CNF nih CNLD hi a tanh taktak maw?: Kan ram hi 1962 in nihin tiang ralkap nih a kan uk. Minung tampi nih cun atu hi Daw Su hruaimi NLD cozah nih a kan uk an ti kho men. 2008 phunghrampi ruangah NLD hruaimi cozah nih cun thanhchonnak te lawng a tuah khawhmi a si. Uknak (administration) timi biafang, a herh bikmi nawlngeihnak vialte cu ralkap kut ah a um dih. Cu ralkap kut in luat khawhnak lam cu miphun kip nih kan duh ciomi a si. 2008 phunghrampi timi cu kan ram hi ralkap nih zungzal a kan uk dingah nawlpeknak phunghrampi a si.

2010 thimnak an tuah lioah party hme le miphun party pawl lawng an lut caah ralkap party USDP nih cozah a kalpi. Mah lioah cun mipi nih vote pek zong pek lo zong USDP nih cozah kalpi ding a si ko. Kum 5 a kalpi hnuah 2015 ah thimnak an tuah than tikah cun NLD a lut cang caah mipi nih ralkap kut in a kan luatter khomi le kan ram caah thatnak a tuah khotu ding tiin vote an pek i NLD cozah nih kum 5 a kan kalpi. NLD cozah nih cun thil tha tampi tuah a duh ko nain 2008 phunghrampi ruangah a duh ningin kalpi khawh a si lo.

Ralkap uknak duh lo ruangah Chinram le Chin miphun dawtu pawl nih ramdang an chuak i CNF an dirh. Hi CNF min in an duhmi vialte ralkap cozah sinah an hal. Hriamtlaihtu caah CNA zong an dirh. Ralkap nih kan uk hlah sehlaw CNF le CNA hi a um hrimhrim lai lo. Miphun dang hriamtlaih pawl zong an um ve lai lo, Ralkap doh dingah ramleng a chuakmi lawngte an si. USDP hi 2008 phunghrampi rawkral lo dingin zohkhentu le dirkamtu caah dirhmi ralkap party a si. 2008 phunghrampi remh ding le a thar sernak nawl cu USDP kut ah a um caah USDP hi tanh u timi bia zong hlennak bia a si.

CNLD hi Chin miphun party a si caah Chin minung vialte tanh ding a si tiah hruaitu le tanhtu cheukhat nih an chim. Cheukhat nih CNLD tanh hi CNF tanh a si ve an ti. CNLD hruaitu pawl chiatnak le thatnak kong hi ka chim duhmi a si lo. Naite ah CNLD hruaitu Pu Ngai Sak nih Interview an tuahnak ah CNLD cu aho party he hmanh komhnak a ngei lo, zei party he hmanh Kawi (alliance) a tuah lo a ti. Kan Covo ‘Federal Democracy’ hmuh khawh dingah kanmah lawngin kan dirmi a si a ti.

USDP nih Tinhmi (14), a ngei i cuhna lakah Democracy le Federal kan hmuh khawhnak dingah timi point hi 2021 in tuanchuah khawh dingah party (29) nih USDP he Kawi (alliance) an tuah. Cuhna cu, 1. National Unity Party (NUP), 2. National Development Party (NDP) 3. Modern People Party (MPP) 4. Democratic Party (Myanmar) (DP) 5. National Political Alliance League (NPAL) 6. New Era Union Party (NEUP) 7. Democracy and Peace Party (DPP) 8. Lisu National Development Party (LNDP) 9. Inn National Development Party (INDP) 10. Non Thamu Democratic Party (NTDP) 11. New National Democracy Party (NNDP) 12. Myanmar National Congress (MNC) 13. Rakhine State National United Party (RSNUP) 14. Mro National Development Party (MNDP) 15. Public Contribute Students Party (PCSP) 16. Union Farmers and Workers Force Party (UFWFP)

17. People’s Party (PP) 18. Peace and Diversity Party (PDP) 19. 88 Generation Democracy Party (88GDP) 20. Wa National Party (WNP) 21. National Democratic Force (NDF) 22. Pao National Organization (PNO) 23. Myanmar Farmers Development Party (MFDP) 24. Bamar People’s Party (BPP) 25. Union Democracy Party (UDP) 26. Kayin People’s Party (KPP) 27. Chin National League for Democracy (CNLD) 28. Federal Union Party (FUP) 29. Shan Nationalities Democracy Party (SNDP) Dated 15, 2020 ပုံႏွိပ္ထုတ္ေဝခြင့္အမွတ္- ဦးတင္ေအာင္ (၀၁၄၁၂) USDP Thantlang. Party hruaitu pawl nih a thli tein Kawi an sermi a si ti kha Thantlang USDP nih a ruat manh lo ruangah hi Biathli hi a chuaksualmi a si.

