CNLD Thantlang Caankarlak Tawlrelbu sinin Mizapi Nawlnak le Theihternak; A hmasa bik ah Chin National League for Democracy (CNLD), Thantlang Peng kan konglam kong i mizapi lungtha loin kan in umtermi hna cungah CNLD Thantlang, Caankarlak Tawlrelbu nih toidornak he kan in nawl hna. Hakha – Thantlang peng CNLD nih phungning tein a ralaimi 2020 thimnak ah Campaign Specialist in tuanvo pekmi Salai Mang Hre Lian telpi nakin CNLD Thantlang, Caankarlak Tawlrelbu kan dirh. Caankarlak Tawlrelbu nih July 13 tonbiaruahnak kan ngeih hnu ah a tanglei bantuk in mizapi sinah nawlnak le thil sining theihternak kan in tuah hna.

1. CNLD CEC nih July 11, 2020 ah nawlthanhnak ca No. 02/2020 in a chuahmi cu Thantlang CNLD Caankarlak Tawlrelbu nih kan cohlan. 2. CNLD, Thantlang Peng in EC tuanvo ngeitu Pu Lal Maung Cung (Chairman) le Pu Tum Sang (Secretary) CEC nih an phuahmi hna cungah kan lung a tha lo. Kum (10) renglo Chin miphun le ram caah tiin CNP, CNDP in CNLD dirh a si tiang an cawlcanghnak le rian an tuannak cungah upatnak kan pek hna.

3. Thantlang CNLD Caankarlak Tawlreltubu nih a rauh hlan ah CEC tlangtlaknak in CNLD Thantlang Peng EC kan dirh than lai i a ralaimi 2020 thimnak ah MP aa cuhding Candidate thanhnak kan tuah colh lai. 4. CNLD cu miphun caah mumai, phungphai he rian a tuanmi kan si caah CNLD kan phunghram ning tein a um ciami Thantlang EC dihlak itel khawhnak a lam kawl in hmainawr le tuanchuah kan izuam lai.

 

5. Nihin kan dirhmun cu miphun caah lungrual tein karhlan caan a si bantuk in pumpak kong hnuchit tak in miphun le ram caah papek in riantuanti cio dingah upatnak he kan in sawm hna. Thantlang Peng CNLD riantuannak chungah itheihthiam lonak le mizapi lung kan in nuamhter lomi hna cungah Chin ram le Chin miphun a dawtu dihlak nih a ruahzia nan kan thiam naklai Bawi Khrih min in kan in nawl hna.

6. Chin miphun le ram a daw i CNLD a kan tanpi zungzal tu nan dihlak cungah tampi kan lung ai lawm. CNLD cu Chin miphun le Chin ram pakhatnak ah a chia zungzaltu a si bantuk in Chin mipi hmaizahnak he mizapi duhning in riantuan kan izuam zungzal lai tiah upatnak he thawng kan in thanh hna.

Pu Siang Cung Bik, EC Chungtel, CNLD Thantlang, Chairman Hlun (2010 – 2015)xxxxxxx Pu Thawng Hnin EC Chungtel, CNLD Thantlang Vice Chairman Hlun (2010 – 2015)

 Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.

Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor.

By Chuncha