Chinram Caah Electric Mei; National Grid timi Mahadat line a phan khawhnak khuate lei mei tuah hi alaka in nan re a thei! a timi nupa hna bia nih zeimaw Laimi tha zaang a zorter. Ruah a herh ngai fawn.

Hi kong tlawmpal ka ttial duh. Chinram caah a tthabik mi Electric cu Chinram natural hmun, thli, ti le nika hna in chuah khawh ve hi 1rst a si. Chinram in Electric chuah khawh izuam loin Mahadat line bochan hi puitling lomi ruahnak phunkhat a si tiah ka ruah.

Aruang cu tulio Hakha Mahadat line a phak caah aa nuam mi kan tam ko. Temporary a ttha ko nain kan miphun thidop tu a si te lai. Bianabia ah Hakha khualipi inn-5000 nih thlakhat mei man kan liam mi khi sing-1250 tluk a si hnga. Kumkhat ah Hakha Laimi kan tangka Sing-15000 hi Center ah a lut. Myo pakua Mahadat line kan pe dih hna sehlaw kumkhat ah sing-100000 (1000 billion) hi center ah kan pek zungzal te lai.

Cucu Kawl uktu nih an duhnak Union Mei budget ah hman a si lai. Federal State uknak hung chuak sehlaw State pawl an vawlei in a chuakmi Mei pawl hi anmah State nih ihumh a si lai i, Mahadat line a hmang mi pawl sin Mei an kan zuarh khan in a um te lai. Asiloah Center union cozah nih mei a kan zuarh ah kan tla lai.

A tak in Mahadat line caah a dih mi phaisa cozah bawmhnak hin Chin State chungah Lemio tivapi or Adang 500MW tluk chuak khomi Electric kan tuah pi hna sehlaw Chinram cozah ngeih mi a hung si te hnga i, Chin cozah sin kumkhat phaisa sing-100000(1000billion) a lut zungzal ve te hnga. Chinram chung a hlei mi mei kha hmundang zuar khawh a si ve ding khi a si. Electric lei amah tein aa cawm keng khotu State kan si leng ah mei in Income Generation a ngeimi State kan hung si lai.

Laimi cu Lamphok in temporary huncho tiang lawng kan hmuh khawh rih tikah tefa chan caah kan ruat lo. Chin state le miphun caah Income generation ruat loin Kawl cozah sinah budget hal peng ding le kan hruh man(Mei man) liam peng ding tiang lawng kan ruah mi hi a poi ngai mi cu a si.

State le Reginal Division dang nih Income generation caah a phun tling in an i zuam. “Dam” hna cozah budget in an tuah. Nikhat khat ahcun anmah State/Division pawl nih an ihumh/ngeih teding pawl an si. Laimi cu nan ram in Income zei hmanh a um lo ee ti kan si chap.

Democracy term-2 chung kum-10 kan hun kaltak cuahmah cang. Ram ttha hna nih cozah a cawih/bawmh caan a hung dih cuahmah lai. Rampi min Leiba cham lei kap a vun panh tikah cun “Chinram caah Income Generation” (IG) sersiam manh loin caan nih liamtak kan fawi ngaingai.

=============================
1. Mei chuahnak in IG serding
2. Tlor/thingdang chuahnak in IG serding
3. Mirang vawlei chuah in IG serding
4. Vawleitang thilchuak in IG serding
5. Tourism in IG serding
6. Cinthlak in IG serding
7. Zuatkhalh in IG serding
8. Vawleicung thilchuak in IG serding
9. Transportation in IG serding
10. ……………
Credit: Khua Kam

By Chuncha