CNLD hlathar cu a tha hringhran ko. hla le bia an timi hi a dik ngaingai. bia longin a za lo i, hla zong nih thil tampi lai a rel ve caah an hlasakmi le a bia zong uar a um tuk hringhran. atu tan hlasa mi hna cu chinmi hlasak thiam minthang lawng te an si, an hlasak ning pawl zoh tikah zoh an cim lo, an i dawh dih, an thiam dih, mah ti hin CNLD a thawnve khawhnak hnga i funtom caan a cu tiin hlasaknak in aupi chin ko uh. hla phantu zong a thiam bak, video a tang cem ah zoh khawh a si lai.

CNLD Nih Chinram Ah Cozah Tha A Ser Lai: Tukum 2020 Myanmar Ram thimnak ah Ramkomh huap in Coalition cozah a va chuahkhawh lo i, NLD nih Cozah a va ser hmanh ah Chin State ahcun Cozah loin kan ihruai lai ti ka zumh. A si loah CNLD nih a chak a tlaihmi Cozah a si te lai ka zumh. Cucu Cozah thatukmi zong a si fawn lai ka zumh fawn.

A ruang cu; Chin State ah Pyine Hluttaw 24 a um. Cu chungah 6 cu Ralkap an si. A taangmi 18 hi mipi nih thimmi Palai an si. Cu 24 chung ahcun Palai 13 a tlingmi Party nih Hluttaw Speaker a tlaih lai. Hluttaw Speaker tlaihkhawhnak ca i Palai 13 tlin ding ahhin USDP cu Ralkap nih a ngeihmi Party a si caah Palai 7 an tlin ahcun Ralkap 6 he fonh in Hluttaw an tlaih khawh. Nain tukum hi Pyine Palai caah USDP pakhat hmanh an tlin lai zumh a um lo. USDP Palai pakhat hmanh an tlin lai zumh a um lo caah Ralkap 6 lawng in chia chung ko usih.

A tangmi 18 ah ZCD hi Palai 3 cu an hmuh lai ka zumh. CNLD nih Palai 10 a hmuh lai ka zumh. NLD nih Palai 5 an hmuh lai ka zumh ve. Si cun Ralkap 6 cu chia rih u sihlaw ZCD Palai 3 hi NLD Palai 5 he an va ifonh hmanh ah Palai 8 lawng an phan lai. Cucaah CNLD nih Palai 10 in Hluttaw a tlaih khawh lai tinak a si. USDP le NLD nih miaknak ah an hman veve mi 261 ningah Ramkomh President nih Ramkulh CM thim ko hmanh sehlaw Ramkulh Hluttaw nih a hnatlakpi a hau. Cun Ramkulh Hluttaw nih CM ding nominate a tuah kho lo timi phunghram ah aa um fawn lo caah Ramkulh Hluttaw nih nominate a tuah khawh tinak a si ko.

NLD zong nih Union Hluttaw thazaang in State Counsellor an ser ve ko cu mu. Cucaah Ramkulh Hluttaw nih CM ding nominate a tuahmi thim loin Ramkulh Hluttaw nih a hnatlakpi lomi lehlam a thim ahcun Chin State nih Cozah kan ngei lo ti khawh a si lai. A ruang cu Ramkulh Hluttaw duhnak tel loin zei rian hmanh a tuan kho lai lo. Cucaah Ramkomh President nih Chin State ah Cozah tha chuak seh ti a duh ahcun Palai tambik a ngeimi CNLD chungin CM a thim hna a hau lai.

Rakhine State i an tonmi nih tampi a fianter ko cang caah Palai tambik ngeimi Party chungin CM a thim lai zong ka zumh. Cucaah 2021 in 2025 tiang cu CNLD nih full in Cozah an tlaih lo hmanh CNLD nih Hluttaw thazaang in a renghmi Cozah tal cu a si hrim lai. Hluttaw nih a renghmi Cozah cu Cozah a si tung i Cozah alo lomi khi a va si ko. Phundang cun CNLD nih hluttaw in a renghmi Cozah a si lai caah Cozah fel taktak a chuak lai tinak khi a va si than. Cucaah CNLD nih Cozah a tlai kho lai lo tiah tanpi duh loin um hlah usih. Cozah an tlaih khawh lo hmanh ah Cozah fel taktak an chuah ter khawh lai caah CNLD ah ifun dih ko usih.

Biahleivuang deuh ah, A cunglei sining nih zeidah a langhter? Chinmi kanpipu hna hna nih an kan rohtakmi Kan Chinram teah miphundang le Chin aa ti duh lomi hna nih Chinmi an kan zuamcawh ning hmuh khawh a si. Kan pupa hna rohtakmi Kan Chinram teah miphundang nih an kan zuamcawh hi Kan Chinram te hi na zaang a fak ve lo maw? Chinram le Chin Miphun ihrim tualmal ko. Catialtu: Acei-Salai Sang Ceu Lian

Note: Mipi sinah lunglawmhnak le zaangfah nawlnak: Thawngpang {News}kan tialmi a kan relpiak tu kan Miphun Chin/Laimi nan dihlak cungah lunglawmhnak tampi chim cawklo kan ngei. Thawngpang kan tialmi nan kan relpiaknak thawngin a dikmi le a hmaanmi thawngpang {News} kan thlah{Post}khawh hi mipi nan thawngin asi.

Thawngpang kan tialmi hi careltu mipi caah thathnemnak si hram seh tihi kan itinhmi asi. Chirhchanh {Source} kan lak hnu ah a dik mi asi lai tiah kan ruah mi kha kan Miphun Laimi {Chinmi} nih fawizang tein kan theih khawh cio nakhnga theihter khawh kan i zuam. Asinain vawleicung cu tlamtlinlonak a si caah chirhchanh {Source} kan lakmi tete hi a dik lomi a um khawh caah a dik lomi thawngpang a si tiah nan ruahmi kha zeitik caan paoh ah theihter khawh kan si i, kanmah lei zong in a dikmi thawngpang tial khawh le kan palhmi remh khawh kan i zuam lai.

Mipi nih theih le hngalh ve hna seh ti na duhmi, thawngpang {News} siseh, Pathian bia siseh, siaherhnak bia in siseh, capar biazai le theihtlai pawl tialpiak ding a um ahcun zeitik caan poah ah tialpiak le thlahpiak khawh zong a si. Nan dihlak cungah lunglawmhnak le zaangfah nawlnak he- Lungleng Tlang Editor

 

By Chuncha