Chin Miphun Fangkhat si ahcun Kawl Miphun Fangkhat an si ve. Democracy hruainak in term-2 a hung dih cang. USDP termkhat, NLD termkhat an kan hruai cang. Tutan termthumnak ahhin cun “Kawl Miphun Fangkhat” an si ahcun “Chin Miphun Fangkhat” kan si venak hi Union ram sertu miphun pakhat nih fek tein kan hmuh fiang a ttha.

Chin miphun ramkhel kan nupa dihlak hi “Chin Nationalists” an si dih ko nain term-2 chung Kawl hruainak tang in colh rih ko usih a timi nupa cheu um a si. Term-3nak zong hi Kawl tawi in cawl a duhmi kan um rih ko lai. Nain, an thinlung chung vun dap hmanh usihlaw “Chin Miphun Fangkhat” kan si ahcun “Kawl Miphun Fangkhat” lawnglawng an si ve timi hi an dirpi hrim cio ko lai ti ka zumh.

Democracy term-3nak ahcun Kawl nih an hrawh cuahmah mi National Customery Law, National Boundary, National Income Generation, Self-Determination for State, tbt a dirpi lomi cu khuaruah tthan a ttha ngai hnga. State Development budget, Centre Minister, State Minister, Hlutdaw.. tbt tinco duh le nawl ngeihnak duh men in term thumnak hi liamter ding a si ti lo.

Vawleipi nih a bawmhchanh lio caan Loan a pek lio caan hi man ngei tein hman kan thiam a herh. Term 3&4nak hnu hin cun Union rampi nih Loan cham lei caan a hun si cang lai caah Chin State chungah a fek mi Income Generation building pi sersiam khawhnak caanttha nih a kan liamtak nak hnga lo tei kan rialpiak hram ko u.

2020 thimnak ah Chin State chung i teinak a hmumi hi zei party nan si zong ah ralring tein hmai kan norpi hram ko u. Cun 2025 thimnak caan a phak tik khi cu Kawl party tangah dor ti loin kan mifim dihlak “Chin Miphun Fangkhat” si ahcun “Kawl Miphun Fangkhat” an si ve i Chin Miphun cu 100% in miphun pakhat a tling mi kan si ti dirpi dih cang usihlaw lawmh a um tuk hnga!!! Catialtu: Salai Khua Kam

Note: Mipi Sinah Lawmhnak le Zaangfah nawlnak: Ka thawngpang (News) ka ttial mi a rel mi vialte mipi nan dihlak cungah ka lunglawmnak nan sinah ka langter. Ka thawngpang ttialmi na kan rel piakmi ruangah keimah zong thawngpang a dikmi le a hmanmi ka post khawhmi a si. Thawngpang kan tial mi hi kan Mipi caah tha hnemnak a chuahpi ding tial hi a pakhatnak ah kan i timh bikmi a si.

Thawngpang (News) kan lakmi hi thatein source dang ka zoh hnuah mah hi cu a hmanmi a si lai tiah ka ruah mi hna hi ka miphun a si mi “Chinmi” caah tial khawh le theihter khawh ka rak I zuam. Asi nain vawlei cung cu tlamtlinglonak a si caah Source ka lakmi ah a hman lo mi zong a um kho caah cu a hmang lo mi a si tiah nan theih mi cu zeitik caan poah ah ka theihter uhlaw keimah ca zongah ralrinnak caah a si lai i cu thawngpang a hmanmi le a dik mi cu remh le tial khawh kan i zuam cawlh than ko lai. Cu caah ka Miphun hawi hna nangmah bawmhnak zong ka herh hringhran. Thawngpang tial piak na duh sual zongah zeitik caan poah ah tial piak khawh zong na si tiah Zaangfah nawlnak he- Lungleng Tlang Editor.

By Chuncha