An Doh
Senate Judiciary Committtee nih July 17, 2019 ni I hearing an tuahmi ah Dr.Robert Epstein nih testified a tuahmi ahcun Google search engine nih hin 2016 President election lio ah thimfung thlatu minung million pakhat tluk cu lung aw-tawm in a tuah hna I, democrats le Hillary Clinton lei ah thimfung thla ding in an lung a laak khawh hna tiah a chim. Vawleicung minung 90% nih Google cu thil kawlnak ah an hman bikmi engine a si. Google nih a ngeihmi, You Tube zong cu Google engineers hna nih conservative ruahnak le information an chiahmi le an thlahmi poah cu American mipi zoh kho lo ding in an tuah piak hna. Cucaah President Trump nih mainstream media pawl, Google, You Tube le Twitter cu mah bantuk in censor nan tuahmi hi American constitution nih a pekmi zalong tein chimnak nawl a kan pekmi nan buar a si, “ It is actually a weapon used by radical socialist to attack both God and America” tiah a ti hna. 2016 President thimnak ah democrats pawl cu President thutdan an sung, Senate zongah an sung, Supreme Court zongah an sungah. Asinain Democrats pawl nih Silicon Valley [Amazon, Facebook, Google,Microsoft ] le US mainstream media pawl an tlaih khawh hna caah minung tampi cu media hmang in an thluak an tawl hna. Laimi lak ah bochan mi kan pale hna le pastor cheukhat pawl hmanh an thluak an tawl cang ngai hna.

Biafunnak: US i minthang media tam deuh cu left wing Liberal Democrats pawl ruahnak a pommi main stream media hna nih hmunhma tam deuh an laak i an hip deuh hrimhrim ko tiah ka ruah. Conservative ruahnak le Pathian zumtu hna ruahnak a simi poah cu an doh I, khrihfa zumhnak tiang fil dihlak in an tuah. Liberal ruahnak cu mama khaih in an kan khaih . Mainstream media lawng zing chiar, zan chiar a zohmi hna caah cun I zumh lo awk zong cu a tha lo. Ca a rel lomi, zumhnak a fek lomi le tlaithleng hrihhram a ngei lomi caah cun liberal ruahnak nih thluak tawl a fawite. Kan i theih lo le kan i hngalh lo kar ah liberal ruahnak nih huansam tein a kan phum ziahmah. Thil dik hi a hram thawk ah a thup tawn, asinain thil dik nih a donghnak ah teinak a co zungzal.credit:salai Lairamthang.

Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.

Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor.

By Chuncha