Chin khrifa pawl hi ” Vel Hlei” Chim a thiam bik kan si; Nainganzi ahcun luhmuzi tuk in vel hlei chim i tinh ding a si lo. Kawl uknak kan duh lo kan ti kan doh mi hna hi vel hlei si hlah seh, kan duh mi federal democracy le self-determination cu kawl kut in kan lak kho ti lo. Aung San fanu party NLD tal nih Democracy an kan lak pi kho sual lai kan ti caah kan dirkam hna zei an i hlei lo.

Kawlram cu multi-parties umnak ram a si caah kawlram chungah party tampi an um. Kawlram chungah party pakhat lawng bak nih cozah a ser kho mi belte cu USDP le NLD an si. An pahnih in cozah an ser veve cang. Cozah an ser chungah tlangcung mi nih kan duh mi federal le Self-determination ngah cu chim lo, ram chung buainak tu an kar ter chin chin.

Tlangcung mi nih kan duh mi Federal le Self-Determination kan ngah kho nak ding caah cun ” coalition government” system kan hman a herh. Coalition Gorvenment kan ser kho ahcun tlangcung mi vialte nih parliament le Hluttaw ah phunghrampi remhnak kong siseh, ralkap nawlngeihnak kong siseh, ramdang he pehtlaihnak kong siseh, ramchung thanchonak kong siseh thil tampi hmunkhat teah kan ceih tti kho lai.

NLD nih cozah an ser than ahcun lu hnih ngeih ( cozah ) an si than thiam thiam lai. Ralkap nih security lei in an kan uk lai. NLD cozah nih khat lei in an kan uk rih lai. Zei pipa a chuak hlei lai lo. Buainak tu a kar chin chin lai. USDP nih cozah an ser than ah cun dictatorship uknak in an kan hruai than lai i, ramchung ral a tho than lai.

Tlangcung mi vialte lakah Chin Khrifa pawl hi ” Vel Hlei” a chim thiam bik mi kan si. NLD nih term khat lawng an kan hruai rih caah tutan cu NLD nih kan hruai rih ko hna seh timi hi ” Vel Hlei” chim a si. A tak le ngai ahcun NLD leaders pawl zong kawl an si. Kawl uknak hrimhrim kan duh ti lo kan ti ko tung ahcun ” Vel Hlei” in NLD tanh a herh lo. Nainganzi hi ” Vel Hlei” in tuan kan i tinh peng caah kan duh mi kan hmu kho tawn lo nak a si. Cun, a dang tlangcung mi zong nih ” Chin pawl cu mi ralchia le “vel hlei” chim thiam tuk ah kan ruah beh nak hi a si.

Cu caah vel hlei chim can cu a dih cang. A tu ahcun kan mah tein kan sining le dirhmun kan i thei cang caah nawlngeihnak zong kan mah tein kan i pek ve a hau. Atu lio kan Kawlram Nainganzi um tu ning in cun ” USDP le NLD” nih cozah ser ti hna hlah seh. Federal Democracy le Self-determination” a duh mi tlangcung mi vialte teltum kho ve nak lam pakhat a si mi ” Coalition government” ser kho ding tu i zuam hna usih. Hi bantuk a tlamtling kho nak ding caah cun mah le miphun party cio kha thazaang kan pek hna a herh. Vote CNLD.

Catialtu: Salai Bawi Hlei Hu

By Chuncha