Party Alliance tuahmi cu township level in tuah khawh a si lo. Center lawng tuahmi a si. Ralkap uknak duh lo ruangah ramtang a chuakmi CNF nih a dohmi ralkap bochan in ralkap party USDP cu nangmah lo cun tiin Kawi a ser lai maw? 2008 phunghrampi cu Hlutraw Chungah remh khawh lo zongah Hluttaw Lengin remh khawhnak lam kan kawl lai an ti I “21st Century Panlung” tiah min an sak. “Union Peace Conference” tiah. Tlangtar in meeting cu vawi tampi an tuah cang. Party aiawhtu, Miphun aiawhtu, Mibu aiawhtu, Hriamtlaih aiawhtu, Cozah aiawhtu, etc dihlak thanuam ngaiin Meeting an kai lengmang.

An duhmi pek le pek lo ding nawlngeitu cu Daw Su zong a si lo, President zong a si lo, Ralkap a si. Ralkap nih an duhmi thil hi pakhat hmanh pek a duh hna lo. Ralkap nih Federal zong a duh lo, Peace zong a duh lo, 2008 phunghrampi remh zong a duh lo. 2019 ah NLD cozah nih 2008 phunghrampi remh ding a ti nain ralkap le a minung usdp kozale pawl nih an duh lo caah remh khawh a si ti lo. Cucaah Lam dang kawl a herh cang. Federal kong hi 2008 phunghrampi ah a tel lo. Hluttaw Lengin chuakpi an duh zongah ralkap leiin a lenglei agenda cu rak chuakpi hlah, 2008 phunghrampi chung lawng chuakpi khawh a si ti si ko.

2008 phunghrampi chungin CNLD nih Federal Democracy kan kawl lai a ti. Hi kong hi ramdang ah va hal khawhmi zong a si lo. Duhmi cio hal khawh le hmuh khawh a si ahcun atu hi an hmuh dih cang lai. Cun phunghrampi nih central cozah nih ramkulh cozah a tlaih lai a timi cu central cozah a si khawh lo dingmi miphun party CNLD nih cozah kan tlaih khawh lai timi bia tehna chim in mipi hlen ding a si lo. Lungfimlo caah cun an zumh ko lai, zumh hlah ti khawh zong a si lo. 2010 ah Chin party nih mp seat 18 chungah 10 teinak a hmuh i cozah cu usdp nih a tlaih. Chin party nih Chin cozah tlaih khawhnak lam cu 2008 Phunghrampi nih a siang lo timi hi mipi caah hngalh a herh tukmi a si.

Ralkap lungput cu a cunglei ah ka langhter dih cang. A cunglei party (29) pawl nih ralkap party
USDP bochan in Kawi an ser cang. CNLD zong a tel ve cang. CNF nih a dohmi le a huatmi ralkap cu nangmah lawng Federal Democracy na kan pek khawh tiin panh a duh taktak lai maw? Hi Ca reltu nan dihlak tha tein khuaruat cio tuah u. CNF nih a dohmi ralkap cu a bochan taktak lai maw ti cu amah nih a hngalh bik lai. CNLD tanhtu pawl zong tha tein ruat tuah u! Ralkap hi nan bochan taktak maw? Ralkap lawng nih Federal Democracy a kan pek khawh nan ti ve maw?

Politics cu duh ning le pomh ning cio in dirpi khawh a si ko. Ralkap ruangah sifak bikmi ram kan si cang kan ti lioah ralkap lawng kan duhmi a kan pek khawh tiah panh a duhmi nan si ko ahcun nanmah nawl si ko! Tanh taktak ko ahcun kan hnu thla ah Ralbawizik Min Aung Hlaing a tongmi party (34) le Kawi a sermi (29) party vialte cu 2008 phunghrampi dirkamtu an si dih cang. Kum 5 chung nawlngeihnak ca lawng khua an ruat cang. Tefa chan tiang ram thatnak an ruat duh ti lo. CNF nih CNLD hi a tanh taktak ahcun CNF zong 2008 phunghrampi dirkamtu a si ve tinak a si. A si le si lo cu hruaitu pawl nih an hngalh bik lai. Pumpak cio iruat cio usih. Catialtu: Laiki Chozah (11.9.2020)

By Chuncha